ডাইনীৰ সন্দেহত জীয়ন্তে জ্বলাই হত্যা, কাৰ্বি আংলঙত নৃশংস ঘটনা
কাৰ্বি আংলং জিলাত অমানৱীয় আৰু হৃদয়বিদাৰক এক হত্যাকাণ্ড সংঘটিত হৈছে। ডাইনী সন্দেহত গাঁওবাসীয়ে এটা দম্পতিক জীয়ন্তে জ্বলাই হত্যা কৰাৰ অভিযোগ উত্থাপন হৈছে। এই ভয়ংকৰ ঘটনাটো ৩০ ডিচেম্বৰৰ নিশা জিলাখনৰ হাওৰাঘাট আৰক্ষী চকীৰ অন্তৰ্গত ১ নং বেলোগুৰি মুণ্ডা গাঁৱত সংঘটিত হয়।
আৰক্ষী সূত্ৰে জনোৱা মতে, গাঁওখনৰ একাংশ লোকে ডাইনী চৰ্চাৰ সন্দেহত দম্পতিটোক লক্ষ্য কৰি প্ৰথমে আক্ৰমণ কৰে। অভিযোগ অনুসৰি, দুয়োকে ঘৰৰ ভিতৰত চোকা অস্ত্ৰৰে আঘাত কৰাৰ পিছত ঘৰত অগ্নিসংযোগ কৰা হয়। ফলত দম্পতিটো জীয়ন্তে জ্বলি মৃত্যু হয়।
নিহত দুগৰাকীৰ নাম গাৰ্ডি বিৰোৱা (৪৩) আৰু মীৰা বিৰোৱা (৩৩)। স্থানীয় লোকে অভিযোগ কৰে যে, অঞ্চলটোত কোনো অঘটন ঘটিলেই একাংশ লোক ডাইনী সন্দেহত নিৰীহ মানুহক লক্ষ্য কৰি লয়, যাৰ ফলত এনে ভয়ংকৰ ঘটনা সংঘটিত হয়।
গৌৰৱ গগৈয়ে যোৱা ২৭ ডিচেম্বৰত তেজপুৰত আয়োজিত এক কাৰ্যসূচীত অংশ লৈ সংবাদ মাধ্যমৰ আগত ঘোষণা কৰে যে ২০২৬ৰ বিধানসভা নিৰ্বাচনত কংগ্ৰেছ দলে ১০০ৰো অধিক আসনত প্ৰাৰ্থী প্ৰদান কৰিব আৰু বাকী আসনসমূহ মিত্ৰ দলসমূহৰ সৈতে আলোচনা কৰি নিৰ্ধাৰণ কৰা হ’ব। এই ঘোষণাৰ পাছতেই বিৰোধী শিবিৰৰ একাংশ দলৰ মাজত ক্ষোভৰ সৃষ্টি হয়।
বিৰোধী দলসমূহৰ মতে, মিত্ৰতা চূড়ান্ত নোহোৱাকৈ আৰু আসন ভাগ-বাটোৱাৰাৰ আলোচনাত বহাৰ আগতেই কংগ্ৰেছে একতৰফাভাৱে “১০০ আসন” ঘোষণা কৰাটো মিত্ৰতাৰ নীতিবিৰোধী। অসমত মুঠ ১২৬খন বিধানসভা আসন থাকোঁতে কংগ্ৰেছে যদি ১০০ৰো অধিক আসনত প্ৰতিদ্বন্দ্বিতা কৰে, তেন্তে বাকী দলসমূহৰ বাবে অত্যন্ত সীমিত আসনহে অৱশিষ্ট থাকিব বুলি তেওঁলোকে অভিযোগ কৰে।
বিশেষকৈ অসম জাতীয় পৰিষদ, ৰাইজৰ দল, চিপিআই, চিপিআই(এম), চিপিআই(এম-এল) আৰু এ পি এইচ এল চিৰ দৰে দলসমূহে এই ঘোষণাক লৈ অসন্তুষ্টি প্ৰকাশ কৰিছে। ৰাইজৰ দলৰ সভাপতি তথা বিধায়ক অখিল গগৈয়ে কয়, “আমাৰ বাবে আসনৰ সংখ্যা মুখ্য নহয়। মূল লক্ষ্য হ’ল বিজেপি আৰু আৰএছএছৰ শাসনৰ বিৰুদ্ধে ঐক্যবদ্ধভাৱে যুঁজ দিয়া। কিন্তু মিত্ৰতাৰ ক্ষেত্ৰত কাকো জাপি দিয়া উচিত নহয়।”
