পুনৰ বহিঃৰাজ্যত মৃত্যু অসমৰ যুৱকৰ।
বিশাখাপট্টনমত মৃত্যু অসমৰ যুৱকৰ।
সোণাৰিৰ শুভংকৰ ভট্টচাৰ্য নামৰ যুৱকজনৰ মৃত্যু বিশাখাপট্টনমত।
কৰ্মসংস্থাপনৰ সন্ধানত ৩ মাহৰ পূৰ্বে বিশাখাপট্টনমলৈ গৈছিল শুভংকৰ।
সোণাৰিৰ সমীপৰ হিঙৰিতলী গঞ্জুপাৰা গাঁৱৰ বাসিন্দা শুভংকৰ।
মিঞাৰ ওপৰত চলা নিৰ্যাতন সহ্য কৰা নহ’ব বুলি হুংকাৰ এআইডিইউএফৰ
মুখ্যমন্ত্ৰীৰ মুছলমান বিৰোধী মন্তব্যৰ প্ৰতিবাদত ৰাজপথত জোৰ সমদল এআইডিইউএফৰ।
নিৰ্বাচনৰ দিন চমু চাপি অহাৰ লগে লগে ৰাজ্যৰ ৰাজনীতি যেন ক্ৰমাত গৰম হৈ পৰিছে।
সোমবাৰে মৈৰাবাৰীৰ ৰাজপথত নামিল এআইডিইউএফ দল।
হিমন্ত বিশ্ব শৰ্মা মুৰ্দাবাদ, বিজেপি মুৰ্দাবাদ বুলি ধ্বনি দিলে দলীয় কৰ্মী সকলে।
নগাঁও আৰু মৰিগাঁও জিলাৰ এআইডিইউএফ দলৰ যৌথ উদ্যোগত জোৰ সমদল উলিওৱা বুলি জানিব পৰা যায়।
জোৰ সমদলৰ নেতৃত্ব দিয়ে বিধায়ক আমিনুল ইছলামে।
লগতে উপস্থিত থাকে ধিং সমষ্টিৰ এআইডিইউএফ দলৰ প্ৰাৰ্থীত্ব প্ৰত্যাশী মতিউৰ ৰহমান আৰু লাহৰীঘাট সমষ্টিৰ ছিদ্দিক আহমেদ।
ৰাজেন গোহাঁই মোৰ ৰাজনৈতিক গুৰু – বিধায়ক জিতু গোস্বামী
নগাঁও জিলাৰ বঢ়মপুৰ সমষ্টিৰ শগুণবাহী আৰু লুংচুং চাহ বাগিছাত প্ৰায় ২৭০০ গৰাকী চাহ শ্ৰমিকক এটি কলি দুটি পাত আঁচনিৰ জড়িয়তে পাঁচ হাজাৰ টকাকৈ চেক বিতৰণ কৰে বঢ়মপুৰ সমষ্টিৰ বিধায়ক জিতু গোস্বামীয়ে।শগুণবাহী চাহ বাগিছাৰ পূজা মণ্ডপ আৰু লুংচুং চাহ বাগিছাৰ পূজা মণ্ডপত অনুষ্ঠিত হোৱা দুখনকৈ ৰাজহুৱা সভাত চেক বিতৰণ কৰে বিধায়ক গৰাকীয়ে।দুয়োখন সভাতে বিধায়ক গৰাকীয়ে দুশ বছৰীয়া চাহ উদ্যোগৰ শ্ৰমিক সকলক বিজেপি চৰকাৰ খনে কেনেদৰে উপকৃত কৰিছে উল্লেখ কৰাৰ লগতে চাহ শ্ৰমিক সকলক মাটিৰ পট্টা দিয়াৰ ব্যৱস্থা কৰিছে বুলি উল্লেখ কৰে।
ইফালে লুংচুং চাহ বাগিছাৰ চেক বিতৰণ অনুষ্ঠানত বিধায়ক গৰাকীয়ে সাংবাদিকৰ প্ৰশ্নৰ উত্তৰত কয় আগন্তুক বিধানসভা নিৰ্বাচনত বঢ়মপুৰ সমষ্টিত বিজেপিয়ে খেলাটো নিশ্চিত।ইফালে অসম জাতীয় পৰিষদৰ পৰা প্ৰাক্তন সাংসদ ৰাজেন গোহাঁইয়ে প্ৰতিদ্বন্দ্বিতা আগবঢ়াব বুলি সাংবাদিকৰ আন এক প্ৰশ্নৰ উত্তৰত বিধায়ক গৰাকীয়ে কয় ৰাজেন গোহাঁই মোৰ ৰাজনৈতিক গুৰু যদিও ৰাজনীতিৰ ক্ষেত্ৰত এইটো ব্যতিক্ৰম। ৰাজনীতিত কোনো শত্ৰু নাই কোনো মিত্ৰ নাই।ইফালে কংগ্ৰেছ আৰু অখিল গগৈৰ সন্দৰ্ভত বিধায়ক গৰাকীয়ে কয় কংগ্ৰেছ আৰু অখিল গগৈয়ে কমিচন থকা আঁচনি লয়। তেওঁ লোকে সকলো আঁচনি বন্ধ কৰাটো বিচাৰে বুলি উল্লেখ কৰে। তেওঁ লোক মুংগিৰলাল কা হাচিন চৰকাৰ বুলি উল্লেখ কৰে।