কাকপথাৰ তেজীপথাৰ মজলীয়া বিদ্যালয়ৰ হীৰক জয়ন্তী সমাৰোহ সম্পন্ন ৷ বৃহত্তৰ কাকপথাৰ অঞ্চলৰ অতি ভিতৰুৱা পিছপৰা তেজীপথাৰ গাঁৱৰ এসময়ৰ একমাত্ৰ পুৰণি শিক্ষানুষ্ঠান তেজীপথাৰ মজলীয়া বিদ্যালয় ৷ ১৯৬২ চনতে কেইৰাকীমান সমাজহিতৈষী ব্যক্তিৰ প্ৰচেষ্টাত গাঁওখনৰ লগতে অঞ্চলটোৰ শৈক্ষিক বাতাবৰণ ও নৱপ্ৰজন্ম শৈক্ষিক, মানসিক, বৌদ্ধিক উত্তৰণৰ দিশটোৰ প্ৰতি লক্ষ্য ৰাখি প্ৰতিষ্ঠা কৰিছিল এইখন বিদ্যালয়৷

এই বিদ্যালয় খনে বহুতো ঘাট প্ৰতিঘাটৰ মাজেৰে ৬৪ টা সফল বৰ্ষত ভৰি দিয়ে৷ ইয়াকে লৈ গাঁওবাসী তথা প্ৰাক্তন ছাত্ৰ-ছাত্ৰী, বৰ্তমানৰ ছাত্ৰছাত্ৰীৰ গাত দেখিবলৈ পোৱা গৈছে এক উৎসৱমূখৰ পৰিৱেশ৷ মৰাণ জনগোষ্ঠীৰ অধ্যুষিত গাঁওখনত ৩০ আৰু ৩১ জানুবাৰী তাৰিখে দুদিনীয়া বিস্তৃত বৰ্ণাধ্য কাৰ্যসূচীৰে অনুষ্ঠিত কৰে হীৰক জয়ন্তী সমাৰোহ ৷ প্ৰথম দিনৰ কাৰ্যসূচী অনুসৰি ৩০ জানুৱাৰী পুৱা স্বৰ্গীয় বুধু মুণ্ডা সোঁৱৰণি আদৰণি তোৰণ উদ্বোধন কৰে ২ নং তেজী গাঁৱৰ সমাজসেৱক ইশ্বাক হৰে ৷ তাৰ পাছতে তেজী বৰআলি ঐতিহাসিক সমন্বয় ক্ষেত্ৰ উদ্বোধন কৰে বুঢ়া ভকত হৰকান্ত হাতীবৰুৱাই ৷

মূল পতাকা উত্তোলন কৰে উত্তোলন কৰে অভ্যৰ্থনা সমিতিৰ সভাপতি ধৰ্মেন্দ্ৰ নেওগে আৰু সহযোগ কৰে বিদ্যালয় খনৰ প্ৰধান শিক্ষক সুখেশ্বৰ মৰাণে ৷ তাৰ পাছতে “তেজী-বৰালি” অঞ্চলৰ ৬৫ গৰাকী বিশিষ্ট ব্যক্তিৰ দ্বাৰা হীৰক জয়ন্তী সমাৰোহ উপলক্ষে ৬৫ খন পতাকা উত্তোলন কৰে ৷ পতাকা উত্তোলনৰ পাছতে অভ্যৰ্থনা সমিতিৰ মূখ্য সম্পাদক অনন্ত দহোতীয়া আৰু বিদ্যালয়ৰ সহকাৰী শিক্ষক প্ৰদীন হাজৰিকা দেৱে স্মৃতি তৰ্পণ কৰাৰ লগতে বিদ্যালয় খনৰ প্ৰতিষ্ঠাকালীন সময়ৰ স্বনামধন্য ব্যক্তি সকলৰ লগতে অসমীয়াৰ হিয়াৰ আমঠু তথা প্ৰাণৰ শিল্পী জুবিন গাৰ্গক ৰাজহুৱা শ্ৰদ্ধাঞ্জলি অনুষ্ঠান মুকলি কৰে ৷

স্মৃতি তৰ্পণৰ পাছতে গছপুলি ৰোপন কৰে কাকপথাৰ বনাঞ্চলিক বিষয়া কাৰ্যালয়ৰ বনপালক পৰশমণি চুতীয়া মৰাণে ৷ তাৰ পাছতে স্বৰ্গীয় যোগেন নেওগ সোঁৱৰণি মঞ্চ উদ্বোধন কৰে প্ৰাক্তন ছাত্ৰ নৱ কুমাৰ মৰাণে ৷ মঞ্চ উদ্বোধনীৰ পাছত প্ৰতিযোগিতা উদ্বোধন কৰে শিশু ভাস্কৰ হেমন্তৰাজ মৰাণে ৷ তাৰ পাছতে ছাত্ৰছাত্ৰী সকলৰ মাজত জ্যোতি সংগীত, জুবিন সংগীত, চিত্ৰাংকন, কুইজৰ প্ৰতিযোগিতা অনুষ্ঠিত হয় ৷ প্ৰথম দিনৰ প্ৰতিযোগিতাৰ পাছত নৱকান্ত বৰুৱা আৰু নৱৰত্ন ফুকনৰ সম্পাদনাত “হীৰক সুৱাস” নামৰ স্মৃতি গ্ৰন্থ উন্মোচন কৰে অঞ্চলটোৰ বিশিষ্ট সমাজসেৱক লালন কুমাৰ মৰাণে ৷ আবেলি সম্বৰ্দ্ধনা অনুষ্ঠান আৰু আলোচনা চক্ৰ অনুষ্ঠিত কৰে ৷

