ঢকুৱাখনাৰ পৰা-ৰাজীৱ বৰুৱা,৩০ অক্টোবৰ:-“এক সুস্থ শৈক্ষিক ব্যৱস্থা,সু-স্বাস্থ্য সেৱাৰ ব্যৱস্থা আৰু যাতায়তৰ সু-ব্যৱস্থাইহে এখন সমাজক উন্নতিৰ শিখৰলৈ লৈ যাব পাৰে। মানুহক কৰ্মহীন চিন্তাহীন কৰি তোলা বিভিন্ন চৰকাৰী আঁচনিয়ে কেতিয়াও সমাজৰ বা এটা জাতিৰ উন্নতি সাধিব নোৱাৰে।”-এই তাৎপৰ্যপূৰ্ণ মন্তব্য অসম সাহিত্য সভাৰ প্ৰধান সম্পাদক,তথা অধ্যাপক ড০উপেন্দ্ৰজিৎ শৰ্মাৰ। ( Harhi College, Dhakuakhana)

উল্লেখ্য যে তিনিদিনীয়া কাৰ্যসূচীৰে আৰম্ভ হোৱা ঢকুৱাখনাৰ হাৰ্হি মহাবিদ্যালয়ৰ ৰূপালী জয়ন্তী মহোৎসৱৰ স্মৃতিগ্ৰন্থ-
“স্বপ্নদ্ৰষ্টা হাৰ্হি” উন্মোচন কৰি অসম সাহিত্য সভাৰ প্ৰধান সম্পাদকগৰাকীয়ে কয় যে-“কেৱল হিতাধিকাৰী সৃষ্টি কৰি অনুদান দি ৰাজ্য এখনৰ নাগৰিক সকলক স্বাৱলম্বী কৰি তুলি নোৱাৰি।নাগৰিক সকলক স্বাৱলম্বী কৰিবলৈ তুলিবলৈ হ’লে চৰকাৰে মূলতঃ তিনিটা সুবিধা প্ৰদান কৰিব লাগিব প্ৰতিজন নাগৰিকক।চৰকাৰে নাগৰিকৰ বাবে সুস্থ শিক্ষা ব্যৱস্থা,সুস্থ-সুলভ চিকিৎসা ব্যৱস্থা আৰু সুচল যাতায়তৰ ব্যৱস্থা কৰি দিলেই ৰাজ্যৰ নাগৰিকসকলআপুনি স্বাৱলম্বী হৈ দেশক উন্নয়নৰ দিশত আগুৱাই নিব পাৰিব।ইয়াৰ বাবে ৰাজ্যত হিতাধিকাৰী সৃষ্টি কৰাৰ কোনো প্ৰয়োজন নাই।”

দুপৰীয়া ১-৩০ বজাত ৰূপালী জয়ন্তী মহোৎসৱ উপলক্ষে হাৰ্হি কলেজৰ অধ্যাপক ড০ জিতু কুমাৰ চমুৱাৰ সম্পাদনাত প্ৰকাশ হোৱা স্মৃতিগ্ৰন্থ ‘স্বপ্নদ্ৰষ্টা হার্হি’ উন্মোচন কৰি অসম সাহিত্য সভাৰ প্ৰধান সম্পাদক ডঃ শৰ্মাই-
অসমীয়া ভাষাই ধ্ৰুপদী ভাষাৰ স্বীকৃতি লাভ কৰা প্ৰসঙ্গত কয় যে অসমীয়া ভাষাৰ নিজস্ব-স্বাভিমানী সত্বাটোক আমি আমাৰ নতুন প্ৰজন্মলৈ আগবঢ়াই লৈ যাব লাগিব।কেৱল ধ্ৰুপদী ভাষাৰ স্বীকৃতিয়ে ভাষাটোক ৰক্ষা কৰিব নোৱাৰে। অসমীয়া ভাষাই ধ্ৰুপদী ভাষাৰ স্বীকৃতি পোৱাত দুখ-বেজাৰ পোৱা সকলক এঘৰীয়া কৰিবৰ সময় হ’ল। যিসকলে জাতিৰ গৌৰৱৰ আনন্দৰ সময়ত বেয়া পাই সেই সকলেই আমাৰ জাতিক বিপথে পৰিচালিত কৰিছে। সেইসকলে কিন্তু চৰকাৰী বঁটা-বাহন আগ্ৰহৰে গ্ৰহণ কৰে। অসমীয়া ভাষা জীয়াই থাকিলেহে জাতিটো জীয়াই থাকিব। প্ৰথমতে আমি বিশুদ্ধ অসমীয়া বুলি নিজক পৰিচয় দিব পাৰিব লাগিব; তাৰ পিছতহে আমি সকলো ভাৰতীয়।” এই গ্ৰন্থ উন্মোচনী সভাতে কেইবাগৰাকীও স্থানীয় লেখক-লেখিকাৰ ভিন্ন বিষয়ৰ অন্য তিনিখনকৈ গ্ৰন্থও উন্মোচন কৰা হয়।