অখিল গগৈয়ে লগতে কয়, “গৌৰৱ গগৈয়ে আগতে কৈছিল কেমেৰাৰ সন্মুখত মিত্ৰতাৰ কথা নক’ব বুলি। কিন্তু হঠাতে তেওঁ নিজেই সেই নীতি ভাঙিলে। মিত্ৰতা মানে আলোচনা, বুজাবুজি আৰু বিশ্বাস।”
আনহাতে, অসম জাতীয় পৰিষদৰ সভাপতি লুৰীণজ্যোতি গগৈয়ে মন্তব্য কৰে যে গৌৰৱ গগৈয়ে ১০০ আসনৰ কথা ক’লেও এই বিষয়টো আলোচনা কৰিহে চূড়ান্ত হ’ব। তেওঁ কয়, “মিত্ৰতা নহ’লে বিজেপিক পৰাভূত কৰা অসম্ভৱ। সেয়েহে আসন বণ্টনৰ বিষয়টো আলোচনা কৰিয়েই ঠিক কৰিব লাগিব।”
লুৰীণজ্যোতি গগৈয়ে লগতে উল্লেখ কৰে যে বিটিআৰৰ ১৫ খন আসন এই ১০০ আসনৰ ভিতৰত ধৰা হৈছে নে নাই সেয়াও স্পষ্ট নহয়। কিয়নো বিটিআৰত বৰ্তমান ইউপিপিএল আৰু বিপিএফ শক্তিশালী আৰু দুয়ো দলেই এনডিএৰ অংশীদাৰ। সেয়ে এই বিষয়সমূহ আলোচনা অবিহনে নিৰ্ধাৰণ কৰা সম্ভৱ নহয় বুলিও তেওঁ কয়।
ইফালে, চিপিআই(এম)-এও কংগ্ৰেছৰ ঘোষণাত অসন্তোষ প্ৰকাশ কৰিছে। দলটোৰ ৰাজ্যিক সম্পাদক সুপ্ৰকাশ তালুকদাৰে কয়, “আলোচনা আৰম্ভ হৈছে যদিও আসন বণ্টনৰ বিষয়ত এতিয়াও কোনো সিদ্ধান্ত হোৱা নাই। কেমেৰাৰ আগত নহয়, আলোচনাৰ টেবুলতেই এই বিষয়সমূহ নিষ্পত্তি হওক।”
প্ৰচণ্ড শীতৰ বাবে বন্ধ বিদ্যালয় ! শিক্ষামন্ত্ৰী ৰণোজ পেগুে আকৌ কি ঘোষণা কৰিলে
ৰাজ্যজুৰি অব্যাহত থকা প্ৰচণ্ড শীত আৰু ঘন কুঁৱলীৰ বাবে বিদ্যালয় বন্ধ ঘোষণা কৰা হৈছে। শীতৰ তীব্ৰতাত ছাত্ৰ-ছাত্ৰী আৰু শিক্ষকসকলৰ দৈনন্দিন যাতায়াত কঠিন হৈ পৰাত এই সিদ্ধান্ত লোৱা হৈছে বুলি জানিবলৈ দিয়ে শিক্ষা বিভাগে।
বিগত কেইবাদিন ধৰি অসমত বিশেষকৈ গুৱাহাটী মহানগৰসহ বিভিন্ন অঞ্চল ঘন কুঁৱলীৰ আৱৰণত পৰি আছে। শীতৰ প্ৰকোপ বৃদ্ধি পোৱাৰ ফলত স্বাভাৱিক জনজীৱন ব্যাহত হৈছে। বৰঝাৰস্থিত বতৰ বিজ্ঞান কেন্দ্ৰই জনোৱা মতে, গুৱাহাটী আৰু আশে-পাশে অঞ্চলত সৰ্বনিম্ন তাপমাত্ৰা প্ৰায় একে থাকিলেও সৰ্বোচ্চ তাপমাত্ৰা উল্লেখযোগ্যভাৱে হ্ৰাস পাইছে। আগন্তুক কেইদিনমানলৈ অসমসহ উত্তৰ-পূৰ্বাঞ্চলৰ বহু ৰাজ্যত ঘন কুঁৱলী অব্যাহত থাকিব বুলি পূৰ্বাভাস দিয়া হৈছে।
