গায়িকা পলক মুছলৰ (Palak Mucchal)শিৰত সেন্দুৰ আঁকিলে সংগীতকাৰ মিথুন শৰ্মাই(Mithun Sharma)
বিবাহপাশত আৱদ্ধ হ’ল বলীউডৰ সুকণ্ঠী গায়িকা পলক মুছল(Palak Mucchal) আৰু সংগীতকাৰ মিথুন শৰ্মা (Mithun Sharma)। ছচিয়েল মিডিয়াত ভাইৰেল হৈ পৰিছে দুয়োৰে বিয়াৰ ছবি। ৰঙা আৰু সোণালী ৰঙেৰে নিৰ্মিত কইনাৰ পোছাকত বৰ সুন্দৰ দেখাইছে পলক মুছলক। আনহাতে মিথুনে ষ্টাইলিছ কুৰ্তা পাইজামা পৰিধান কৰা দেখা গৈছিল।
পলক আৰু মিথুনক বিয়াৰ শুভেচ্ছা জনাবলৈ কেইবাজনো অভিনেতা অভ্যৰ্থনা অনুষ্ঠানত উপস্থিত হয়। ইয়াৰ উপৰিও বহু শিল্পী অতিথি হিচাপে বিবাহ অনুষ্ঠানত উপস্থিত থাকে। ইয়াত কৈলাশ খেৰ আৰু চনু নিগমৰ নামো সন্নিবিষ্ট হৈছে।
পলক মুছল আৰু মিথুনে একেলগে বহুতো কাম কৰিছে। দুয়োজনে বহু ছবিৰ বাবে গীত ৰচনা কৰিছে। দুয়োজনে প্ৰথমবাৰৰ বাবে একেলগে কাম কৰিছিল ‘Aashiqui 2’ৰ বাবে। দুয়োৰে চিনাকি বহুদিনৰ পৰা আছিল। দুয়োজনে দীৰ্ঘদিন ধৰি ইজনে সিজনৰ লগত ডেটিং কৰি আছিল বুলিও খবৰ পোৱা গৈছে। অৱশ্যে দুয়োজনে এই কথা কেতিয়াও নিশ্চিত কৰা নাছিল। অৱশেষত দুয়ো বিবাহপাশত আৱদ্ধ হৈ অনুৰাগীসকলক দিলে ভাল খবৰটো।
পলক আৰু মিথুনৰ বৈবাহিক জীৱন সুখৰ হ’বলৈ শুভকামনা জনাইছে চেলিব্ৰিটিসকলৰ লগতে অনেক অনুৰাগীয়ে। উল্লেখ্য যে বলীউডৰ বহু জনপ্ৰিয় গীতত কণ্ঠদান কৰিছে পলক মুছলে। তেওঁ বহু মঞ্চ অনুষ্ঠানতো অংশ লৈছে। ইয়াৰ লগতে মিথুনেও বহু ছবিত সংগীত দিছে।