ঢকুৱাখনাৰ পূৱ প্ৰান্তত ১৯৯৮ চনতে ঢকুৱাখনা সম জিলাৰ বৃহত্তৰ হাৰ্হি অঞ্চলৰ শিক্ষানুৰাগী বিদ্বৎ সমাজৰ ঐকান্তিক প্ৰচেষ্টাত গঢ় লৈ উঠা উচ্চশিক্ষাৰ বাটকটীয়া অনুষ্ঠান হাৰ্হি মহাবিদ্যালয়ে গুণগত জ্ঞানৰ গৰিমা বিলাই অতিক্ৰম কৰিলে গৌৰৱময় ২৫ টি বৰ্ষ ।সেইয়ে আজিৰে পৰা তিনিদিনীয়াকৈ বৰ্ণাঢ্য কাৰ্যসূচীৰে আৰম্ভ হৈছে ৰূপালী জ়য়ন্তী মহোৎসৱ। ফলত বৃহত্তৰ অঞ্চলটোৰ একমাত্ৰ উচ্চ শিক্ষাৰ প্ৰতিষ্ঠান গোবিন্দপুৰস্থিত হাৰ্হি মহাবিদ্যালয়ৰ প্ৰাংগনত পুৱাৰে পৰা দেখিবলৈ পোৱা যায় এক উৎসৱমুখৰ পৰিৱেশ।ৰূপালী জয়ন্তীৰ কাৰ্যসূচী অনুসৰি-পুৱা ৯ বজাত উদযাপন সমিতিৰ সম্পাদক তথা অধ্যক্ষ ড৹ মানসজ্যোতি নেওগে মহাবিদ্যালয়ৰ পতাকা আৰু উদযাপন সমিতিৰ কাৰ্যকৰী সভাপতি ক্ষীৰোদ শইকীয়াই ৰূপালী জয়ন্তী মহোৎসৱৰ মূল পতাকা উত্তোলন কৰাৰ সমান্তৰালকৈ অন্যান্য ২৫ গৰাকী বিশিষ্ট ব্যক্তিয়ে সৰ্বমুঠ ২৫ খন পতাকা উত্তোলন কৰি ৰূপালী জয়ন্তীৰ প্ৰথম দিনৰ কাৰ্যসূচীৰ শুভাৰম্ভণি ঘটাই।

পতাকা উত্তোলনৰ পূর্বেই উদ্যাপন সমিতিৰ সদস্যা সকলে আৰু মহাবিদ্যালয়ৰ ছাত্রীসকলে আটাইকে ফুলাম গামোচাৰে আদৰণি জনায়।ইয়াৰ পিছতে স্মৃতি তৰ্পণ কাৰ্যসূচীৰ শুভাৰম্ভ কৰে হাৰ্হি উচ্চতৰ মাধ্যমিক বিদ্যালয়ৰ অৱসৰপ্ৰাপ্ত উপাধ্যক্ষ টংক ৰাজখোৱাই।এই অনুষ্ঠানৰ লগত সংগতি ৰাখি প্ৰাক্তন ছাত্ৰ সন্মিলনীয়ে আটক ধুনীয়াকৈ নিৰ্মাণ কৰি উলিওৱা নৱ-নিৰ্মিত মুখ্য তোৰণ উদ্বোধন কৰে ঢকুৱাখনা সমষ্টিৰ বিধায়ক নৱ কুমাৰ দলেই। আৰু ইয়াৰ পিছতে ঢকুৱাখনা সম জিলাৰ স্বাস্থ্য বিষয়া ডাঃ অতুল চন্দ্ৰ খাউণ্ডে প্ৰদৰ্শনী আৰু গ্ৰন্থমেলাৰ দ্বাৰ উন্মোচন কৰে।দুপৰীয়া ১২.৩০ বজাত মঞ্চ উদ্বোধন কৰে ধেমাজি মহাবিদ্যালয়ৰ অৱসৰপ্রাপ্ত অধ্যক্ষ ড° বুদ্ধিন্দ্ৰ নাথ বৰুৱাই।উদ্ধোধনী ভাষণত ড° বৰুৱাই কয় যে-“শিক্ষা হৈছে সমাজ পৰিবৰ্তনৰ আহিলা।শিক্ষাৰ অবিহনে সমাজ এখন পৰিবৰ্তন সম্ভৱ হ’ব নোৱাৰে।সমাজক পৰিবৰ্তন কৰাৰ ক্ষেত্ৰত শিক্ষাই সমাজক জগাই তোলে।শিক্ষাৰ জ্ঞান নহ’লে সমাজৰ অন্তৰদৃষ্টি জাগ্ৰত হ’ব নোৱাৰে।শিক্ষাই সমাজৰ অন্তৰদৃষ্টি জাগ্ৰত কৰি তোলে।এখন সুন্দৰ সমাজ প্ৰতিষ্ঠা কৰিবলৈ শিক্ষাৰ জ্ঞান আহৰণ কৰাতো বৰ প্ৰয়োজন।”