এই পৰিস্থিতিত শীতৰ প্ৰকোপৰ পৰা শিক্ষাৰ্থীসকলক সুৰক্ষা দিবলৈ কামৰূপ মহানগৰ জিলাত ৩১ ডিচেম্বৰৰ পৰা ৬ জানুৱাৰীলৈ সকলো চৰকাৰী বিদ্যালয় বন্ধ ৰখাৰ সিদ্ধান্ত লোৱা হৈছে। কামৰূপ মেট্ৰ’ জিলাৰ বিদ্যালয়সমূহৰ পৰিদৰ্শক আৰু সমগ্ৰ শিক্ষা অসমৰ জিলা সমন্বয়কে এই সন্দৰ্ভত নিৰ্দেশ জাৰি কৰিছে। জিলা উপায়ুক্তৰ সৈতে আলোচনা কৰি এই সিদ্ধান্ত গ্ৰহণ কৰা হৈছে বুলি জানিবলৈ দিয়া হৈছে। লগতে ব্যক্তিগত বিদ্যালয়সমূহকো ছাত্ৰ-ছাত্ৰীসকলৰ সুবিধাৰ কথা চিন্তা কৰি একে ধৰণৰ ব্যৱস্থা ল’বলৈ আহ্বান জনোৱা হৈছে।
ইফালে শিক্ষামন্ত্ৰী ডাঃ ৰণোজ পেগুৱে পূৰ্বেই জানিবলৈ দিছিল যে, শীতৰ প্ৰকোপ অধিক হ’লে জিলা প্ৰশাসনে বিদ্যালয় বন্ধৰ সিদ্ধান্ত ল’ব পাৰিব। তেওঁ কয়, “কিছুমান জিলাত শীতৰ তীব্ৰতা বেছি, কিছুমানত তুলনামূলকভাৱে কম। সেই অনুসৰি জিলা আয়ুক্তসকলে পৰিস্থিতি মূল্যায়ন কৰি সিদ্ধান্ত ল’ব পাৰিব।”
শিক্ষামন্ত্ৰীয়ে সামাজিক মাধ্যমযোগেও সকলো জিলা আয়ুক্তক নিজ নিজ জিলাৰ পৰিস্থিতি পৰ্যালোচনা কৰি প্ৰয়োজন অনুসাৰে বিদ্যালয় বন্ধ বা খোলা ৰখাৰ ব্যৱস্থা গ্ৰহণ কৰিবলৈ নিৰ্দেশ দিছে।
খচৰা ভোটাৰ তালিকা প্ৰকাশ, ভোটাৰৰ সংখ্যা ১.৩৫ শতাংশ বৃদ্ধি
ৰাজ্যত খচৰা ভোটাৰ তালিকা প্ৰকাশ কৰা হৈছে। অসম ৰাজ্যিক মুখ্য নিৰ্বাচনী আয়ুক্ত অনুৰাগ গোৱেলে আজি এক সংবাদমেলত এই কথা সদৰী কৰে। বিশেষ পুনৰীক্ষণৰ পাছত ২৭ ডিচেম্বৰত খচৰা ভোটাৰ তালিকা প্ৰকাশ কৰা হয় বুলি তেওঁ জানিবলৈ দিয়ে।
নতুন খচৰা তালিকা অনুসৰি এইবাৰ ৰাজ্যত মুঠ ভোটাৰৰ সংখ্যা হৈছে ২,৫২,০১,৬২৪ জন। পূৰ্বৰ তুলনাত ভোটাৰৰ সংখ্যা ১.৩৫ শতাংশ বৃদ্ধি পাইছে। ইয়াৰ ভিতৰত ১,২৫,৭২,৫৮৩ জন পুৰুষ ভোটাৰ আৰু ১,২৬,২৮,৬৬২ গৰাকী মহিলা ভোটাৰ আছে। লগতে তৃতীয় লিংগৰ ভোটাৰ আছে ৩৭৯ জন। ভোটাৰ তালিকাত প্ৰতি ১,০০০ জন পুৰুষৰ বিপৰীতে ১,০০৪ গৰাকী মহিলা ভোটাৰ থকা বুলি জানিবলৈ দিয়ে নিৰ্বাচন আয়োগে।
