গোলাঘাট জিলা সাংবাদিক সংস্থাৰ সভাপতি সোনাৰাম ভৰালীক ঘৰতে হত্যাৰ ভাবুকি দুৰ্বৃত্তৰ

ধনশিৰি

গোলাঘাট জিলাৰ প্ৰবীন সাংবাদিক তথা গোলাঘাট জিলা সাংবাদিক সংস্থাৰ সভাপতি সোনাৰাম ভৰালীক যোৱা শুকুৰবাৰৰ নিশা এটা দুৰ্বৃত্তই ঘৰতে হত্যাৰ ভাবুকি প্ৰদান কৰা বাতৰিয়ে অঞ্চলটোত চাঞ্চল্যৰ সৃষ্টি কৰিছে৷ শুকুৰবাৰে নিশা প্ৰায় ৯ বজাত বজাত সাংবাদিকগৰাকীৰ বৰপথাৰ থানাৰ অন্তৰ্গত হেজাৰী গাঁৱৰ মণ্ডল তিনি আলিস্থিত তেওঁৰ বাসগৃহত সন্মুখৰে প্ৰয়াত যোগল বৰুবা পুত্ৰ বুবুল বৰুৱা ওৰফে ভাইকন ওৰফে বিৰাপান্নাই হাতত এখন দা লৈ সাংবাদিকগৰাকীৰ ঘৰত প্ৰৱেশ কৰি অশ্লীল গালিগালাজ পৰাৰ লগতে হত্যাৰ ভাবুকি প্ৰদান কৰে৷ উল্লেখযোগ্য যে উক্ত সময়ত সাংবাদিকগৰাকী ঘৰৰে আন এটা কোঠাত থকাৰ বাবে ৰক্ষা পৰে যদিও হাতত উদ্যত দালৈ বুবুলে সাংবাদিকগৰাকীৰ পত্নীৰ আগতে লম্ফজম্ফ কৰি হত্যাৰ ভাবুকি দি আঁতৰি যায়৷ পাছত সাংবাদিকজৰাকীৰ অভিযোগ ভিত্তিত বৰপথাৰ আৰক্ষীয়ে নিশাই যুৱকজনক আটক কৰি থানালৈ আনে৷ অন্যহাতে শনিবাৰে সাংবাদিকগৰাকীৰ পত্নী দীপালি ভৰালীয়ে দিয়া গোচৰৰ ভিত্তিত আৰক্ষীয়ে এটা গোছৰ ৰুজু কৰে৷ উল্লেখযোগ্য যে উক্ত বুবুল ওৰফে বিৰাপান্না পূৰ্বে বহুতো গোচৰত অভিযুক্ত৷ তেওঁৰ বিৰুদ্ধে গাঁওখনৰ মানুক বিভিন্ন সময়ত ভাবুকি দিয়া, চুৰি কৰা, ডকাইতি কৰা আদি বহু অভিযোগ আছে৷ পূৰ্বতে তেওঁক অবৈধভাৱে মাৰণাস্ত্ৰ ৰখাৰ অভিযোগত আৰক্ষীয়ে গ্ৰেপ্তাৰো কৰিছিল৷ ধনশিৰি মহকুমা সাংবাদিক সংস্থা, বৰপথাৰ প্ৰেছ ক্লাব, বৰপথাৰ ব্যৱসায়ী সন্থা আদিয়ে প্ৰবীন সাংবাদিকগৰাকীক হত্যাৰ ভাবুকি দিয়া কাৰ্যক গৰিহণা দিয়াৰ লগতে অভিযুক্তৰ ওপৰত শাস্তিমূলক বিহত ব্যৱস্থা গ্ৰহণৰ দাবী তোলাৰ লগতে সাংবাদিকগৰাকীৰ সুৰক্ষা নিশ্চিত কৰিবলৈ আৰক্ষীক দাবী জনায়৷