তেওঁ লগতে আৰু কয় যে- শিক্ষাৰ জ্ঞান নহ’লে এখন সুন্দৰ সমাজ প্ৰতিষ্ঠা কৰাতো সম্ভৱ নহয়।শিক্ষাৰ জ্ঞানে শিক্ষাৰ্থীৰ চকু পোহৰ কৰি তোলে।আন্ধাৰৰ পৰা পোহৰৰ বাটলৈ আগুৱাই
লৈ যাব পাৰে।১২.৪৫ বজাৰ পৰা প্ৰাক্তন ছাত্ৰ ছাত্ৰীৰ পঞ্জীয়ন আৰম্ভ হয়।ইফালে বিয়লি ২ বজাৰ পৰা-“নতুন শিক্ষানীতি -২০২০ আৰু সংস্থাপনৰ সম্ভাৱনীয়তা”

শীৰ্ষক আলোচনা সত্ৰ অনুস্থিত হয়।লখিমপুৰ বালিকা মহাবিদ্যালয়ৰ অৱসৰপ্ৰাপ্ত অধ্যক্ষ ড° মুকুন্দ ৰাজবংশীৰ সঞ্চালনাত অনুষ্ঠিত হোৱা এই আলোচনা সত্ৰত লখিমপুৰ তেলাহী কমলাবৰীয়া মহাবিদ্যালয়ৰ অধ্যক্ষ ড° বুবুল শইকীয়া আৰু চন্দ্ৰকান্ত বেজবৰুৱা মহাবিদ্যালয়ৰ সহকাৰী অধ্যাপক ড° দীপক শৰ্মাই আলোচক হিচাপে অংশগ্ৰহণ কৰে। আলোচনাত দুয়োজন আলোচকে শিক্ষাৰ সমগ্ৰ ব্যৱস্থাৰ লগত জড়িত মূল্যবোধৰ শিক্ষা,চৰিত্ৰ গঠন, আধ্যাত্মিকতা ইত্যাদি… দিশসমূহৰ আলোচনা কৰাৰ লগতে বহুমুখী গৱেষণা, আবেগিক বুদ্ধিমত্তা,শিক্ষাত মাতৃভাষাৰ গুৰুত্ব ইত্যাদি বিভিন্ন দিশত মননশীল বিশ্লেষণ দাঙি ধৰে।সন্ধিয়া-৫ বজাৰ সাংস্কৃতিক অনুষ্ঠান আৰম্ভ হয়।ইয়াৰ মাজতে হাৰ্হি মহাবিদ্যালয়ৰ অতীত বৰ্তমানক প্ৰতিফলিত কৰি নিৰ্মাণ কৰা এখনি “তথ্যচিত্ৰ” উন্মোচন কৰা হয়।কাইলৈ পুৱা ৯ বজাত এক বৰ্ণাঢ্য সাংস্কৃতিক শোভাযাত্ৰা উলিওৱা হ’ব ৰূপালী জয়ন্তী উপলক্ষে।শোভাযাত্ৰা উদ্ধোধন কৰিব বিশিষ্ট নাট্যকৰ্মী অসীম শৰ্মাই।উল্লেখ্য যে-অহা ১ নৱেম্বৰত সামৰণি পৰিব ঢকুৱাখনাৰ হাৰ্হি মহাবিদ্যালয়ৰ ৰূপালী জয়ন্তী মহোৎসৱৰ।