আজিৰ শগুণবাহী আৰু লুংচুং চাহ বাগিছাৰ এতি কলি দুটি পাতৰ চেক বিতৰণ অনুষ্ঠানত শ্ৰম বিভাগৰ বিষয়া কৰ্মচাৰীৰ লগতে কলিয়াবৰ জিলা বিজেপিৰ সভাপতি বাবুল বৰা, সাধাৰণ সম্পাদক অৰবিন্দ চৌধুৰী,তিৱা কাউন্সিলৰ অধ্যক্ষ মদন বৰদলৈ কেইবাগৰাকীও চাহ জনজাতি নেতা ,বাগিচা সমূহৰ পৰিচালক সকল উপস্থিত থকাৰ লগতে দুয়োখন সভা তিনি সহস্ৰাধিক পুৰুষ মহিলা উপস্থিত থাকে।আজি মুখ্যমন্ত্ৰী ডঃ হিমন্ত বিশ্ব শৰ্মাই এটি কলি দুটি পাতৰ চেক বিতৰণ কৰাৰ সমান্তৰালকৈ বঢ়মপুৰ সমষ্টিৰ চাহ বাগিচা সমূহৰ চেক সমূহ বিতৰণ কৰা হয়। উল্লেখযোগ্য যে ৰাজ্যৰ চাহ বাগিছা সমূহৰ ৬ লাখৰো অধিক শ্ৰমিক কৰ্মচাৰীক এই আঁচনিৰ অন্তৰ্ভুক্ত কৰি মুঠ ৩০২ কোটি টকা মুকলি কৰি দিছে ৰাজ্য চৰকাৰে।
গহপুৰ ৰে’ল ষ্টেচনত দূৰগামী ৰেলসমূহৰ নিয়মিত ষ্ট’পেজ প্রদানৰ দাবীত আৰু গহপুৰ ৰেল ষ্টেচনটোলৈ যোৱা মূল পথতোৰ নির্মাণৰ দাবী ৰেল মন্ত্ৰীলৈ স্মাৰক পত্র প্ৰেৰন ।
গহপুৰ মহকুমা ছাত্ৰ সন্থাৰ উদ্যোগত আজি বিক্ষোভ কাৰ্য্যসূচী গ্ৰহন কৰা হয় ৷ গহপুৰ ষ্টেচনত অধিকাংশ দূৰগামী ৰেলৰ নিয়মিত ষ্টপেজৰ ব্যবস্থা নাই, যাৰ ফলত অৰুণাচল প্রদেশ আৰু পাশ্ববর্তী বহু গাঁও অঞ্চলৰ লক্ষাধিক ৰাইজৰ যাতায়াতৰ ক্ষেত্ৰত দুর্ভোগ ভূগি আহিছে। গহপুৰ ষ্টেচনদি পাৰ হৈ যোৱা দূৰগামী ৰেলসমূহত ষ্টপেজ নিদিয়াৰ ফলত অঞ্চলটোৰ ছাত্র-ছাত্রী, চাকৰিয়াল, ব্যবসায়ী, ৰোগীৰ অসুবিধাৰ সৃষ্টি হৈছে। ৰেল ধৰিবলৈ তেওঁলোকক বহু দূৰৰ অন্য ষ্টেচনলৈ যাবলগীয়া হয়, যাৰ ফলত-অতিৰিক্ত আর্থিক ব্যয় বৃদ্ধি হয় ৷ সময়ৰ অপচয় হৈছে চিকিৎসা আৰু শিক্ষাৰ ক্ষেত্ৰত জৰুৰী যাতায়াত ব্যাহত হৈছে অঞ্চলটোৰ বাণিজ্যিক সম্ভাবনাও বাধাগ্রস্ত হৈছে। গহপুৰ এখন ঘনবসতিপূর্ণ অঞ্চল লগতে অসম-অৰুণাচল প্ৰদেশৰ সীমান্তৱর্তী অঞ্চল, ইয়াত কেইবাখনো উচ্চশিক্ষা প্রতিষ্ঠান, নির্মিয়মান কনকলতা বিশ্ববিদ্যালয়, বজাৰ-কেন্দ্ৰ আৰু প্রশাসনিক কার্যালয় অবস্থিত। দৈনিক বহু সংখ্যক যাত্রীয়ে এই পথ ব্যৱহাৰ কৰে। স্থানীয় যাত্ৰীৰ সংখ্যা আৰু সামাজিক-আর্থিক গুৰুত্বৰ দিশৰ পৰা গহপুৰ ষ্টেচনত দূৰগামী ৰেলৰ ষ্টপেজ যুক্তিসংগত আৰু অত্যাবশ্যক বুলি কয় ৷
