আজি ৰাষ্ট্ৰীয় প্ৰেছ দিৱস। প্ৰতি বছৰে ১৬ নৱেম্বৰৰ দিনটোত সমগ্ৰ দেশত ৰাষ্ট্ৰীয় প্ৰেছ দিৱসৰূপে পালন কৰা হয়। এই দিৱসত দেশত এক স্বতন্ত্ৰ আৰু দায়িত্বশীল সংবাদ মাধ্যমৰ উপস্থিতিত ভাৰতীয় প্ৰেছ কাউন্সিলেও ভাৰতীয় প্ৰেছৰ ৰিপৰ্টৰ মানদণ্ড পৰীক্ষা কৰে আৰু সাংবাদিকতাৰ কাম-কাজৰ ওপৰত চকু ৰাখে।
১৯৫৬ চনত প্ৰথম প্ৰেছ আয়োগে বিধিগত কৰ্তৃত্ব থকা এটা সংস্থা গঠন কৰাৰ সিদ্ধান্ত লয় যাৰ দায়িত্ব আছিল সাংবাদিকতাৰ নৈতিকতা বজাই ৰখা। আয়োগে অনুভৱ কৰিছিল যে সংবাদ মাধ্যমৰ জনসাধাৰণৰ সৈতে সংযোগ স্থাপনৰ বাবে আৰু লগতে যিকোনো বিষয়ৰ ওপৰত মধ্যস্থতা কৰিবলৈ এটা পৰিচালনা সংস্থাৰ প্ৰয়োজন।
প্ৰেছ আয়োগে ভাৰতত সংবাদ মাধ্যমৰ স্বাধীনতা সুৰক্ষা কৰিবলৈ এটা প্ৰেছ কাউন্সিল গঠন কৰাৰ পৰিকল্পনা কৰিছিল। ১৯৬৬ চনৰ ৪ জুলাইত ভাৰতত প্ৰেছ কাউন্সিল স্থাপন কৰা হৈছিল যি সেই চনৰে ১৬ নৱেম্বৰৰ পৰা কাৰ্যকৰী হয়। সেয়েহে প্ৰতি বছৰে ১৬ নৱেম্বৰ দিনটোক ৰাষ্ট্ৰীয় প্ৰেছ দিৱস হিচাপে পালন কৰা হয়।
১৯৭৮ চনৰ প্ৰেছ কাউন্সিল আইনৰ অধীনত ১৯৬৬ চনত ভাৰতীয় প্ৰেছ কাউন্সিল গঠন কৰা হৈছিল।ভাৰতীয় প্ৰেছ কাউন্সিলৰ অফিচিয়েল ৱেবছাইট অনুসৰি, পৰম্পৰাগতভাৱে এই পৰিষদৰ অধ্যক্ষতা কৰে উচ্চতম ন্যায়ালয়ৰ এজন অৱসৰপ্ৰাপ্ত ন্যায়াধীশ আৰু ২৮ জন অতিৰিক্ত সদস্য যাৰ ভিতৰত ২০ জন ভাৰতত চলি থকা সংবাদ মাধ্যমৰ সদস্য। সংসদৰ সদনৰ পৰা পাঁচজন সদস্যক মনোনীত কৰা হয় আৰু বাকী তিনিজনে সাংস্কৃতিক, আইনী আৰু সাহিত্যিক ক্ষেত্ৰক প্ৰতিনিধিত্ব কৰে। বৰ্তমানৰ ভাৰতীয় প্ৰেছ কাউন্সিলৰ অধ্যক্ষ হিচাপে আছে ন্যায়াধীশ ৰঞ্জনা প্ৰসাদ দেশাই।