য়েমেনৰ ৰাজধানী ছানা চহৰৰ এখন বিদ্যালয়ত দাতব্য অনুষ্ঠানৰ সময়ত সংঘটিত হোৱা ভয়াবহ অভিযানত কমেও ৮৫ জন লোক নিহত হোৱাৰ লগতে কেইবাজনো আহত হয়। প্ৰত্যক্ষদৰ্শীৰ উদ্ধৃতিৰে সংবাদ সংস্থা ৰয়টাৰে প্ৰকাশ কৰা অনুসৰি বিদ্যালয়খনত শ শ লোকে সমবেত হৈ ৫ হাজাৰ য়েমেন ৰিয়ালৰ অনুদান লাভ কৰিছিল, প্ৰায় ১৬৪২ টকাকৈ।
খবৰ অনুসৰি পবিত্ৰ ৰমজান মাহৰ অন্তিম দিনত ব্যৱসায়ীসকলে দাতব্য অনুদান বিতৰণৰ সময়ত সংঘটিত হয় এই হুলস্থুল। প্ৰত্যক্ষদৰ্শীৰ মতে, ভিৰ নিয়ন্ত্ৰণ কৰাৰ উদ্দেশ্যে অস্ত্ৰধাৰী হাউথীয়ে বতাহত গুলীচালনা কৰে। অৱশ্যে এই গুলীবোৰে বিদ্যুতৰ তাঁৰত খুন্দা মৰাৰ ফলত বিস্ফোৰণ হোৱা বুলি জানিব পৰা গৈছে।
বিস্ফোৰণৰ পিছত আতংকই ৰাইজক আগুৰি ধৰিলে আৰু তেওঁলোকে ইফালে সিফালে দৌৰিবলৈ ধৰিলে যাৰ ফলত হুলস্থুলৰ সৃষ্টি হ’ল।
বাব আল-য়েমেনত হোৱা হুলস্থুলৰ পিছত কমেও “৮৫ জন নিহত আৰু ৩২২ জনতকৈ অধিক লোক আহত” বুলি এজন হাউথী বিষয়াই কয়।