ইয়াৰ উপৰিও, এইটো নতুন দাবী নহয় বুলি জানিবলৈ দিয়ে। বহু বছৰ ধৰি স্থানীয় ৰাইজ, বিভিন্ন সংগঠন আৰু ছাত্র সন্থাই বিভাগীয় কর্তৃপক্ষৰ ওচৰত এই বিষয়ত দাবী জনাই আহিছে। একাধিকবাৰ আবেদন আৰু স্মাৰক পত্র দাখিল কৰাৰ পিছতো বিষয়টোত প্রয়োজনীয় গুৰুত্ব প্রদান কৰা হোৱা নাই বুলিও দুখ প্রকাশ কৰে। ৰাইজৰ দীর্ঘদিনীয়া ন্যায্য দাবীৰ প্রতি সহানুভূতিশীল হৈ গহপুৰ ৰেল ষ্টেচনত দূৰগামী ৰেলসমূহৰ অন্ততঃ আংশিক হলেও নিয়মিত ষ্টপেজৰ ব্যৱস্থা শীঘ্রে গ্রহণ কৰিবলৈ দাবী জনায় । লগতে গহপুৰ ৰেল ষ্টেচনলৈ যোৱা মূল পথতোৰ অৱস্থা অত্যন্ত সূচনীয় যাৰ ফলত বিভিন্ন ঘটনা হৈ আহিছে সেইয়ে অতি সোনকালে এই মূল পথতো নিৰ্মাণৰ কাৰণে স্মাৰক পত্ৰৰ জৰিয়তে দাবী জনায়। অতি শীঘ্রে তেওলোকৰ দাবী সমূহ পুৰন নকৰিলে পুনৰ এটা মাহৰ পিছত গণতান্ত্রিক ভাবে কঠোৰ আন্দোলন কৰিব বুলিও জানিবলৈ দিয়ে ৷
নিতুল বৰা গহপুৰ।
তিনিচুকীয়াৰ বাহাদুৰ চাৰিআলিত ডাম্পাৰৰ খুন্দাত যুৱতীৰ মৃত্যুপথ অৱৰোধেৰে ৰাজপথ উত্তাল কৰিলে স্থানীয় ৰাইজে
পুৱাই বৰডুবি থানাৰ অধীনৰ বাহাদুৰ চাৰিআলিত সংঘটিত এক পথ দুৰ্ঘটনাত এগৰাকী ২২ বছৰীয়া যুৱতীয়ে কৰুণভাৱে থিতাতে মৃত্যুক আকোৱালী লবলগীয়া হোৱা ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি হয় ৷ জানিব পৰা মতে মাটি কঢ়িওৱা এখন ডাম্পাৰে যুৱতী গৰাকীক মহতিয়াই নিয়াৰ ফলত ঘটনাস্থলীতে নিহত হয় ৷
ঘটনাৰ বিৱৰণী অনুসৰি পুৱা প্ৰায় ৮:৩০ বজাত এ এছ ০৬ এ চি ৪৫৪৯ নম্বৰৰ মাটিভৰ্তি ডাম্পাৰখন চাৰিআলি চাহ বাগিচাৰ পৰা বাহাদুৰ চাৰিআলি বজাৰ দিশে আহি থাকোতে বাইচাইকেলেৰে আহি থকা দীপালী মুণ্ডা নামৰ যুৱতীগৰাকীক পিছফালৰ পৰা সজোৰে খুন্দা মৰাত তেওঁ মৃত্যুক আকোৱালী লয় ৷ উক্ত ঘটনাৰ পাছতেই উত্তেজিত হৈ পৰা স্থানীয় ৰাইজে বাহাদুৰ চাৰিআলিত সমবেত হৈ তিনিচুকীয়া-দুলিয়াজান পথচোৱা দীৰ্ঘসময় ধৰি অৱৰোধ কৰি উত্তাল প্ৰতিবাদ সাৱ্যস্ত কৰে । ৰাইজে দুৰ্ঘটনাটোত জড়িত ডাম্পাৰখনৰ লগতে চালকজনক ধৰি আৰক্ষীক চমজাই দিয়াৰ লগতে ঘটনাৰ উচিত তদন্ত আৰু ন্যায়ৰ দাবী জনায় ৷ অৱৰোধৰ ফলত পথচোৱাৰে যান-বাহনৰ চলাচল সম্পূৰ্ণৰূপে বন্ধ হৈ পৰে । পাছত ঘটনাস্থলীত তিনিচুকীয়া আৰক্ষীৰ উচ্চপদস্থ বিষয়া উপস্থিত হৈ পৰিস্থিতি নিয়ন্ত্ৰণ কৰে । স্থানীয় ৰাইজে অভিযোগ কৰা অনুসৰি সুদীৰ্ঘ দিন ধৰি বৰডুবি থানা এলেকাত আৰক্ষীৰ নাকৰ তলেদি অবৈধভাৱে মাটি খনন আৰু সৰবৰাহ অব্যাহত আছে । যাৰফলত অঞ্চলটোত ডাম্পাৰৰ দৌৰাত্ম দিনক দিনে বৃদ্ধি পাইছে ৷ এই বিষয়ত ৰাইজৰ লগতে আদিবাসী ছাত্ৰ সন্থাই বৰডুবি আৰক্ষীক কেইবাবাৰো লিখিত অভিযোগ দাখিল কৰিছিল যদিও আৰক্ষীয়ে কোনো উপযুক্ত ব্যৱস্থা গ্ৰহণ কৰা নাই বুলিও অভিযোগ কৰিছে৷ফলত আজিৰ এই শোকাৱহ পথ দুৰ্ঘটনা সংঘটিত হ’বলৈ পালে বুলি স্থানীয় ৰাইজে প্ৰতিবাদস্থলীত