মহানগৰীৰ চচলত অসমৰ কৃষ্টি-সংস্কৃতিক সঠিক শুদ্ধ আৰু সুন্দৰ ৰূপত প্ৰতিষ্ঠাৰ লক্ষ্যৰে ২০০০ চনতে গঠিত হোৱা ওপৰ চচল বিহু সন্মিলনে অসমৰ তিনিওটা বিহু ৰঙালী, কঙালী আৰু ভোগালী সমান্তৰালভাৱে উদযাপন কৰি আহিছে। বিগত বৰ্ষ কেইটিৰ দৰে এইবাৰো চৌবিশ সংখ্যক ৰঙালী বিহু যোৱা ১ ব’হাগ (১৪ এপ্ৰিল) , ২৮ ব’হাগ (১১ মে’) আৰু ২৯ ব’হাগত (১২ মে’ ২০২৪) তিনিদিনীয়া বিস্তৃত কাৰ্য্যসূচীৰে উদযাপন কৰা হয় ৷ বয়োজ্যেষ্ঠ নাগৰিকক সম্বৰ্ধনা, সাংস্কৃতিক শোভাযাত্ৰা, মুকলি বিহু, পৰম্পৰাগত খেল-ধেমালী, কলৰ দোনাত বিহুৰ জলপান, সদৌ অসম ভিত্তিত চিত্ৰাংকন, আকস্মিক স্মৃতিপ্ৰভা, কুইজ প্ৰতিযোগিতা , একক আৰু দলীয় শাখাত সৃষ্টিশীল নৃত্য প্ৰতিযোগিতা, মৌ-কুঁৱৰী, বিহুৱতী আৰু বিহু হুঁচৰি প্ৰতিযোগিতা অনুষ্ঠিত হয় ৷ বিহু হুঁচৰি প্ৰতিযোগিতাত বৰলুইত বিহু হুচৰি দলে প্ৰথম আৰু মহাবাহু বিহু হুচৰি দলে দ্বিতীয় স্থান, বিহুৱতী প্ৰতিযোগিতাত দীপামণি বৰাই প্ৰথম আৰু কাৰ্জী কোঁচে দ্বিতীয় স্থান , মৌ-কুঁৱৰী প্ৰতিযোগিতাত কস্তুৰী শইকীয়াই প্ৰথম স্থান আৰু বিপাংশী শইকীয়াই দ্বিতীয় স্থান, একক লোক নৃত্য ক- শাখাত ৰিয়াংসী বৰুৱা, হিয়া কলিতা আৰু অনুশ্ৰী দাসে যথাক্ৰমে প্ৰথম,দ্বিতীয়, তৃতীয় স্থান আৰু খ-