লিখক যোগ্য ফুকনৰ সঞ্চালনাত “শিশু শিক্ষাৰ বাবে ঘৰখনেই ঘাই কঠিয়াতলি” শীৰ্ষক আলোচনা চক্ৰ অনুষ্ঠিত কৰে ৷ সহযোগী সঞ্চালক হিচাবে উপস্থিত থাকে বিদ্যালয়খনৰ সহ শিক্ষক চুপেল ফুকন ৷ আলোচনা চক্ৰৰ উদ্বোধন কৰে বৰআলি প্ৰাথমিক বিদ্যায়ৰ জ্যেষ্ঠ শিক্ষক উপকূল গোস্বামী ৷ সমল ব্যক্তি ৰূপে উপস্থিত থাকে বীৰ ৰাঘৱ মৰাণ চৰকাৰী আদৰ্শ মহাবিদ্যালয়ৰ অধ্যক্ষ ড° অমৰজিৎ শইকীয়া, ডুমডুমা মহাবিদ্যালয়ৰ সহঃ অধ্যাপক মাধুৰ্য্য মহন্ত, তেজীপথাৰ উচ্চ মাধ্যমিক বিদ্যালয়ৰ অৱসৰপ্ৰাপ্ত প্ৰধান শিক্ষক অনিল দত্ত, বৰআলি মধ্য ইংৰাজী বিদ্যালয়ৰ প্ৰধান শিক্ষক অৰূপ কুমাৰ ফুকন ৷ দ্বিতীয় তথা ৩১ জানুৱাৰী তাৰিখে জুবিন সংগীত প্ৰতিযোগিতাৰ পাছত “সপোনৰ পম খেদি” শীৰ্ষক প্ৰাক্তন ছাত্ৰ-ছাত্ৰী আৰু শিক্ষক গোটৰ অন্তৰংগ অনুষ্ঠান অনুষ্ঠিত কৰে ৷

অনুষ্ঠান খনি পৰিচালনা কৰে সদৌ মৰান কলা সংস্কৃতি বিকাশ মঞ্চৰ প্ৰাক্তন সাধাৰণ সম্পাদক মন্টু চেতিয়াই ৷ অনুষ্ঠানত প্ৰাক্তন ছাত্ৰছাত্ৰী আৰু শিক্ষক গোটৰ মাজত নৃত্য-গীতৰ সমাহাৰ ঘটে ৷ এই অনুষ্ঠানৰ পাছতে মুকলি সভা ও বঁটা বিতৰণী সভা অনুষ্ঠিত কৰে ৷ মুকলি সভা উদ্বোধন কৰে বিদ্যালয় খনৰ কৃতি শিক্ষক উৎপল চন্দ্ৰ ভূঞাই ৷ মুকলি সভাৰ সভাপতিত্ব কৰে অভ্যৰ্থনা সমিতিৰ সভাপতি ধৰ্মেন্দ্ৰ নেওগে আৰু সহযোগ কৰে বিদ্যালয়ৰ প্ৰধান শিক্ষক সুখেশ্বৰ মৰাণে ৷ সভাৰ আদৰণি ভাষণ পাঠ কৰে বিদ্যালয় খনৰ সহঃ শিক্ষক মহিন্দ্ৰনাথ বৰুৱাই ৷ সভাত নিৰ্দিষ্ট বক্তা ৰূপে উপস্থিত থাকে সদৌ মৰাণ ছাত্ৰ সন্থাৰ প্ৰাক্তন সভাপতি বিৰিঞ্চি নেওগ ৷

মূখ্য অতিথি ৰূপে উপস্থিত থাকে অসম গেছ কোম্পানীৰ অধ্যক্ষ তথা ৮১ নং শদিয়া বিধান সভা সমষ্টিৰ বিধায়ক বলিন চেতিয়া । বিশিষ্ট অতিথি ৰূপে উপস্থিত থাকে সদৌ মৰান ছাত্ৰ সন্থাৰ সাধাৰন সম্পাদক জয়কান্ত মৰাণ, কাকপথাৰ প্ৰেছ ক্লাবৰ সাধাৰন সম্পাদক ইন্দ্ৰজিত গগৈৰ লগতে বহুকেইগৰাকী গণ্য-মান্য ব্যক্তি ৷ মুকলি সভাৰ সন্মানীয় অতিথি ৰূপে উপস্থিত থাকে বিশিষ্ট খেতিয়ক ধনিৰাম চেতিয়া ৷ মুকলি সভাৰ অন্তত নিশালৈ আমন্ত্ৰিত শিল্পীৰ দ্বাৰা সাংস্কৃতিক অনুষ্ঠান অনুষ্ঠিত কৰে ৷