উল্লেখ কৰে৷ ক্ষোভিত ৰাইজে পথ অৱৰোধৰ জৰিয়তে অঞ্চলটোত মাটিৰ অবৈধ খনন বন্ধ কৰাৰ দাবী তোলাৰ লগতে মৃত যুৱতীগৰাকীৰ নিকটাত্মীয়ক বিশ লাখ টকাৰ ক্ষতিপূৰণৰ দাবী তুলি ডাম্পাৰখনৰ চালক আৰু ইয়াৰ গৰাকীৰ বিৰুদ্ধে কঠোৰ শাস্তিমূলক ব্যৱস্থা গ্ৰহণৰো দাবী জনায়। ইফালে অৱৰোধথলীত উপস্থিত হোৱা প্ৰশাসনিক বিষয়াক আদিবাসী ছাত্ৰ সন্থাই এক দাবী সম্বলিত স্মাৰক-পত্ৰ প্ৰদান কৰি ইয়াৰ বিহিত ব্যৱস্থা গ্ৰহণৰ দাবী জনায়।
তামুলপুৰৰ লতিবাৰীত বিটিচিৰ মনোনীত পাৰিষদ হেমপ্ৰভা দেৱীক বিপুল সম্বৰ্ধনা
তামুলপুৰ জিলাৰ লতিবাৰীৰ জাজিকোণাত আজি বিটিচিৰ মনোনীত পাৰিষদ হেমপ্ৰভা দেৱীক স্থানীয় ৰাইজৰ লগতে বিভিন্ন দল সংগঠনৰ দ্বাৰা বিপুল সম্বৰ্ধনা জনোৱা হয় ৷ স্থানীয় জ্যেষ্ঠ নাগৰিক ভগী কলিতাৰ সভাপতিত্বত অনুষ্ঠিত সম্বৰ্ধনা সভাখনৰ আঁতধৰে দুলাল পাটোৱাৰীয়ে ৷ সম্বৰ্ধনা সভাত অংশগ্ৰহণ কৰি কোকৰাঝাৰ লোকসভা সমষ্টিৰ প্ৰাক্তন সাংসদ নৱ কুমাৰ শৰণীয়াই বিটিচিৰ মনোনীত পাৰিষদ হেমপ্ৰভা দেৱীৰ শৈশৱৰ পৰা সংগ্ৰাম কৰি অভিজ্ঞতা সঞ্চয় কৰি নিজে এজন উদ্যমী মহিলা হিচাপে প্ৰতিষ্ঠা লাভ কৰিছে ৷
উদ্যোগৰ ক্ষেত্ৰত যথেষ্ট অভিজ্ঞতা পুষ্ট হেমপ্ৰভা দেৱীক তেওঁ মহিলা সবলীকৰণৰ জৰিয়তে মহিলা সকলক আগবঢ়াই লৈ যাবলৈ সভাত আহ্বান জনায় ৷ শতাধিক পুৰুষ মহিলাই অংশগ্ৰহণ কৰা সম্বৰ্ধনা সভাত বিপিএফৰ যুৱ নেতা দীগন্ত বেজবৰুৱা,স্থানীয় উদ্যোগী ভৱেন কলিতা,প্ৰসন্ন মেধি আদিয়েও বক্তব্য আগবঢ়ায় ৷ আজিৰ সভাখনত নাগ্ৰীজুলি ব্লক বিপিএফৰ সভাপতি ৰাজু দাস,যুৱ নেতা নৱ কলিতা,কুশল দাস,অনুপম ভৰালী প্ৰমুখ্যে বহুসংখ্যক জ্যেষ্ঠ নাগৰিকেও অংশগ্ৰহণ কৰে ৷
মধ্য অসম কোচ ৰাজবংশী ছাত্ৰ সন্থাৰ উদ্যোগত চিলাৰায় দিৱস উদযাপন । কোচ ৰাজবংশীক বিধানসভা নিৰ্বাচনৰ আগতে জনজাতিকৰণৰ দাবী
অসম বিধানসভাৰ নিৰ্বাচনৰ আগতে অসমৰ কোচ ৰাজবংশী সকলক জনজাতিকৰণৰ মৰ্যদা দিব লাগিব। অন্যথা কোচ ৰাজবংশী সকলে ব্যাপক গণ আন্দোলন গঢ়ি তুলিব। আজি নগাঁও শ্বহীদ ভবনত মধ্য অসম কোচ ৰাজবংশী ছাত্ৰ সন্থাৰ উদ্যোগত অনুষ্ঠিত বিশ্ব মহাবীৰ চিলাৰায়ৰ ৫১৬ সংখ্যক জন্ম জয়ন্তী উৎসৱৰ মুকলি সভাত এই ঘোষণা কৰে মধ্য অসম কোচ ৰাজবংশী ছাত্ৰ সন্থাই। সন্থাৰ নেতৃত্বই মন্তব্য কৰে যে কোচ ৰাজবংশীকে ধৰি অসমৰ ছয় জনগোষ্ঠীক জনজাতীয় কৰণৰ নামত কেন্দ্ৰীয় আৰু ৰাজ্য চৰকাৰে প্ৰতাৰণা কৰি আহিছে। এইবাৰ চৰকাৰক তেনে সুযোগ দিয়া নহব বুলি মন্তব্য কৰি সন্থাৰ সভাপতি পৰেশ চন্দ্ৰ ডেকাই কয় যে বিধানসভা নিৰ্বাচনৰ আগতে আমাক জনজাতিকৰণৰ মৰ্যাদা লাগিব। আজি পুৱা পতাকা উত্তোলনৰে চিলাৰায় দিৱসৰ শুভাৰম্ভ কৰে মধ্য অসম কোচ ৰাজবংশী ছাত্র সন্থাৰ সভাপতি পৰেশ চন্দ্ৰ ডেকাই।