শাখাত জোনমণি বৰা, দিচা বৰা আৰু মৃনাংগী বৰ্মণে ক্ৰমান্বয়ে প্ৰথম, দ্বিতীয়, তৃতীয় স্থান আৰু দলীয় লোকনৃত্য প্ৰতিযোগিতাত বৰদৈ চিখলা ডি ডি গ্ৰুপে প্ৰথম স্থান, মধুস্মিতা চহৰীয়াৰ দলে দ্বিতীয় আৰু মৰমী দলে তৃতীয় স্থান লাভ কৰে। চিত্ৰাংকন প্ৰতিযোগিতাৰ খ-শাখাত ময়ুৰদ্বীপ তালুকদাৰে প্ৰথম স্থান লাভ কৰে ৷ ২৮ ব’হাগৰ দিনা ৰাতিপুৱা ৯.৩০ বজাত মনোমোহা সাংস্কৃতিক শোভাযাত্ৰাৰে সভাপতি পৱন বুঢ়াগোহাঁইক বিহু তলিলৈ আদৰি আনে আৰু ইয়াৰ পিচতে বিহুৰ পতাকা উত্তোলন কৰে বৰগোহাঁয়ে ৷ স্মৃতি তৰ্পণ কৰে কাৰ্যকৰী সভাপতি কুমুদেশ্বৰ শৰ্মাই ৷ মুকলি বিহু আনুষ্ঠানিকভাৱে শুভ উদ্বোধন কৰে বৰ বিহুৱতী গ্ৰীনিজ বুক অৱ ৱৰ্ল্ড ৰেকৰ্ড বিহু অনুষ্ঠানৰ প্ৰশিক্ষীকা জাগৃতি কলিতাই ৷ উদ্বোধনী ভাষনত বিহুৱতী গৰাকীয়ে বিহু আৰু অসমৰ সংস্কৃতি বিষয়ক শ্ৰুতিমধুৰ বক্তৃতাৰে উপস্থিত সকলোকে আপ্লুত কৰে লগতে বিহু নৃত্য আৰু ঢোলৰ মালিতা প্ৰদৰ্শন কৰি উপস্থিত সকলোকে মন্ত্ৰমুগ্ধ কৰি তোলে ৷ ইয়াৰ পিচতেই দুটা দলে বিহু নৃত্য প্ৰদৰ্শন কৰি অনুষ্ঠানটো আকৰ্ষণীয় কৰি তোলে ৷ বিয়লি মঞ্চত কুইজ আৰু আকস্মিক স্মৃতিপ্ৰভা প্ৰতিযোগিতা অনুষ্ঠিত হয় ।এক বিশেষ স্মৃতিচাৰণ অনুষ্ঠান বিহু সমিতিৰ প্ৰাক্তন সভাপতি স্বৰ্গীয় সিদানন্দ শৰ্মা, নিলীমা গোস্বামী শৰ্মা, ফণীধৰ দাস, প্ৰাক্তন কাৰ্যকৰী সভাপতি লীলাকান্ত বৰা, প্ৰাক্তন স্মৰণীকা সম্পাদক শশীন্দ অধিকাৰী ,প্ৰাক্তন উপ-সভাপতি জবেদ আলী আৰু প্ৰতাপ চন্দ্ৰ বৰাৰ সোৱঁৰণত অনুষ্ঠিত হয় ৷ সন্ধিয়া ৭ বজাত অনুষ্ঠিত সাংস্কৃতিক সন্ধিয়া আনুষ্ঠানিকভাৱে শুভ উদ্বোধন কৰে বলিষ্ঠ অভিনেতা, পৰিচালক আৰু নাট্যকাৰ চম্পক শৰ্মাই ৷ চচলৰ মহিলাবৃন্দই পৰিৱেশন কৰা সমবেত সংগীতেৰে আৰম্ভ হোৱা সাংস্কৃতিক অনুষ্ঠানত স্থানীয় শিল্পীসকলে পৰিৱেশন কৰা সংগীতানুষ্ঠানে উপস্থিত সকলোকে মোহিত কৰে ৷ ইয়াৰ পিচতে সদৌ অসম ভিত্তিত একক লোকনৃত্য, দলীয় লোক নৃত্য, মৌ-কুঁৱৰী, বিহুৱতী আৰু হুচৰি প্ৰতিযোগিতা অনুষ্ঠিত হয় ৷ ৰাতিপুৱা ৮ বজালৈকে অনুষ্ঠিত এই প্ৰতিযোগিতাসমূহত অসমৰ বিভিন্ন জিলাৰ প্ৰতিযোগীয়ে যোগদান কৰে ৷

২৯ ব’হাগৰ দিনা সন্ধিয়া ৬ বাজি ৩০ মিনিটত ওপৰ চচল বিহু সন্মিলনৰ অন্যতম প্ৰতিষ্ঠাতা স্বৰ্গীয় ৰূপেশ্বৰ পাটৰৰ সোঁৱৰণত এক স্মৃতিচাৰণ অনুষ্ঠান অনুষ্ঠিত হয়। সন্ধিয়া ৭ বজাত সন্মিলনৰ স্মৃতিগ্ৰন্থ ‘ ব’হাগী ‘ আনুষ্ঠানিকভাৱে উন্মোচন কৰে বিশিষ্ট লিখক, কবি আৰু স্তম্ভ লিখক, সহকাৰী আৰক্ষী মহাপৰিদৰ্শক ড° নন্দ সিং বৰকলাই ৷ উন্মোচনী অনুষ্ঠানত বিশিষ্ট অতিথি হিচাপে উপস্থিত থাকে সাহিত্যিক থানেশ্বৰ মালাকাৰ আৰু গুৱাহাটী পৌৰ নিগমৰ পাৰিষদ অসীম কুমাৰ শইকীয়া ৷ সন্ধিয়া ৮ বজাত সাংস্কৃতিক সন্ধিয়া আনুষ্ঠানিকভাৱে শুভ উদ্বোধন কৰে বিশিষ্ট গীতিকাৰ, সুৰকাৰ সংগীত শিল্পী ৰসানন্দ গগৈয়ে ৷ শিল্পী গৰাকীৰ সুমধুৰ সংগীতে উপস্থিত সকলোকে মোহাচ্ছন্ন কৰি তোলে ৷ চচল মহিলা কৃষ্টি সমাজৰ আকৰ্ষণীয় জেং বিহু, বিহুৱতী প্ৰতিযোগিতাৰ প্ৰথম বিজয়ী দিপামণি বৰাৰ বিহুনৃত্য, ভোৰতাল নৃত্যশৈলীৰ আধাৰত সৃষ্টিশীল নৃত্য অনুষ্ঠান প্ৰদৰ্শন কৰি পৰিৱেশ্য কলাৰ প্ৰতিষ্ঠান নগাঁৱৰ সূত্ৰধাৰে উপস্থিত সকলোকে মন্ত্ৰমুগ্ধ কৰি তোলে ৷ ইয়াৰ পিচতে কনাই চুৰ বনাম চিচিংফাক কৌতুক গোষ্ঠীৰ হাঁহিৰ ঠুনপাক আৰু জনপ্ৰিয় শিল্পী ৰোহিত সোণাৰৰ সংগীতানুষ্ঠানে সাংস্কৃতিক সন্ধিয়াৰ মঞ্চ জীপাল কৰি তোলে ৷ তিনিদিনীয়া কাৰ্যসূচীৰ সফল সামৰণিৰ বাবে সাংস্কৃতিক সম্পাদক ধনঞ্জয় তালুকদাৰ আৰু পূৰ্ণকান্ত মহন্তই বিভিন্ন ক্ষেত্ৰত সহযোগিতা আগবঢ়োৱা সমূহ ৰাইজলৈ বিশেষ কৃতজ্ঞতা জ্ঞাপন কৰে ৷