ৰাজ্যজুৰি মুঠ ৩১,৪৮৬ টা ভোটকেন্দ্ৰ স্থাপন কৰা হৈছে। মানকাচৰ বিধানসভা সমষ্টিত সৰ্বাধিক ৪০২টা ভোটকেন্দ্ৰ আছে, আনহাতে দোটমা সমষ্টিত সৰ্বনিম্ন ১৪৬টা ভোটকেন্দ্ৰ আছে। ভোটাৰৰ সংখ্যাৰ দিশৰ পৰা দেৰগাঁও সমষ্টি শীৰ্ষস্থানত আছে, য’ত মুঠ ভোটাৰ ৩,১৮,৩২৬ জন। আনফালে আমৰি সমষ্টিত সৰ্বনিম্ন ১,০০,৩১৯ জন ভোটাৰ আছে।
এই খচৰা তালিকাত ৬৩,৩১৪ জন চাৰ্ভিচ ভোটাৰ আৰু ২,০২,৪৩৩ জন নন-ৰেচিডেণ্ট (পিডব্লিউডি) ভোটাৰো অন্তৰ্ভুক্ত হৈছে। ১৮-১৯ বছৰ বয়সৰ নতুন ভোটাৰ ২,৪৫,০৮৪ জন আৰু ৮৫ বছৰৰ ওপৰৰ ভোটাৰৰ সংখ্যা ১,৩৬,৫৪৬ জন বুলি জানিবলৈ দিয়া হৈছে।
বিশেষ পুনৰীক্ষণ প্ৰক্ৰিয়াত ৰাজ্যজুৰি ৬০ হাজাৰৰো অধিক বি এল অ’য়ে কাম কৰিছে। ঘৰে ঘৰে গৈ কৰা পৰীক্ষণত ৬১,০৩,১০৩ টা পৰিয়াল আৱৰি লোৱা হয়। এই সময়ছোৱাত ৭.৮৬ লাখৰো অধিক নতুন ভোটাৰ সংযোজন কৰা হয় আৰু ৪.৪৭ লাখ নাম কৰ্তন কৰা হয়। ফলত প্ৰায় ৩.৩ লাখ ভোটাৰৰ নিকা বৃদ্ধি ঘটে। একে সময়তে ৪.৭৯ লাখ মৃত ভোটাৰ আৰু ৫.২৩ লাখ স্থানান্তৰিত ভোটাৰ চিনাক্ত কৰা হৈছে, যাৰ নাম দাবী আৰু আপত্তি সময়ছোৱাত বিবেচনা কৰা হ’ব।
ভোটাৰ তালিকাত নাম অন্তৰ্ভুক্ত কৰিবলৈ ৬ নম্বৰ প্ৰ-পত্ৰ ব্যৱহাৰ কৰিব লাগিব। নাম সংশোধনৰ বাবে ৮ নম্বৰ প্ৰ-পত্ৰ ব্যৱহাৰ কৰিব পাৰিব। ৩, ৪, ১০ আৰু ১১ জানুৱাৰীত গাঁওসভাৰ জৰিয়তে খচৰা ভোটাৰ তালিকা সন্দৰ্ভত নাগৰিকক অৱগত কৰা হ’ব। পূৰ্ণাঙ্গ আৰু চূড়ান্ত ভোটাৰ তালিকা অহা ১০ ফেব্ৰুৱাৰীত প্ৰকাশ পাৱ ।
হিন্দু পৰিয়ালক কমেও দুটা সন্তান জন্ম দিবলৈ মুখ্যমন্ত্ৰীৰ আহ্বান ।
ৰাজ্যৰ জনসংখ্যাগত গঠন আৰু সামাজিক ভাৰসাম্যক লৈ উদ্বেগ প্ৰকাশ কৰি মুখ্যমন্ত্ৰী ড° হিমন্ত বিশ্ব শৰ্মাই হিন্দু পৰিয়ালসমূহক কমেও দুটা সন্তান জন্ম দিবলৈ আহ্বান জনাইছে। তেওঁ কয় যে, যিবোৰ অঞ্চলত হিন্দু সম্প্ৰদায় ইতিমধ্যে সংখ্যালঘু হৈছে অথবা সংখ্যালঘু হোৱাৰ দিশে আগবাঢ়িছে, সেইবোৰ অঞ্চলত পৰিয়াল এটাতেই সীমাবদ্ধ হৈ নথকাকৈ অধিক সন্তান জন্ম দিয়াটো প্ৰয়োজনীয় হৈ পৰিছে।