মধ্য অসম কোত ৰাজবংশী উন্নয়ন প্ৰাধিকৰণ দাবী সমিতিৰ পতাকা উত্তোলন কৰে সভাপতি হেমকান্ত ডেকাই। চিলাৰায় প্ৰতিমুৰ্তিত মাল্যপ্ৰদান কৰে চিলাৰায় দিৱস উদযাপন সমিতিৰ সভাপতি বিৰিঞ্চি কাশ্যপ বৰাই। শ্বহীদ বেদীত পুস্পাঞ্জলি অৰ্পন কৰে মধ্য অসম কোচ ৰাজবংশী ছাত্ৰ সন্থাৰ সাধাৰণ সম্পাদক ৰাতুল কুমাৰ ৰাজবংশীয়ে। উদযাপন সমিতিৰ সম্পাদক বিশাল বৰাই বৃক্ষ ৰোপন কাৰ্যসূচীৰ শুভাৰম্ভ কৰে। বিয়লি সন্থাৰ সভাপতি পৰেশ চন্দ্ৰ ডেকাৰ সভাপতিত্বত অনুষ্ঠিত মুকলি সভাত নিৰ্দিষ্ট বক্তা হিচাপে অংশগ্ৰহণ কৰি অৱসৰপ্ৰাপ্ত অধ্যাপক মোহিনী মোহন ডেকাই বীৰ চিলাৰায়ৰ জীৱন দৰ্শনৰ ওপৰত এক মননশীল ভাষণ প্ৰদান কৰি কয় যে চিলাৰায় এগৰাকী যুগনায়ক আছিল। তেওঁৰ দুৰদৰ্শী দৃষ্টিভংগী অতুলনীয় আৰু মনকৰিবলগীয়া। ডেকাই ভাষণ প্ৰসঙ্গত নৱ প্ৰজন্মক চিলাৰায়ৰ আদৰ্শক অনুকৰণ কৰিবলৈ আহ্বান জনায়। সভাত মুখ্য অতিথিৰ ভাষণত প্ৰাক্তন বিধায়ক ডা: দুৰ্লভ চমুৱাই বীৰ চিলাৰায় আৰু কোচ ৰাজবংশী সকলৰ ইতিহাস ব্যাখ্যা কৰি কয় যে চিলাৰায়ৰ দৃষ্টিভংগী দুৰদৰ্শী আৰু সবল আছিল। অসমৰ সকলো খিলঞ্জীয়া জাতি- জনগোষ্ঠীৰ সুৰক্ষিত ভবিষ্যতৰ স্বাৰ্থত অসমত আন্তঃৰাজ্যিক পাৰপত্ৰ ব্যৱস্থা প্ৰৱৰ্তন কৰিবলৈ ডা : চমুৱাই দাবী জনাই। সন্থাৰ সাধাৰণ সম্পাদক ৰাতুল কুমাৰ ৰাজবংশীয়ে আতধৰা সভাত অসম জাতীয়তাবাদী যুৱ – ছাত্ৰ পৰিষদৰ নগাঁও জিলা সমিতিৰ সভাপতি প্ৰবাল শৰ্মা ,যুৱ সমাজকৰ্মী উদিপ্ত নাৰায়ণ ৰাজা , জেষ্ঠ সাংবাদিক কনক হাজৰিকা , সমাজকৰ্মী অনুপ লস্কৰ , নগাঁও জিলা চুতীয়া যুৱ সন্মিলনীৰ সভাপতি মুন কাকতি , সম্পাদক পংকজ বৰা, সদৌ নগাঁও জিলা টাই আহোম ছাত্ৰ সন্থাৰ সভাপতি ফণীন্দ্ৰ গগৈ ,আক্ৰাছুৰ উপসভাপতি দিলীপ ডেকা আদিয়ে ভাষণ প্ৰদান কৰে। আদৰণি সমিতিৰ সভাপতি বিৰিঞ্চি কাশ্যপ বৰাই আদৰণি ভাষণ প্ৰদান কৰা সভাত কোচৰাজবংশীৰ শিল্পী সকলে নৃত্য গীত পৰিবেশন কৰে। সভাতেই সন্থাৰ তৰফৰ পৰা মধু বৰাক চিলাৰায় সমন্বয় বটা আৰু ড: কেশৱ বৰাক চিলাৰায় সাহিত্যিক বটা প্ৰদান কৰা হয়। সভাত নগাঁৱৰ জেষ্ঠ সাংবাদিক জীতেন বৰকটকী ,কনক হাজৰিকা ,পলাশ প্ৰতীম হাজৰিকা , ভাস্কৰ জ্যোতি শইকীয়া , তপন কুমাৰ বৰা ,বীৰেণ বৰা ,জ্যোতিপ্ৰসাদ বৰা ,ভাৰ্গৱ হাজৰিকাক বিশেষ ভাবে সম্বৰ্ধনা জনোৱা হয়।