শিল্পী জুবিন গাৰ্গলৈ কবিতা উপহাৰ

বিশ্বৰ এটি চিনাকি নাম সংগীত শিল্পী জুবিন গাৰ্গ । যাৰ সংগীতেৰে বিশ্ববাসীৰ মন পুলকিত কৰাৰ লগতে অসমৰ সন্তান হিচাপে আজিৰ যুৱপ্ৰজম্মৰ অন্তৰৰ শিৰাই শিৰাই যে জুবিন গাৰ্গ সোমাই পৰিছে সেইয়া এটা সংগীতানুষ্ঠানৰ পৰিৱেশ দেখিলেই বুজা যায় । তেনে এজন শিল্পীক ভাল পোৱা প্ৰতিদান হিচাপে , অন্তৰৰ গভীৰ কোনত জুবিন গাৰ্গ সোমাই পৰিছে বাবেই এজন ছাত্ৰ ই ৰচনা কৰিছে এটি সুন্দৰ কবিতা ” অসমীয়াৰ বজ্ৰ তুমি জুবিন ” ।

যুৱ প্ৰজন্মৰ হাৰ্টথ্ৰৱ মহান শিল্পী জুবিন গাৰ্গক ভাল পোৱাৰ প্ৰতিদান হিচাপে এটি কবিতা লিখি মনৰ ভাল পোৱা প্ৰকাশ কৰিলে মাজুলীৰ কমলাবাৰী অঞ্চলৰ মেধাৱী ছাত্ৰ ” সুৰুজুবিন বৰাই ” ।

সেই কবিতাটো ১২ মে’ত অনুষ্ঠিত হোৱা যোৰহাটৰ সাংস্কৃতিক কাৰ্যসুচীলৈ আহোতে প্ৰকৃতি প্ৰেমি তথা অৰ্কীড বয় সমীৰ ৰয় আৰু সমাজকৰ্মী জগন্নাথ অগ্নি বৰাই ছাত্ৰ জনৰ হৈ শিল্পী গৰাকীক অৰ্পণ কৰে । শিল্পী গৰাকীৰ জীৱনৰ বহু মূল্যৱান কথাই কবিতাটো প্ৰকাশ ঘটিছে বুলি জুবিন গাৰ্গে আনন্দ প্ৰকাশ কৰে

