নগাঁৱত দ্ৰুতগতিত হ্ৰাস পাইছে ক’ৰোণা ৰোগীৰ সংখ্যা : বুধবাৰৰ দিনটোত মাত্ৰ ১জন আক্ৰান্ত ক’ৰোণাত

নগাঁও, ১৬ডিচেম্বৰ : ক’ৰোণাত সৰ্বাধিক আক্ৰান্ত অসমৰ জিলাসমূহৰ ভিতৰত অন্যতম নগাঁৱলৈ বৰ্তমান ঘূৰি আহিছে স্বাভাৱিক অৱস্থা। নৱেম্বৰ মাহৰ মাজভাগৰে পৰা নগাঁৱত দ্ৰুতগতিত হ্ৰাস পাইছে ক’ৰোণা ৰোগীৰ সংখ্যা। ১৩ডিচেম্বৰত টেষ্ট কৰা ১৫০জন ৰোগীৰ এজনৰো দেহত পোৱা ন’গল ক’ৰোণাৰ সংক্ৰমণ। আজিৰ দিনটোত ১৯০জন ৰোগীক ক’ৰোণাৰ পৰীক্ষা কৰা হৈছিল যদিও মাত্ৰ ১জনৰ দেহতহে পোৱা গ’ল ক’ৰোণাৰ সংক্ৰমণ। আনহাতে চিকিৎসালয় সমূহতো নাই পূৰ্বৰ ভিৰ। অধিকাংশ ৰোগীয়ে সুস্থ হৈ ঘৰলৈ উভতিছে। বৰ্তমানলৈকে নগাঁৱত ৯হাজাৰ ১২৮জন লোক ক’ৰোণাত আক্ৰান্ত হৈছে। বৰ্তমান ক’ৰোণাৰ প্ৰভাৱৰ পৰা নগাঁও বাসীয়ে যথেষ্ট সকাহ লাভ কৰিছে যদিও বজাৰত ভেকচিন উপলব্ধ নোহোৱা পৰ্য্যন্ত জিলাখনৰ ৰাইজক মাস্ক, চেণিটাইজাৰ আৰু সামাজিক ব্যৱধানৰ দিশটো মানি চলিবলৈ জিলা প্ৰশাসনে অনুৰোধ জনাইছে।