সংবাদ মাধ্যমৰ সৈতে কথা পাতোঁতে মুখ্যমন্ত্ৰীয়ে কয়, “যিবোৰ অঞ্চলত হিন্দু সম্প্ৰদায় সংখ্যালঘু হৈছে বা হোৱাৰ উপক্ৰম হৈছে, সেইবোৰ অঞ্চলত পৰিয়াল এটা সন্তান জন্ম দি ৰৈ যাব নালাগে। হিন্দু পৰিয়ালসমূহে কমেও দুটা সন্তান জন্ম দিব লাগে, সম্ভৱ হ’লে তিনিটা সন্তান জন্ম দিয়াৰ লক্ষ্য ৰাখিব লাগে।”
তেওঁ লগতে কয় যে ৰাজ্যখনৰ জনসংখ্যাগত গঠনক লৈ চৰকাৰ উদ্বিগ্ন। মুখ্যমন্ত্ৰীৰ মতে, বিভিন্ন সম্প্ৰদায়ৰ মাজত জন্মৰ হাৰৰ বৈষম্য স্পষ্টভাৱে দেখা গৈছে। “কেইবাটাও ক্ষেত্ৰত মুছলমান সম্প্ৰদায়ৰ মাজত জন্মৰ হাৰ তুলনামূলকভাৱে অধিক, আনফালে হিন্দু সমাজত এই হাৰ ক্ৰমে হ্ৰাস পাইছে। এই ধৰণৰ জনসংখ্যাগত পাৰ্থক্য অব্যাহত থাকিলে ভৱিষ্যতে সামাজিক ভাৰসাম্যত প্ৰভাৱ পৰিব পাৰে,” বুলি তেওঁ উল্লেখ কৰে।
ড° শৰ্মাই লগতে স্পষ্ট কৰি কয় যে চৰকাৰৰ আহ্বান কোনো বিশেষ সম্প্ৰদায়ৰ বিৰুদ্ধে নহয়, বৰঞ্চ সামগ্ৰিক সামাজিক ভাৰসাম্য ৰক্ষাৰ লক্ষ্যৰে। তেওঁ কয়, “আমি মুছলমান পৰিয়ালসমূহকো কওঁ যে অত্যধিক ডাঙৰ পৰিয়াল নকৰিব। ৭-৮টা সন্তান জন্ম নিদিব, অলপ কমকৈ দিয়ক। একেদৰে হিন্দু পৰিয়ালসমূহকো কওঁ—আপোনালোকে অলপ বেছি সন্তান জন্ম দিয়ক। নহ’লে আগলৈ গৈ ঘৰখন চোৱাচিতা কৰিবলৈ মানুহেই নাথাকিব।”
Zubeen Garg গৰিমাই নজনাকৈ জুবিনক লৈ কি পৰিকল্পনা কৰিছিল সিদ্ধাৰ্থে? চাৰ্জশ্বীট পঢ়ি বিস্ফোৰক মন্তব্য জুবিন-পত্নী গৰিমা শইকীয়া গাৰ্গৰ । এই পোষ্টটোত শ্যামকানু মহন্ত আৰু সিদ্ধাৰ্থ শৰ্মাৰ লগতে ছিংগাপুৰত উপস্থিত থকা সকলো লোকক লৈ বহু প্ৰশ্ন উত্থাপন কৰিছে গৰিমাই। জুবিন সম্পৰ্কে বহু কথা চাৰ্জশ্বীট পঢ়াৰ পিছতহে গৰিমাই জানিব পৰা বুলিও উল্লেখ কৰিছে।
জুবিন নাই বুলি আজিও আমি মানি ল’ব পৰা নাই – কিন্তু এনেকুৱা এটা অকল্পনীয় আৰু দুৰ্ভাগ্যজনক ঘটনা ঘটি গ’ল যাৰ পৰিণতিত কেৱল আমাৰ ঘৰখনেই থান বান হৈ দুৰ্ভাগ্যৰ এটা দিনতে ৰৈ যোৱা নাই,, গোটেই অসমখনৰেই আত্মা যেন স্থবিৰ হৈ ৰৈ গ’ল এটা প্ৰচণ্ড আঘাটত । তাতকৈও প্ৰচণ্ড আঘাটটো হৈছে জুবিন গাৰ্গৰ সতে জড়িত হৈ পৰিল বুকু ফাটি যোৱা অসহনীয় এক শব্দ “হত্যা”!
