দেশৰ মুখ্যমন্ত্ৰীসকলৰ সৈতে আলোচনা প্ৰধানমন্ত্ৰীৰ মানুহ ঘৰলৈ ঘুৰি আহিবলৈ বিচাৰে সংকটকালত

অনলাইন বাৰ্তা

চৰকাৰে চাইছিল যি য’তে আছে, তাতেই থাকক৷ কিন্তু মানুহ ঘৰলৈ যাবলৈ চাবই৷ সেয়ে বহু সিদ্ধান্ত সলনি হৈছে৷ ১৭ মে’ৰ পাছত লকডাউনৰ ভৱিষ্যতক লৈ সিদ্ধান্ত ল’বৰ বাবে দেশত যি ঘটি আছে তাকে লৈ মুখ্যমন্ত্ৰীসকলৰ সৈতে আয়োজিত বৈঠকত এনেদৰে মত প্ৰকাশ কৰে প্ৰধানমন্ত্ৰী নৰেন্দ্ৰ মোডীয়ে৷ অহা ১৭ মে’ত তৃতীয় পৰ্যায়ৰ লকডাউন শেষ হ’ব৷ ইয়াৰ পাছত লকডাউন বৃদ্ধি কৰা হ’ব নে, কনটেনমেণ্ট জ’নবোৰ বাদ দি বাকী ঠাইবোৰত বিধিনিষেধ শিথিল কৰা হ’ব নে তাকে লৈ আলোচনা চলি আছে৷ তাৰ মাজতে সোমবাৰে পশ্চিম বংগৰ মুখ্যমন্ত্ৰী মমতা বেনাৰ্জী, মধ্য প্ৰদেশৰ মুখ্যমন্ত্ৰী শিৱৰাজ সিং চৌহানসহ কেইবাখনো ৰাজ্যৰ মুখ্যমন্ত্ৰীসকলৰ সৈতে প্ৰধানমন্ত্ৰীয়ে আলোচনা কৰে৷ এই সভাত কেন্দ্ৰীয় গৃহমন্ত্ৰী অমিত শ্বাহ, বিত্ত মন্ত্ৰী নিৰ্মলা সীতাৰমন, স্বাস্থ্য মন্ত্ৰী হৰ্ষবৰ্দ্ধনসহ কেন্দ্ৰীয় মন্ত্ৰীসভাৰ সদস্যইও অংশগ্ৰহণ কৰে৷ এই সভাত প্ৰধানমন্ত্ৰীয়ে কয়, যি য’তে আছে তাতেই থাকক৷ ইয়াকে চাইছিল চৰকাৰে৷ কিন্তু সংকটকালত মানুহ ঘৰলৈ ঘুৰি আহিবলৈ বিচাৰেই৷ সেয়ে আমাৰ বহু সিদ্ধান্ত সলনি হৈছে৷ এই সময়ত এটা কথাই আমি গুৰুত্ব দিব লাগিব যে সংক্ৰমণ যেন গ্ৰামাঞ্চল নাপাইগৈ৷ আমাৰ সকলোৰে বাবে এইটোৱেই বৃহৎ প্ৰত্যাহ্বান৷ ক’ৰোনাৰ বিৰুদ্ধে কৰা যুঁজত ৰাজ্যবোৰে গুৰুত্বপূৰ্ণ ভূমিকা পালন কৰিছে বুলি মোডীয়ে কয়৷ প্ৰধানমন্ত্ৰীয়ে কয়, প্ৰত্যেকে নিজৰ দায়িত্ব বুজিছে আৰু সেইদৰে ক’ৰোনা ৰোধ কৰিবলৈ যুঁজ কৰিছে৷ সকলো ৰাজ্যৰ সচিবসকলৰ সৈতে কেবিনেট সচিবে যোগাযোগ ৰাখি আছে৷ আমি আৰু সজাগ হ’ব লাগিব৷ ভাৰসাম্য বজাই ৰাখি পৰৱৰ্তী পদক্ষেপ লোৱা হ’ব৷ কিদৰে ক’ৰোনাৰ বিৰুদ্ধে যুঁজত একজোঁট হ’ব সকলো, সকলো পৰামৰ্শ মানি নীতি নিৰ্দেশনা প্ৰস্তুত কৰা হ’ব৷ উল্লেখ্য যে বিভিন্ন ৰাজ্যৰ মুখ্যমন্ত্ৰীসকলৰ সৈতে প্ৰধানমন্ত্ৰী নৰেন্দ্ৰ মোডীৰ এইখন পঞ্চম বৈঠক৷ আজি লকডাউন লৈ মুখ্যমন্ত্ৰীসকলে নিজৰ মতামত প্ৰকাশ কৰে৷ ইয়াকে লৈ কি চূড়ান্ত সিদ্ধান্ত পাইছে সেয়া জানিব পৰা নাই৷