শ্বিলঙলৈ এতিয়া যাওঁ বুলিলেই যাব নোৱাৰিব! কঠোৰ মেঘালয় ভ্ৰমণৰ নীতি-নিয়ম
দেশজুৰি ক’ভিড আৰু অ’মিক্ৰনৰ সংক্ৰমণ বৃদ্ধি তথা চুবুৰীয়া ৰাজ্য অসমত কভিডৰ সংক্ৰমণ বৃদ্ধিৰ প্ৰতিও লক্ষ্য ৰাখি তত্পৰ হৈছে মেঘালয় চৰকাৰ। ৰাজ্যখনত ৫ জানুৱাৰীৰ পৰা জাৰী কৰা হৈছে একাধিক নিষেধাজ্ঞা। ৰাজ্যখনৰ ক’ভিড পৰিস্থিতি সন্দৰ্ভত এক পৰ্যালোচনা বৈঠকৰ পিছত সাংবাদিকৰ সৈতে বাৰ্তালাপ কৰি মুখ্যমন্ত্ৰী কনৰাড কে চাংমাই কয়, “আমি ৰাজহুৱা সমাৱেশৰ ওপৰত পুনৰ নিষেধাজ্ঞা আৰোপ কৰাৰ সিদ্ধান্ত লৈছো। আমি কেৱল কিছুমান উদ্দেশ্যৰ বাবে অতি সীমিত সংখ্যাৰ সৈতে সমাৱেশৰ অনুমতি দিম।”
৫ জানুৱাৰীৰ পৰা শ্বিলং চহৰ আৰু পূব খাচী পাহাৰৰ বেছিভাগ অঞ্চলতে সকলো ব্যক্তিগত বাহন অড-ইভেন আধাৰত চলাচল কৰিব। দুপালি ভেকচিন লোৱাৰ ওপৰিও ৰাজ্যখনত প্ৰৱেশ কৰা বাহিৰৰ লোকসকলে ৭২ ঘণ্টাৰ ভিতৰত আৰটি-পিচিআৰ ঋণাত্মক পৰীক্ষা প্ৰতিবেদন প্ৰস্তুত কৰিব লাগিব অন্যথা তেওঁলোকক মেঘালয়ৰ প্ৰৱেশ বিন্দুত পৰীক্ষা কৰা হ’ব। মুখ্যমন্ত্ৰীয়ে লগতে জনায় যে শ্বিলং চহৰ আৰু আন সকলো জিলাত নিশা ১০ বজাৰ পৰা পুৱা ৫ বজালৈ নাইট কাৰ্ফিউ পুনৰ জাৰি হ’ব। সৰ্বাধিক ১০০ জন লোক উপস্থিত থকাৰ সৈতে বিবাহৰ অনুমতি দিয়া হ’ব। আনহাতে সৰ্বাধিক ৫০ জন ব্যক্তিক অন্ত্যেষ্টিক্ৰিয়াৰ অনুমতি দিয়া হ’ব। তদুপৰি মুখ্যমন্ত্ৰীয়ে আশ্বাস দিয়ে যে কভিড বাঢ়িলেও চৰকাৰে নিশ্চিত কৰিব যে অৰ্থনৈতিক কাৰ্যকলাপসমূহ যাতে কম প্ৰভাৱিত হয় আৰু সুচাৰুৰূপে চলি থাকে।