এক দীঘলীয়া তদন্ত প্ৰক্ৰিয়া চলিল আৰু অৱশেষত সকলোৰে প্ৰতীক্ষিত চাৰ্জশ্বীট দাখিল হ’ল যোৱা ১২ ডিচেম্বৰত । বৃহৎ এক চাৰ্জশ্বীট – ৰাজ্যত ৰেকৰ্ড হ’ল । এই চাৰ্জশ্বীট লৈ বহু আলোচনা চলি আছে – বহু মন্তব্য সপক্ষে/বিপক্ষে। আমি পৰিয়ালৰ লোকেও আবেদন কৰি পঢ়িব বিচাৰিছিলোঁ আৰু কেইবাদিনৰ অপেক্ষাৰ অন্তত এটা কপি আমি পাইছিলোঁ । অসুস্থতাৰ মাজতে পঢ়িবলৈ চেষ্টা কৰিছোঁ। অসহনীয় কথাবোৰ বাৰে বাৰে সহ্য কৰি পঢ়িবলৈ আপ্ৰাণ চেষ্টা কৰিছোঁ। আইনৰ বিষয়ত সপক্ষে বা বিপক্ষে মন্তব্য দিয়াৰ জ্ঞান আমাৰ একেবাৰে সীমিত। তথাপি এই মূহুৰ্তত মনলৈ অহা দুটামান কথা ক’ব বিচাৰিছোঁ । অনুগ্ৰহ কৰি কথাবোৰৰ নিগেটিভ সমালোচনা নকৰি পাৰিলে সঠিক দিশত আলোচনা হওক !
১)চাৰ্জশ্বীট পঢ়ি আমি জানিব পাৰিছো যে ছিংগাপুৰত জুবিনৰ থকাৰ ব্যৱস্থা লৈ কেইবাদিন আগৰেপৰা খেলি – মেলি আৰু কিবা অভিসন্ধি চলি আছিল । শ্যামকানু মহন্তৰ ঘৰৰ পৰা উদ্ধাৰ হোৱা SSD ত ৰুমবুকিংৰ যি লিষ্ট পোৱা হৈছে, তাত উল্লেখ আছে যে প্ৰথমে জুবিনৰ থকাৰ ব্যৱস্থা কৰা হৈছিল জনৈক অনুজ বৰুৱাৰ সৈতে এটা কোঠাত । পিছত ছিংগাপুৰ পোৱাৰ পিছত শ্যামকানু মহন্তই সিদ্ধাৰ্থ শৰ্মাৰ সৈতে মিলি বেলেগ ব্যৱস্থা কৰে। উল্লেখ আছে, প্ৰথমে কেৱল জুবিনৰ বাবেহে হোটেল পেন পেচিফিকত শ্যামকানু মহন্তৰ ৰুমৰ কাষতে আন এটা ৰুমত জুবিনৰ বাবে থকাৰ ব্যৱস্থা কৰা হৈছিল । কিন্তু পিছত আকৌ তিনিটা ৰুম বুক কৰি টীমৰ সকলোৰে থকাৰ ব্যৱস্থা কৰা হয় । আনহাতে সিদ্ধাৰ্থৰ ষ্টেটমেণ্টত কৈছে যে প্ৰথমে জুবিনৰ টীমৰ বাবে ঠিক কৰা হৈছিল হোটেল “The Village” ত কিন্তু ছিংগাপুৰ গৈ পোৱাৰ পিছত শ্যামকানু মহন্তই তাক ফোনতে থকাৰ ব্যৱস্থা হোটেল পেন পেচিফিকতহে কৰা হৈছে বুলি জনায় ।
এতিয়া যিহেতু সকলো ন্যায় ব্যৱস্থাৰ অধীনত.. এই সময়ত আমি আশা কৰিছো SIT য়ে দাখিল কৰা চাৰ্জশ্বীটখন উপযুক্ত সাক্ষ্য, প্ৰমাণ আৰু তথ্যৰে যথেষ্ট সৱল আৰু পানী নসৰাকৈ ইতিমধ্যে দাখিল কৰিছে । চৰকাৰী আইনজ্ঞ সকলেও নিশ্চয় ইতিমধ্যে পঢ়ি সকলো চালি-জাৰি চাইছে । গতিকে এই মূহুৰ্ততো যদি তেওঁলোকে ভাৱে , এই সমস্ত মাৰাত্মক অপৰাধ কাণ্ডটোত অভিযুক্তকেইজনক আদালতত দোষী সাব্যস্ত কৰিবৰ বাবে যদি কিবা আৱশ্যক আছে, তেন্তে আমাৰ একান্ত অনুৰোধ SIT আৰু চৰকাৰী আইনজ্ঞ
