ভোজপুৰী যুৱ ছাত্ৰ পৰিষদৰ টিংখাং আঞ্চলিক সমিতিৰ বিশেষ অভিনন্দন অনুষ্ঠান আৰু সাধাৰণ সভা সম্পন্ন

ডিব্ৰুগড় জিলাৰ ৰাজগড়স্থিত সাই বিৱাহ ভৱনত দিনজোৰা বৰ্ণাঢ্য কাৰ্যসূচীৰে সদৌ অসম ভোজপুৰী যুৱ ছাত্ৰ পৰিষদৰ টিংখাং আঞ্চলিক সমিতিৰ সাধাৰণ সভা আৰু বিশেষ অভিনন্দন অনুষ্ঠান অনুষ্ঠিত হয় ৷

প্ৰতিকূল বতৰকো নেওচি শ শ কৃতী ছাত্ৰ-ছাত্ৰী আৰু প্ৰতিনিধিয়ে অংশগ্ৰহণ কৰা অনুষ্ঠানত বহু সংখ্যক ৰাইজ উপস্থিত থাকে৷ পুৱাৰ ভাগত সন্থাৰ পতাকা উত্তোলন কৰে সন্থাৰ টিংখাং আঞ্চলিক সমিতিৰ সভাপতি মনোজ কুমাৰ চাহে৷

ইয়াৰ পিছতেই প্ৰতিনিধি সভা অনুষ্ঠিত হয় ৷ মনোজ কুমাৰ চাহৰ সঞ্চালনাত অনুষ্ঠিত হোৱা প্ৰতিনিধি সভাত আদৰণি ভাষণ আগবঢ়ায় সন্থাৰ উপদেষ্টা অনুপ জয়ছোৱালে ৷ প্ৰতিনিধি সভা উদ্বোধন কৰে আপকুৰ কেন্দ্ৰীয় সমিতিৰ মুখ্য উপদেষ্টা মনোজ সিঙে ৷ প্ৰতিনিধি সভাত পৰ্যৱেক্ষক হিচাপে উপস্থিত থাকে সন্থাৰ ডিব্ৰুগড় জিলা সমিতিৰ গামা পাছোৱান আৰু পল্টু সিং ৷ শুভেচ্ছামূলক বক্তব্য আগবঢ়ায় ৰাজগড়ৰ প্ৰতিষ্ঠিত ব্যৱসায়ী তথা সমাজকৰ্মী সদানন্দ জয়ছোৱাল আৰু মুক্তি কালোৱাৰে ৷

প্ৰতিনিধি সভাতে সন্থাৰ বৰ্তমানৰ সমিতিখন ভংগ কৰি নতুন সমিতি গঠন কৰা হয় ৷ গগন জয়ছোৱালক সভাপতি আৰু সুৰজ চাহক সম্পাদক হিচাপে লৈ আগন্তুক দুবছৰীয়া কাৰ্যকালৰ বাবে এক শক্তিশালী নতুন সমিতি গঠন কৰা হয় ৷ ইয়াৰ পিছতেই মুকলি সভা আৰু বিশেষ অভিনন্দন অনুষ্ঠান অনুষ্ঠিত হয় ৷

জাতীয় সংগীতেৰে মুকলি সভা শুভাৰম্ভ কৰা হয় ৷ মনোজ কুমাৰ চাহৰ সভাপতিত্বত অনুষ্ঠিত হোৱা মুকলি সভাত সৰ্বভাৰতীয় পৰীক্ষাত উত্তীৰ্ণ হোৱা আৰু হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত সুখ্যাতিৰে উত্তীৰ্ণ হোৱা শতাধিক কৃতী ছাত্ৰ-ছাত্ৰীক গামোচা আৰু অভিনন্দন পত্ৰৰে অভিনন্দন জনোৱা হয় ৷

অভিনন্দন অনুষ্ঠানত মুখ্য অতিথি হিচাপে অংশগ্ৰহণ কৰি টিংখাং মহাবিদ্যালয়ৰ অধ্যক্ষ ড° মৌচুমী গগৈয়ে সাৰগৰ্ভ বক্তব্য আগবঢ়াই সকলোকে অনুপ্ৰেৰণা দিয়ে ৷ আপকুৰ কেন্দ্ৰীয় সমিতিৰ মুখ্য উপদেষ্টা মনোজ সিঙেও ছাত্ৰ-ছাত্ৰীক উদ্দেশ্যি বক্তব্য আগবঢ়ায় ৷

কৃতী ছাত্ৰছাত্ৰীসকলেও অভিনন্দন গ্ৰহণ কৰি বক্তব্য আগবঢ়ায় ৷ সভাত সংগঠনটোৰ কেন্দ্ৰীয় সমিতিৰ সম্পাদক সঞ্জয় কালোৱাৰ, গামা পাছোৱান , পল্টু সিং , মুক্তি কালোৱাৰ , সদানন্দ জয়ছোৱাল আদিয়েও বক্তব্য আগবঢ়ায় ৷ অভিনন্দন অনুষ্ঠানত অতিথি হিচাপে দিপালী গগৈ , বিভিন্ন জাতীয় সংগঠনৰ নেতৃবৃন্দ উপস্থিত থাকে ৷

সন্ধিয়া বন্তি প্ৰজ্বলন কৰে সদানন্দ জয়ছোৱালে ৷ সাংস্কৃতিক সন্ধিয়া উদ্বোধন কৰে সংগীত শিল্পী ৰমেন দানহে ৷ সাংস্কৃতিক অনুষ্ঠানত স্থানীয় মহিলা শিল্পী , যুৱতীসকলৰ উপৰি শিশু শিল্পীসকলে নৃত্য , গীত পৰিৱেশন কৰে ৷

প্ৰতিবেদকঃ মনোজ সিং , টিংখাং