সাংবাদিক কৃষ্ণকান্ত মেদকৰ নৱতম গ্ৰন্থ “জীৱনৰ ৰং বিচাৰি “শীৰ্ষক গ্ৰন্থ উন্মোচন
বৃহত্তৰ গোগামুখ প্ৰেছ ক্লাবৰ উদ্যোগত ধেমাজি জিলাৰ গোগামুখস্থিত আগম মিগাং নাহেন্দ্ৰ পাদুন পুথিভঁৰাল প্ৰেক্ষাগৃহত সাংবাদিক-লেখক, বৃহত্তৰ গোগামুখ প্ৰেছ ক্লাবৰ পত্ৰিকা সম্পাদক কৃষ্ণকান্ত মেদকৰ নৱতম গ্ৰন্থ “জীৱনৰ ৰং বিচাৰি” শীৰ্ষক গ্ৰন্থ উন্মোচন কৰে অসম চৰকাৰৰ সাহিত্যিক পেন্সনাৰ তথা মিচিং আগম কৗবাঙৰ প্ৰাক্তন সচিব কালিনাথ পাংগিঙে উন্মোচন কৰে। বৃহত্তৰ গোগামুখ প্ৰেছ ক্লাবৰ সদস্য তথা সাংবাদিক জিন্টু বৰাই আতঁধৰা অনুষ্ঠানত বিশিষ্ট লেখক -সমালোচক ইউনাইটেড বেংক অব ইণ্ডিয়াৰ অৱসৰপ্ৰাপ্ত শাখা প্ৰৱন্ধক জাতিৰাম কামানে সভাপতিত্ব কৰা গ্ৰন্থ উন্মোচনী সভাত কালিনাথ পাংগিঙে জীৱনৰ ৰং বিচাৰি গ্ৰন্থখন উন্মোচন কৰি কয় যে বৰ্তমানৰ আধুনিক প্ৰযুক্তিবিদ্যাৰ যুগত ডিজিটেলেও কিতাপ পঢ়াৰ মাদকতা ম্লান কৰিব নোৱাৰে।
যিহেতু কিতাপ পঢ়াৰ মাদকতা সুকীয়া মাত্ৰা প্ৰদান কৰি আহিছে। উদীয়মান যুৱ লেখক কৃষ্ণকান্ত মেদকৰ নৱতম গ্ৰন্থ জীৱনৰ ৰং বিচাৰি গ্ৰন্থখনত সন্নিৱিষ্ট কৰা প্ৰতিটো বিষয় সমাজ সংস্কৃতিক প্ৰতিনিধিত্ব কৰিছে বুলি কয়। ইয়াৰ পিছত অৱসৰপ্ৰাপ্ত প্ৰধান শিক্ষক তথা বিশিষ্ট লেখক টুনিৰাম মেদকে জীৱনৰ ৰং বিচাৰি গ্ৰন্থখনৰ স্ৰষ্টা কৃষ্ণকান্ত মেদকৰ জীৱন বৃত্তান্তৰ ওপৰত আলোকপাত কৰি উদীয়মান যুৱ লেখক গৰাকীলৈ প্ৰেৰণা মূলক বক্তব্যৰে বক্তব্য সামৰে। ইয়াৰ পিছত মিচিং জনগোষ্ঠীৰ প্ৰথম গ্ৰামাফোন ৰেকৰ্ডত গীত গোৱা দগনৗ নি:তম ৰীতা দেৱী মেদক জীৱনৰ ৰং বিচাৰি গ্ৰন্থখনত সন্নিৱিষ্ট কৰা মিচিং গাঁৱত ব’হাগ বিহুৰ পৰম্পৰাগ শীৰ্ষক লেখাৰ ওপৰত বিস্তৃত ভাবে আলোকপাত কৰি কয় যে লেখকে উপস্থাপন কৰা প্ৰতিটো বিষয় চহা জীৱনৰ পৰম্পৰাগত ৰীতি-নীতি সুন্দৰকৈ প্ৰকাশ পাইছে।
বিশিষ্ট লেখক কৃতি শিক্ষক, মিচিং আগম কৗবাঙৰ প্ৰাক্তন কোষাধ্যক্ষ ভৱ দলে, যুৱ লেখক, সোৱণশিৰি মহাবিদ্যালয়ৰ গণিত বিভাগৰ সহকাৰী অধ্যাপক দুষ্যন্ত নৰহে গ্ৰন্থ প্ৰকাশক, পঢ়ুৱৈ সমাজৰ মধুৰ সম্পৰ্কৰ বিষয়ে কয় আৰু উদীয়মান যুৱ লেখক কৃষ্ণকান্ত মেদকে জীৱনৰ ৰং বিচাৰি গ্ৰন্থখনত অতি সহজ সৰল ভাষাত পঢ়ুৱৈ সমাজে বুজি পোৱাকৈ নিখুঁতভাবে প্ৰতিটো বিষয় বৰ্ণনা কৰি গৈছে বুলি কয়। জীৱনৰ ৰং বিচাৰি গ্ৰন্থখন পঢ়ুৱৈ সমাজে সাদৰি ল’ব বুলি আশা প্ৰকাশ কৰে লেখক কৃষ্ণকান্ত মেদকে। গ্ৰন্থ উন্মোচনী সভাৰ সভাপতি জাতি ৰাম কামানে কয় যে জীৱনৰ ৰং বিচাৰি গ্ৰন্থখনত সঁচাকৈ জীৱনৰ ৰং বিচাৰি পাব বুলি কয় বক্তব্য সামৰে।