সকলে আকৌ এবাৰ ৰিভিউ কৰি প্ৰয়োজনীয় আইনী পদক্ষেপখিনি যাতে কৰি লয় । (মাননীয় মূখ্যমন্ত্ৰী মহোদয়ে খুব সদ্ভাৱেৰে উল্লেখ কৰিছিল Fast track বিচাৰৰ কথা)
এতিয়া আমি একান্ত ভাবে বিচাৰিছো Fast Track, a special bench আদালত, য’ত daily basis ত কেৱল Zubeen Garg ৰ case ৰ শুনানি হওঁক,যাতে অতি সোনকালে জুবিন গাৰ্গে ন্যায় পায়!। নহ’লে ৩০০ তকৈ অধিক witness ৰ শুনানিত বহু বছৰ লাগিব, Justice delayed is Justice denied. চৰকাৰলৈ আৰু এটা বিশেষ অনুৰোধ যাতে এটা strong Public Prosecutor ৰ Team গঠন কৰি দিয়ে, য’ত জ্যেষ্ঠ অধিবক্তাও দুজনমান ( যাৰ ওপৰত ৰাইজৰ শ্ৰদ্ধা আৰু আস্থা আছে) থাকে as legal advisors আৰু টীমটো প্ৰয়োজনীয় man-power তথা logistics সা – সুবিধাৰে সবল কৰি দিয়ে,তেতিয়াহে ন্যায় প্ৰতিষ্ঠা জোৰদাৰ হ’ব। অভিজ্ঞ SIT team আৰু Public Prosecutors ৰ Team লগ লাগি Charge sheet খন যাতে সবল ভাবে, কোনো এজনো অভিযুক্ত সাৰি যোৱাৰ সুৰুঙা নথকাকে ন্যায়ালয়ত উপস্থাপন কৰি সঠিক আৰু শুদ্ধ ন্যায় প্ৰতিষ্ঠা কৰে .. এতিয়া সমগ্ৰৰ সেয়াই অপেক্ষা । জুবিন গাৰ্গে যদি ন্যায়ৰ পৰা বঞ্চিত হ’ব লগা হয়, তেন্তে আন জনগণৰ বাবে ন্যায় কি হʼব ?
ন্যায় ব্যৱস্থাৰ ওপৰত আমাৰ আস্থা আছে আৰু Bar Council আৰু সমূহ ৰাইজৰ সহযোগ বিচাৰিছো আমাৰ এই ন্যায় যাত্ৰাত
নগাঁও জিলাৰ(Nagaon News) জামুগুৰিস্থিত অগ্ৰণী শিক্ষানুষ্ঠান গুড গাইডেন্স একাডেমী বিদ্যালয়ৰ ৯ম বাৰ্ষিক প্ৰতিষ্ঠা দিৱসটি মঙলবাৰে দিনযোৰা কাৰ্যসূচীৰে বিদ্যালয় প্ৰাংগণত অনুষ্ঠিত হয়। এই উপলক্ষে বিদ্যালয় খনৰ শিক্ষাৰ্থী সকলে বিভিন্ন সাংস্কৃতিক অনুষ্ঠানত অংশগ্ৰহণ কৰে।
প্ৰচণ্ড শীতৰ মাজতে বিদ্যালয় খনৰ শিক্ষাৰ্থী সকলক সাংস্কৃতিক অনুষ্ঠান পৰিবেশনৰ উদ্দেশ্যেৰে ৰঙীন সাজ পোছকৰে বিদ্যালয় প্ৰাংগণত উপস্থিত হয়হি। দিনযোৰা কাৰ্যসূচীৰে অনুষ্ঠিত প্ৰতিষ্ঠা দিৱসৰ পুৱা পতাকা উত্তোলনৰ পাছতে অসমীয়াৰ প্ৰাণৰ শিল্পী জুবিন গাৰ্গক শ্ৰদ্ধাঞ্জলি জ্ঞাপন কৰা হয়।
