সমাজকৰ্মী আৰু শিক্ষাবিদ সোনম ৱাংচুকৰ অনিৰ্দিষ্টকালীন অনশনক কেন্দ্ৰ কৰি উদ্বেগজনক পৰিস্থিতিৰ সৃষ্টি হৈছে। দিল্লী উচ্চ ন্যায়ালয়ত দাখিল কৰা এখন ৰাজহুৱা স্বাৰ্থজড়িত আৱেদনত কোৱা হৈছে যে অনশন অব্যাহত থাকিলে তেওঁ দুদিনতকৈ বেছি সময় জীয়াই থাকিব নোৱাৰিব পাৰে। ইতিমধ্যে তেওঁৰ অনশন ১৮ দিনত ভৰি দিছে আৰু স্বাস্থ্যৰ অৱস্থা অত্যন্ত সংকটজনক হৈ পৰিছে। এই পৰিপ্ৰেক্ষিতত ন্যায়ালয়ৰ জৰুৰী হস্তক্ষেপ বিচাৰি আবেদন দাখিল কৰা হৈছে। আবেদনকাৰীয়ে আদালতক অনুৰোধ জনাইছে যাতে সোনম ৱাংচুকক তৎকালেই চিকিৎসালয়লৈ স্থানান্তৰ কৰি তৰল আহাৰৰ জৰিয়তে বলপূৰ্বকভাৱে পুষ্টি, ভিটামিন আৰু খনিজ পদাৰ্থ প্ৰদান কৰাৰ নিৰ্দেশ দিয়া হয়। আবেদনখনত চৰকাৰৰ ভূমিকা সম্পৰ্কে অসন্তুষ্টি প্ৰকাশ কৰি কোৱা হৈছে যে এই গুৰুত্বপূৰ্ণ বিষয়ত চৰকাৰ অতি অসংবেদনশীল মনোভাৱ গ্ৰহণ কৰিছে। জানিব পৰা মতে, দিল্লী উচ্চ ন্যায়ালয়ে কাইলৈ এই আৱেদনৰ ওপৰত জৰুৰী শুনানি গ্ৰহণ কৰিব। মুখ্য ন্যায়াধীশ ডি কে উপাধ্যায় আৰু ন্যায়াধীশ তেজছ কাৰিয়াৰ বিচাৰপীঠে ইতিমধ্যে বিষয়টো বিবেচনাৰ বাবে গ্ৰহণ কৰিছে। অৱশ্যে উচ্চ ন্যায়ালয়ৰ অধিবক্তা সন্থাৰ কৰ্মবিৰতিৰ বাবে কৰ্তৃপক্ষৰ পক্ষৰ কোনো প্ৰতিনিধি উপস্থিত নাথাকাত শুনানি স্থগিত ৰখা হয়।
আদালতে বিষয়টো গুৰুত্ব সহকাৰে লৈ কাইলৈৰ বাবে পুনৰ নিৰ্ধাৰণ কৰিছে আৰু সংশ্লিষ্ট কৰ্তৃপক্ষক নিজৰ স্থিতি স্পষ্ট কৰিবলৈ নিৰ্দেশ দিছে। উল্লেখযোগ্য যে, ৫৯ বছৰীয়া সোনম ৱাংচুকে নিট পৰীক্ষাত হোৱা অনিয়মৰ বিৰুদ্ধে প্ৰতিবাদ জনাই কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগ দাবী কৰি এই অনশন আৰম্ভ কৰিছিল। যোৱা কেইদিনত তেওঁৰ প্ৰায় ৮.৫ কিলোগ্ৰাম ওজন হ্ৰাস পোৱাৰ লগতে শাৰীৰিক অৱস্থা অধিক অৱনতি ঘটিছে বুলি জনা গৈছে।অধিবক্তা ৰাকেশ কুমাৰ চাইনীয়ে দাখিল কৰা এই আবেদনখনত কোৱা হৈছে যে ৰাজহুৱা স্থানত শান্তিপূৰ্ণ প্ৰতিবাদ কৰা নাগৰিকৰ এক মৌলিক অধিকাৰ, কিন্তু সেই অধিকাৰ ব্যৱহাৰ কৰাৰ সময়ত জীৱনৰ সুৰক্ষাও সমানেই গুৰুত্বপূৰ্ণ। যদি এইদৰে তেওঁৰ মৃত্যু ঘটে, তেন্তে সেয়া দেশৰ বাবে এক লজ্জাজনক ঘটনা হিচাপে পৰিগণিত হ’ব বুলিও আবেদনকাৰীয়ে মন্তব্য কৰিছে।ইফালে, এই বিষয়টোৱে সমগ্ৰ দেশজুৰি চাঞ্চল্যৰ সৃষ্টি কৰিছে। বহু বিশিষ্ট ব্যক্তিয়ে তেওঁৰ জীৱন ৰক্ষাৰ বাবে আগবাঢ়ি আহিবলৈ আহ্বান জনাইছে। সৰ্বমুঠ, এই ঘটনাই এতিয়া এক জটিল আইনী আৰু মানৱিক পৰিস্থিতিৰ সৃষ্টি কৰিছে, যাৰ ওপৰত সকলোৰে দৃষ্টি নিবদ্ধ হৈ আছে।