সভাত উপস্থিত থাকে বিশিষ্ট কবি মুহিৰাম পেগু, লেখক ৰামেশ্বৰ মেদক,সদৌ অসম ছাত্ৰ সন্থা ধেমাজি জিলা সমিতিৰ উপ সভাপতি ঋতুপৰ্ণ কোচ, গোগামুখৰ যুৱ সমাজ সেৱক দীপক বৰগোহাঁই, অৱনৰি বাংকে আগম কৗবাঙৰ সম্পাদক ৰাজকুমাৰ চিন্তে, বিল্লাম অৱনৰি বাংকে আগম কৗবাঙৰ সভাপতি ৰাহুল নৰহ ,লখিমপুৰ জিলা সমিতিৰ টি এম পি কে সদস্য ইন্দ্ৰেশ্বৰ কামান, অসম চৰকাৰৰ যুৱ লেখক সন্মান প্ৰাপক কল্পজিৎ সোণোৱাল, অসম চৰকাৰৰ যুৱ লেখক সন্মান প্ৰাপক পৱিত্ৰ পাংগিং, যুৱ কবি হিতেশ্বৰ কুলি, দকচিৰি ই-মেগাজিনৰ সম্পাদক তথা অসম চৰকাৰৰ যুৱ লেখক সন্মান প্ৰাপক তপনলাল, অসম চৰকাৰৰ যুৱ লেখক সন্মান প্ৰাপক অনুভৱপ্ৰিয়ম মিৰি, চন্দ্ৰজ্যোতি দলে, বিশ্বজিৎ গগৈ, অনাতাঁৰ শিল্পী বনমালি পাঞাং, কুঞ্জলতা মেদক,জুনুকুমাৰী মেদক,জ্যোতিকা মেদক, আপ্পুন মেদক দৈমাৰী,কৰমী পাঞাং মেদক,কনেং মেদক, আদিৰ লগতে বৃহত্তৰ গোগামুখ প্ৰেছ ক্লাবৰ সম্পাদক জিতু কুমাৰ ৰাজকোঁৱৰ, জ্যেষ্ঠ সাংবাদিক ভৱেন কোঁৱৰ, প্ৰথম খবৰৰ সাংবাদিক প্ৰবীণ মেদক,DA News Plus সাংবাদিক প্ৰমোদ টাইদ,Nktvৰ সাংবাদিক লোচন দাস আদিৰ লগতে বিশিষ্ট ব্যক্তি।
সোণাপুৰৰ জুবিন ক্ষেত্ৰত শিৱ সাধক লেখক পৰশুৰাম কাকতিৰ গ্ৰন্থ উন্মোচন
সোণাপুৰস্থিত জুবিন ক্ষেত্ৰত আজি শিৱ সাধক তথা লেখক পৰশুৰাম কাকতিৰ নতুন গ্ৰন্থ “মোৰ কোনো জাতি নাই, মোৰ কোনো ধৰ্ম নাই, মোৰ কোনো ভগৱান নাই, মই মুক্ত” শীৰ্ষক গ্ৰন্থখন আনুষ্ঠানিকভাৱে উন্মোচন কৰা হয়। গ্ৰন্থখন উন্মোচন কৰে চি জে এম আদালতৰ অৱসৰপ্ৰাপ্ত প্ৰশাসনিক বিষয়া অমৃত পাঠকে।
উন্মোচনী অনুষ্ঠানত অৱসৰী শিক্ষক কল্যাণ চন্দ্ৰ ভট্টাচাৰ্য, জুবিন ক্ষেত্ৰলৈ অহা অনুৰাগীসকলক বিনামূলীয়াকৈ লাৰু-পিঠা আৰু চাহ যোগান ধৰি অহা নুনমাটিৰ সুমন তালুকদাৰ, মালতী মেধি, সীমা বণিয়া আৰু মামো, লগতে লেখকৰ পত্নী পদ্মা কাকতি, লেখকৰ পৰিয়ালবৰ্গ, জয়া চৌধুৰী, কিশোৰ কাকতি, ৰিমি বায়ন, মিনা শৰ্মা, আব্দুল কাদেৰ আলী, বিশিষ্ট সাংবাদিক তথা লেখিকা পাৰিজাত সন্দিকৈ, বিশিষ্ট সংগঠক আৰু লেখিকা ঊষামণি শইকীয়াসহ বহুতো বিশিষ্ট ব্যক্তি উপস্থিত আছিল।
অনুষ্ঠানত বক্তাসকলে লেখক পৰশুৰাম কাকতিৰ সাহিত্যচিন্তা, শিৱ সাধনা আৰু মানৱ মুক্তিৰ দৰ্শনৰ বিষয়ে আলোকপাত কৰে। গ্ৰন্থখনত সমাজৰ পৰম্পৰাগত ভেদাভেদ অতিক্ৰম কৰি মানৱতাবাদ, আত্মঅনুসন্ধান আৰু মুক্ত চিন্তাৰ কথা প্ৰতিফলিত হোৱা বুলি বক্তাসকলে উল্লেখ কৰে।
