বিদ্ৰোহৰ অন্ত পৰিল৷ দৰাচলতে বিধায়ক নহয়, সাংসদ হোৱাৰহে মন অতুল বৰাৰ৷ অসম বিধানসভা নিৰ্বাচনত দিছপুৰ সমষ্টিৰ পৰা দলীয় টিকট লাভৰ পৰা বঞ্চিত হোৱাৰ পিছত ভাৰতীয় জনতা পাৰ্টীৰ জ্যেষ্ঠ নেতা অতুল বৰাই বিদ্ৰোহৰ পথ ত্যাগ কৰাৰ সিদ্ধান্ত গ্ৰহণ কৰিছে৷ দেওবাৰে সংবাদ মাধ্যমৰ আগত এই কথা স্পষ্ট কৰি বৰাই জানিবলৈ দিয়ে যে তেওঁ ২০২৯ চনৰ লোকসভা নিৰ্বাচনত গুৱাহাটী সমষ্টিৰ পৰা প্ৰতিদ্বন্দ্বিতা কৰিব আৰু বৰ্তমান ডিমৰীয়া সমষ্টিত দলীয় কাম-কাজত মনোনিৱেশ কৰিব৷ শেহতীয়াকৈ কংগ্ৰেছৰ পৰা আহি বিজেপিত যোগদান কৰা প্ৰদু্ৎ বৰদলৈক দিছপুৰ সমষ্টিৰ প্ৰাৰ্থিত্ব প্ৰদান কৰাৰ পিছতেই অতুল বৰাৰ পৰৱৰ্তী ৰাজনৈতিক পদক্ষেপক লৈ সৃষ্টি হোৱা জল্পনা-কল্পনাৰ এতিয়া অৱসান ঘটিছে৷
মুখ্যমন্ত্ৰী ড॰ হিমন্ত বিশ্ব শৰ্মাই অতুল বৰাৰ বাসগৃহলৈ গৈ তেওঁৰ সৈতে আলোচনাত মিলিত হোৱাৰ পিছতেই জ্যেষ্ঠ নেতাজনে নিজৰ স্থিতি সলনি কৰে৷ দেওবাৰে সংবাদ মাধ্যমক সম্বোধন কৰি তেওঁ কয় যে মুখ্যমন্ত্ৰীগৰাকীৰ বাসগৃহলৈ অহাৰ সময়তে তেওঁ আগন্তুক লোকসভা নিৰ্বাচনত গুৱাহাটী সমষ্টিৰ পৰা প্ৰতিদ্বন্দ্বিতা কৰাৰ ইচ্ছা প্ৰকাশ কৰিছিল৷ বৰাই ২০২৯ চনৰ লোকসভা নিৰ্বাচনী যুঁজত অৱতীৰ্ণ হোৱাৰ কথা মুখ্যমন্ত্ৰীক অৱগত কৰা বুলিও জানিবলৈ দিয়ে৷ ইয়াৰ জৰিয়তে তেওঁ নিৰ্দলীয় হিচাপে বিধানসভা নিৰ্বাচনত অৱতীৰ্ণ হোৱাৰ সকলো সম্ভাৱনা নুই কৰিলে৷
দলীয় টিকটৰ পৰা বঞ্চিত হোৱাৰ পিছত অতুল বৰাৰ সমৰ্থকসকলৰ মাজত মূলতঃ তিনিটা বিকল্পক লৈ চৰ্চা চলিছিল৷ সেই বিকল্পসমূহ আছিল ক্ৰমে নিৰ্দলীয় হিচাপে নিৰ্বাচন খেলা, কংগ্ৰেছ প্ৰাৰ্থী মীৰা বৰঠাকুৰক সমৰ্থন জনোৱা অথবা ৰাজনৈতিকভাৱে নিি©য় হৈ থকা৷ কিন্তু এতিয়া তেওঁ নিৰ্দলীয় হিচাপে প্ৰতিদ্বন্দ্বিতা নকৰে বুলি স্পষ্ট কৰি দিছে৷ ইয়াৰ পৰিৱৰ্তে, সমষ্টি পুনৰ্নিৰ্ধাৰণৰ ফলত মঠঘৰীয়া, বীৰকুছি, নুনমাটি, নাৰেংগী আৰু সাতগাঁৱৰ দৰে অঞ্চল অন্তৰ্ভুক্ত হোৱা ডিমৰীয়া সমষ্টিত তেওঁ সক্ৰিয়ভাৱে ৰাজনৈতিক কাম-কাজ চলাই যাব৷ দিছপুৰৰ পৰিৱৰ্তে ডিমৰীয়াত সক্ৰিয় হৈ থাকিব বুলি তেওঁ ইতিমধ্যে মুখ্যমন্ত্ৰীকো অৱগত কৰিছে৷
