“জীৱনৰ মহত্ব উপলব্ধি কৰিবলৈ হ’লে আমি শিল্প সাধনাত জড়িত হব লাগিব।শিল্পই আকাশ সৈতে মাটি আৰু মানুহৰ সম্পৰ্ক সুদৃঢ় কৰিব পাৰিব লাগিব।”-এই বক্তব্য ঢকুৱাখনা মহাবিদ্যালয়ৰ অধ্যাপক ড০ পংকজ বৰাৰ। পঞ্চম সংখ্যক ঢকুৱাখনা গ্ৰন্থমেলাৰ সোমবাৰে ষষ্ঠদিনা “চিত্ৰ আৰু ভাস্কৰ্য শিল্পীসকলৰ অন্তৰংগ আলাপ”অনুষ্ঠানৰ উদ্ধোধন কৰি ড০ বৰাই এইদৰেই কয়।(Dhakuakhana Book Fair)
বিয়লি ২ বজাৰ বিশিষ্ট চিত্ৰশিল্পী ইন্দিবৰ বুঢ়াগোহাঁইৰ সঞ্চালনাত অনুষ্ঠিত হোৱা এই অন্তৰংগ আলাপ অনুষ্ঠানত আমন্ত্ৰিত চিত্ৰ,ভাস্কৰ্য শিল্পীৰূপে-হীৰা শইকীয়া,মৃগনাভ গগৈ, দেৱকৃষ্ণ বৰুৱা,হেমেন শইকীয়া,নিৰ্মল সূত,ভৱেন তামুলী,বিনোদ সন্দিকৈ, জুমন সূত,পিংকু বৰুৱা, উৎপল গগৈয়ে আৰু পৰিৱেশ মিত্ৰ দেৱজিৎ ফুকনে অংশগ্ৰহণ কৰি মনৰ অনুভৱ ব্যক্ত কৰে।উল্লেখ্য যে ইয়াৰ পূৰ্বেই আজি পঞ্চম সংখ্যক ঢকুৱাখনা গ্ৰন্থমেলাৰ ষষ্ঠ দিনা পুৱা ১১ বজাৰ পৰা শিক্ষাৰ্থীসকলৰ মাজত পোষ্টকাৰ্ডত চিঠি লিখা প্ৰতিযোগিতা আয়োজন কৰা হয়।ইফালে দিনৰ ১২ বজাৰ পৰা শিক্ষাৰ্থীসকলৰ বাবে-“কেৰিয়াৰ সজাগতা অনুষ্ঠান” আয়োজন কৰা হয়।এই কেৰিয়াৰ সজাগতা অনুষ্ঠানত সমল ব্যক্তিৰূপে উপস্থিত থাকি ঢকুৱাখনা সম জিলাৰ সহকাৰী আয়ুক্ত সুদৰ্শন শইকীয়া,আৰু ঢকুৱাখনা ৰাজহ চক্ৰৰ চক্ৰ বিষয়া-নৱনীতা হাজৰিকাই ছাত্ৰ-ছাত্ৰীসকলে কি দৰে পঢ়িলে,কেনেকৈ লক্ষ্য বান্ধি আগবাঢ়িলে নিজৰ কেৰিয়াৰ গঢ় দিব পাৰিব সেই বিষয়ে বিস্তৃতভাৱে বক্তব্য ৰাখে।
আৰু নিশালৈ ঢকুৱাখনাৰ বহুকেইখন বিদ্যালয়ৰ শিক্ষাৰ্থীৰ অংশগ্ৰহণেৰে সাংস্কৃতিক সন্ধিয়া অনুষ্ঠিত হয়।কাইলৈ ২৪ ডিচেম্বৰত পঞ্চম সংখ্যক “ঢকুৱাখনা গ্ৰন্থমেলা-২০২৪”ৰ সামৰণি পৰিব মুকলিসভা আৰু বঁটা বিতৰণী সভাৰে।অন্তিম দিনাৰ কাৰ্যসূচী আৰম্ভ হ’ব ১১ বজাত জ্যেষ্ঠ নাগৰিকৰ সম্বৰ্ধনা অনুষ্ঠানেৰে।ইয়াৰ পিছতেই ১২ বজাৰ পৰা মুকলি সভাৰ লগতে বঁটা বিতৰণী অনুষ্ঠান আৰম্ভ হ’ব ঢকুৱাখনা গ্ৰন্থমেলা সমিতিৰ সভাপতি-ড০গিৰীণ গগৈয়ে। ঢকুৱাখনাৰ বিধায়ক নৱ কুমাৰ দলেয়ে উদ্ধোধন কৰিব লগা এই মুকলি সভাত মুখ্য অতিথিৰূপে শিক্ষামন্ত্ৰী ডাঃ ৰণোজ পেগুৱে,বিশিষ্ট অতিথিৰূপে অসম কৃষি বিশ্ববিদ্যালয়ৰ উত্তৰ লখিমপুৰ মাণ্ডলিক গৱেষণা কেন্দ্ৰৰ মুখ্য বিজ্ঞানী ড০ প্ৰবাল শইকীয়াই,আৰু আমন্ত্ৰিত অতিথিৰূপে বিশিষ্ট সাহিত্যিক ইছমাইল হুছেইনকে প্ৰমুখ্যে কৰি বহু বিশিষ্ট ব্যক্তিয়ে অংশগ্ৰহণ কৰিব বুলি গ্ৰন্থমেলা উদযাপন সমিতিৰ সম্পাদক ৰিতু কুমাৰ দাসে জানিবলৈ দিছে।