উপস্থিত ৰাইজৰ সান্নিধ্যত অনুষ্ঠিত এই উন্মোচনী অনুষ্ঠানত সাহিত্যপ্ৰেমীসকলৰ মাজত গ্ৰন্থখনৰ প্ৰতি বিশেষ আগ্ৰহ লক্ষ্য কৰা যায়।
অসম বাৰ্তাজীবী সংঘৰ সাংগঠনিক নিৰ্বাচন সম্পন্ন , ‘মধুসূদন মেধি সভাপতি, অঞ্জন কুমাৰ শৰ্মা সাধাৰণ সম্পাদক নিৰ্বাচিত’
জন্মলগ্নৰে পৰা সাংবাদিকসকলৰ ন্যায্য প্ৰাপ্তিৰ বাবে মাত মাতি অহা ৰাজ্যখনৰ অন্যতম সাংবাদিক সংগঠন অসম বাৰ্তাজীৱী সংঘৰ ২০২৬-২৮ বৰ্ষৰ সাংগঠনিক নিৰ্বাচনৰ মনোনয়ন পত্ৰ প্ৰত্যাহাৰৰ নিৰ্ধাৰিত সময় শেষ হোৱাৰ পিচত মুখ্য নিৰ্বাচনী বিষয়া বিশ্বজিৎ দাস আৰু নিৰ্বাচনী বিষয়া ফণীধৰ দাসে যোৱা নিশা প্ৰকাশ কৰা প্ৰাৰ্থিত্বৰ তালিকা অনুসৰি সংঘৰ আটাইকেইগৰাকী বিষয়ববীয়াই বিনা প্ৰতিদ্বন্দিতাৰে জয়লাভ কৰে।
জানিব পৰা মতে অসম বাৰ্তাজীৱী সংঘৰ মুঠ ২১টা পদৰ বাবে অনুষ্ঠিত কৰা সাংগঠনিক নিৰ্বাচনত ৰাজ্যখনৰ ভালে সংখ্যক সাংবাদিকে মনোনয়ন পত্ৰ দাখিল কৰিছিল যদিও সংঘৰ সদস্যসকলৰ মাজত থকা সমন্বয় আৰু ভাতৃত্ববোধৰ প্ৰতিফলন ঘটাই কেইবাগৰাকী সাংবাদিকে মনোনয়ন পত্ৰ প্ৰত্যাহাৰ কৰাত আটাইকেইগৰাকী বিষয়ববীয়া বিনা প্ৰতিদ্বন্দিতাৰে জয়লাভ কৰে। উল্লেখ্য যে যোৱা ১৮ জানুৱাৰীত ঘোষণা কৰা অধিসূচনা কৰাৰ লগতে অহা ১৪ ফেব্ৰুৱাৰীত নিৰ্বাচনৰ দিন ঘোষণা কৰি কালি প্ৰাৰ্থীত্ব প্ৰত্যাহাৰৰ দিন নিৰ্ধাৰণ কৰিছিল।
স্মৰ্তব্য যে অসম বাৰ্তাজীৱী সংঘৰ আগন্তুক দুবছৰৰ বাবে মধুসূদন মেধি সভাপতি যতীন ভাগৱতী,ভাস্কৰ শৰ্মা উপ-সভাপতি, অঞ্জন কুমাৰ শৰ্মা সাধাৰণ সম্পাদক, অখিল কলিতা আৰু সোণাধৰ ডেকা সহকাৰী সম্পাদক, নৱনীতা কলিতা কোষাধ্যক্ষ,অশ্চিনী কুমাৰ দুৱৰা আৰু প্ৰশান্ত কুমাৰ মোদক সাংগঠনিক, হেমন্ত বৰ্মণ প্ৰচাৰ সম্পাদক, লক্ষীন্দন কলিতা পত্ৰিকা সম্পাদক,আদিত্য চন্দ্ৰ বৰ্মন কাৰ্যালয় সম্পাদক, মনোজ কুমাৰ গগৈ,দীপক দাস,তৰণী চৰণ কলিতা, প্ৰদীপ বৰ্মন,চাহেদ আলী আহমেদ, ভাস্কৰ জ্যোতি মেধি, কমল তালুকদাৰ,দীপ হাজৰিকা আৰু ভাৰত ৰাজবংশী কাৰ্যনিৰ্বাহক সদস্য হিচাপে বিনা প্ৰতিদ্বন্দিতাৰে জয়লাভ কৰে।
আনহাতে কালি নিশা অসম বাৰ্তাজীৱী সংঘই ভাৰ্চূৱেলী অনুষ্ঠিত কৰা এখন জৰুৰী কাৰ্যনিৰ্বাহক সভাত সংঘৰ হাইলাকান্দি অধিবেশনৰ প্ৰস্তাৱ মৰ্মে ৰাহুল চক্ৰবৰ্তী আৰু কিশোৰ জ্যোতি শৰ্মাক আগন্তুক দুবছৰৰ বাবে সংঘৰ সহকাৰী সম্পাদক আৰু সাংগঠনিক সম্পাদক হিচাপে মনোনীত কৰা হয়। ইয়াৰোপৰি সংঘৰ সংবিধানৰ ৭ নং ধাৰা(ঘ) উপধাৰা অনুসৰি সংঘৰ বৰ্তমানৰ সাধাৰণ সম্পাদক মুকুট ৰাজ শৰ্মাক নতুন সমিতিৰ উপদেষ্টা পদত মনোনীত কৰা হয়।