আই বজ্ৰাঙ্গী শিপিনী বঁটা প্ৰদান : বিশিষ্ট মহিলাক সন্মান

ভকতিৰ যোগেদি মানুহে নিজকে আত্মশুদ্ধি কৰিব লাগিব : সত্ৰাধিকাৰ মণি মাধৱ মহন্ত

মহাপুৰুষ শ্ৰীশ্ৰী গোপালদেৱৰ ৪১৩ সংখ্যক তিৰোভাৱ আৰু ৪৮৩ সংখ্যক আবিৰ্ভাব তিথি মহোৎসৱ ভাগ ১৩ মে’ত নাৰায়ণ ঠাকুৰ আঞ্চলিক শ্ৰীশ্ৰী গোপালদেৱ সমাজ দক্ষিণ নগাঁৱৰ উদ্যোগত বৰপাথৰি ঘূৰীয়াগাঁও ডৌকা চাপৰি সত্ৰত বৰ্ণাঢ্য কাৰ্য্যসুচীৰে উদযাপন হয় । অনুষ্ঠানত কালি পুৱা প্ৰাত:প্ৰসংগৰ পাছতেই ধৰ্মধ্বজা উত্তোলন কৰে গোপাল দেৱ সমাজৰ নাৰায়ন ঠাকুৰ আঞ্চলিকৰ সভাপতি ইন্দ্ৰমোহন গোস্বামীয়ে। তাৰ পাছতেই ভকত আদৰণিৰ পিছত দহঘৰীয়া সত্ৰৰ সত্ৰাধিকাৰ সত্ৰাধিকাৰ কমলাকান্ত মহন্তৰ প্ৰসংগ পৰিচালনাত মধ্যাহ্ন প্ৰসংগ অনুষ্ঠিত হয় । ইয়াৰ পিছতে সাজ বিতৰণ আৰু ভকত আপ্যায়ন কৰা হয় । বিয়লি ২ বজাত কমল চন্দ্ৰ শইকীয়াৰ সভাপতিত্বত মুকলি সভা আৰু বঁটা প্ৰদান অনুষ্ঠান সম্পন্ন হয় । মুকলি সভাৰ শুভাৰম্ভণি ঘটে ভাস্বতী গোস্বামীৰ বৰগীত পৰিবেশন আৰু ননৈৰ নৱমিলন শিল্পী সকলৰ দিহানাম পৰিবেশনেৰে ।

গোপালদেৱ সমাজৰ সম্পাদক তথা লেখক চেনাৰাম কলিতাই আদৰণি ভাষণ প্ৰদান কৰি সভাখনিত নগাঁও জিলা অগপৰ সভাপতি তথা সত্ৰাধিকাৰ মণি মাধৱ মহন্তই কয় যে মনুষ্য শৰীৰটো ভকতিৰ মন্দিৰ । ভকতিৰ যোগেদি মানুহে নিজকে আত্মশুদ্ধি কৰিব লাগিব । সত্ৰাধিকাৰ মহন্তই আৰু কয় যে গুৰু সকলে ধৰ্ম প্ৰচাৰ কৰাৰ সময়ত অৰ্থনৈতিক বুনিয়াদৰ ওপৰত গুৰুত্ব দিছিল । যাৰ বাবে মানুহক কৃষি কৰ্মৰ লগতে বস্ত্ৰৰ ক্ষেত্ৰটো গুৰুত্ব দিছিল । পৰাগমণি বৰাই আঁত ধৰা সভাখনিত শিক্ষাবিদ বুদ্ধেশ্বৰ বৰা, দীপক বৰা, জিতেন ৰাজখোৱা, পূৰ্ণ বৰা, ধ্ৰুৱজ্যোতি বৰা , জয়ন্ত বৰাকে বহুকেইজন বিশিষ্ট লোক উপস্থিত থাকে । উল্লেখযোগ্য যে উক্ত সভাতে অাই ব্ৰজাঙ্গী নিপুন শিপিনী বঁটা প্ৰথম গৰাকী শিপিনী ৰণথলী ৰজাভেঁটিৰ ৰুপী কলিতা, হাতীপাৰাৰ ৰানু বৰাক দ্বিতীয় আৰু উদগনি হিচাপে দেওধৰ গাঁৱৰ বিনু শইকীয়াক শিপিনী বঁটা প্ৰদান কৰা হয়।

এই বঁটাত নগদ ধন মানপত্ৰ আৰু স্মাৰক প্ৰদান কৰা হয়। আই ব্ৰজাঙ্গী শিপিনী বঁটা উপৰিও অঞ্চলটোৰ বিশিষ্ট মহিলা মাইকণ বৰা, তিলোপ্ৰভা বৰা, অনু বৰা ,নিৰুপমা গায়নকে ধৰি কেইবাগৰাকী মহিলাক সম্বৰ্ধনা জনোৱা হয়। সন্ধিয়ালৈ সমূহীয়া বন্তি প্ৰজ্বলনৰ পিছত ভক্তিমূলক গীত মাতৰ অনুষ্ঠান অনুষ্ঠিত হয় । অন্যহাতে ১৪ মে’ পুৱা প্ৰাত: প্ৰসংগৰ লগতে ধৰ্মীয় কাৰ্য্যসুচীৰ অন্তত বিয়লি ধৰ্মধ্বজা অবতৰণ, সন্ধ্যা বন্তি প্ৰজ্বলন, নিশালৈ বিশিষ্ট সমাজসেৱক উৎপল বণিয়াই উদ্বোধন কৰা সাংস্কৃতিক অনুষ্ঠানত জনপ্ৰিয় কণ্ঠশিল্পী অমৰজ্যোতি কাশ্যপ আৰু ৰাজশ্ৰী নন্দিনীৰ গীতৰ শৰাই পৰিবেশিত হয় ।