✍ গীতালী ভাগৱতী
২০২০ এটা এনেকুৱা বিভিষিকাময় চন। যিটো চনৰ বিষয়ে অতীতত স্মৰণ কৰিলেও গাৰ শিহৰণি উঠিব। যিফালেই চাওঁ সিফালে ধ্বংসৰ জুই জ্বলিছে। এফালে যদি নভেল কৰোণা আনফালে বানপানী, এফালে যদি জীৱ জন্তুৰ হত্যা আনফালে সৰ্বনাশী জুই, বনধ্বংশ আদি। কিমান দিন আৰু এইবোৰ দেখিবলৈ পাম? টিভি অন্ কৰি নিউজ চেনেল কেইটা চাবলৈ ভয় লাগে। চাৰিওফালে কেৱল বিভিষিকাময় পৰিৱেশ। দেহিং পাটকাইৰ ধ্বংস লীলা সমাপ্ত নহওঁতেই ডিব্ৰু-চৈখোৱা ৰাষ্ট্ৰীয় উদ্যানৰ ধ্বংসলীলা আৰম্ভ হৈছে। সুদীৰ্ঘ ১৪ দিন ধৰি তিনিচুকীয়া জিলাৰ বাঘজানত নেৰানেপেৰা ভাৱে তেল আৰু বিষাক্ত গেছ নিৰ্গত হৈ আছিল। বিভিন্ন দল সংগঠনৰ সকীয়নী তথা প্ৰতিবাদৰ অন্তত যোৱা ৯ জুন তাৰিখে ১২:৩০-1:00 বজাৰ ভিতৰত বাঘজানৰ নৈ-বন গাঁৱত সৰ্বনাশী জুইয়ে চানি ধৰে। কি মানুহ? কি জন্তু? কি চৰাই চিৰিকটি? কি তৰু তৃণ? সকলো জুই কোৰাল গ্ৰাসত। ভুক্তভূগী লোকক আশ্ৰয় শিবিৰলৈ লৈ অহা হ’ল। কিন্তু সেই নিমাত প্ৰাণী তথা তৰু তৃণ বোৰৰ কি দশা হ’ল? কি ভূল আছিল তেওঁলোকৰ। লোভত মতলীয়া সকলৰ বাবে আমাৰ প্ৰকৃতি দিনক দিনে নিঃশেষ হৈ যাব ধৰিছে। এবাৰ ভাবি চাইচেনে প্ৰকৃতিৰ অবিহনে আমি কেনেকৈ জীয়াই থাকিম ? পৃথিৱীখন যিমানে আধুনিকতাৰ দিশে অতিক্ৰম কৰিছে সিমানে মানুহৰ মানসিকতা নিঃশেষ হ’ব ধৰিছে। যোৱা কেইবাদিনো ধৰি ইন্টাৰনেট, বাতৰিকাকত, টেলিভিছনত হাতী হত্যাকাণ্ড, গৰুক এছিড ঢালি দিয়া, কুকুৰৰ পেটত ড্ৰাগছ ভৰাই দিয়া এনেবোৰ ঘটনা দেখিবলৈ পায় ভাৱ হয় আমি সচাকৈয়ে জীৱ শ্ৰেষ্ঠ নে? যোৱা ২৭ মে’ তাৰিখৰ পৰা নিৰ্গত হোৱা বিষাক্ত গেছৰ পৰিণতি যোৱাকালি হোৱা বিস্ফোৰণ। এই বিস্ফোৰণত বহু আপুৰুগীয়া সম্পদ, বণ্যপ্ৰাণী মৃত্যুৰ হৈছে। ইয়াৰ লগতে ডিব্ৰু চৈখোৱা ৰাষ্ট্ৰীয় উদ্যান, মাগুৰি মতাপুং বিলকে ধৰি বাঘজান, নতুন ৰঙাগড়া আদিৰ অস্তিত্ব সংকটত পৰিছে। উল্লেখযোগ্য যে উক্ত তৈলখাদটোত কৰ্তব্যৰত দুগৰাকী অগ্নি নিৰ্বাপক বাহিনীৰ সদস্য জুইৰ পৰা বাচিবলৈ পুখুৰীত জাপ দিয়াত মৃত্যুমুখত পৰে। অইল ইন্দিয়া লিমিটেডে তেল সংগ্ৰহৰ বাবে যিমান সৰন্জাম ৰাখে সেই অনুযায়ী যদি নিৰাপত্তাৰ বাবে সাবধানতা অৱলম্বন কৰিলেহেতেন তেতিয়া এনে ঘটনা সংঘটিত নহ’লহৈ। প্ৰধানমন্ত্ৰী ডাঙৰীয়াই ভুক্তভূগীসকলক সকলো প্ৰকাৰে সহায় কৰিব বুলি ঘোষণা কৰিছে। কিন্তু যিবিলাক জীৱ-জন্তু তথা গছ-গছনিৰ লগতে মৃত লোক দুজনক ঘূৰাই দিব পাৰিব জানো অইল ইন্দিয়া লিমিটেডে।