বাৰাণসী, চেন্নাই, পাটনা, জয়পুৰকে ধৰি দেশৰ মুঠ ৪১ টা বিমান বন্দৰক ই-মেইল যোগে বোমাৰে উৰুৱাই দিয়াৰ ভাবুকি৷মঙলবাৰে ভাবুকি লাভ কৰাৰ পাচতেই বিভাগীয় কৰ্তৃপক্ষই তৎকালীনভাৱে আৰম্ভ কৰে ঘটনাৰ তদন্ত৷তদন্তৰ অন্তত এইসকলোবোৰ ভাবুকি ভুৱা বুলি প্ৰমাণিত হৈছে৷নিশা প্ৰায়১২.৪০বজাত exhumedyou888@gmail.com আইডিৰপৰা ই-মেইল পোৱাৰ পিচত তৎপৰ হৈ পৰে বিমান বন্দৰ কৰ্তৃপক্ষ৷টাৰ্মিনেল সমূহত অধিক শক্তিশালী কৰি তোলা হয় নিৰাপত্তা ব্যৱস্থা।বাৰাণসী, চেন্নাই, পাটনা, নাগপুৰ, জয়পুৰ, বদোদৰা, কইম্বাটুৰ আৰু জব্বলপুৰ বিমানবন্দৰ ভাবুকি লাভ কৰা বিমান বন্দৰ সমূহৰ ভিতৰত অন্যতম।৪জুনত লোকসভা নিৰ্বাচনৰ ফলাফল ঘোষণাৰ পিচত প্ৰধানমন্ত্ৰী নৰেন্দ্ৰ মোদীয়ে মঙলবাৰে প্ৰথমবাৰৰ বাবে নিজৰ সংসদীয় সমষ্টি বাৰাণসীত উপস্থিত হৈছিল।সূত্ৰই জনোৱা মতে, এক মে’ত এই গোটটোৱে ৰাষ্ট্ৰীয় ৰাজধানী দিল্লীৰ কেইবাখনো বিদ্যালয়লৈ একেধৰণৰ ই-মেইল প্ৰেৰণ কৰিছিল৷বিমান বন্দৰ সমূহে লাভ কৰা ই-মেইল সমূহত প্ৰায় একেধৰণৰ বাৰ্তা আছিল: “হেল্ল’, বিমান বন্দৰত বিস্ফোৰক লুকুৱাই থোৱা আছে। বোমাবোৰ অতি সোনকালে বিস্ফোৰণ হ’ব।
আপোনালোক সকলোৰে মৃত্যু হ’ব”৷সূত্ৰসমূহে জনোৱা মতে, ভাবুকিৰ ই-মেইল লাভ কৰাৰ পাচতেই বিমান বন্দৰ কৰ্তৃপক্ষই লগে লগে তদন্ত আৰম্ভ কৰি ভাবুকি সমূহ ভুৱা বুলি আশ্বস্ত হয়৷ইফালে চেন্নাই বিমানবন্দৰৰ পৰা ২৮৬জন যাত্ৰী লৈ ডুবাইলৈ উৰা মাৰিব লগীয়া বিমানখনৰ যাত্ৰা এই ভাবুকি ই-মেইলৰ ফলত বিলম্ব হয়।বিমানখনত বোমাবিস্ফোৰণৰ সতৰ্কবাণী ই-মেইলত পোৱাৰ কিছু সময়ৰ পাচতে নিৰাপত্তা সংস্থাই বিমান খনত পুংখানুপুংখভাৱে তালাচী অভিযান চলায়৷ কিন্তু বিমানখনৰ ভিতৰত কোনো সন্দেহজনক বস্তু লাভ নকৰাত বিমানখন গন্তব্য স্থানলৈ যাবলৈ দিয়া হয়।জয়পুৰ আন্তঃৰাষ্ট্ৰীয় বিমানবন্দৰ কৰ্তৃপক্ষইও বোমাবিস্ফোৰণৰ ই-মেইল পোৱাৰ পিচত আৰক্ষী আৰু চিআইএছএফৰ বিষয়াই তালাচী চলাই যদিও সন্দেহজনক একো নাপালে।মুম্বাই বিমানবন্দৰৰ সূত্ৰই জনোৱা মতে, এই ভাবুকি “অনিৰ্দিষ্ট” হোৱাৰ বাবে সেৱাৰ ওপৰত কোনো প্ৰভাৱ পৰা নাই। নাগপুৰ আৰু পাটনা বিমানবন্দৰৰ কৰ্তৃপক্ষইও পুংখানুপুংখভাৱে তালাচী চলাই যদিও বোমাৰ ভাবুকি ভুৱা বুলিহে প্ৰমাণিত হয়।
