পৱিত্ৰ শাওণ মাহৰ অন্তিমটো সোমবাৰে শিৱক আৰধনা কৰা উদ্দেশ্যে আজি মাৰ্ঘেৰিটাৰ পৰাও তিনিচুকীয়া শিৱ ধামলৈ ‘বল বম যাত্ৰা’ উলিওৱা হয়। মাৰ্ঘেৰিটাৰ হিলভিউৰস্থিত বুঢ়ীদিহিং নৈৰ বল বম ঘাটত পানী তুলি হাজাৰ হাজাৰ শিৱ ভক্তই খোজ কাঢ়ি গৈ পুৱা তিনিচুকীয়া শিৱ ধামৰ শিৱ লিংগত পানী অৰ্পণ কৰিব। পৱিত্ৰ শাওণ মাহক হিন্দুসকলে আৰাধ্য দেৱতা মহাদেৱ শিৱৰ মাহ বুলি জ্ঞান কৰি আহিছে।
এই মাহত শিৱক পূজা-অৰ্চনা কৰি মনৰ কামনা পুৰণ হয় বুলি বিশ্বাস কৰে। মাৰ্ঘেৰিটা ৩১৫ নং ৰাষ্ট্ৰীয় ঘাইপথ আজি বল বম যাত্ৰাৰ বাবে সম্পূৰ্ণ ৰূপে গেৰুৱা হৈ পৰে। গেৰুৱা বসন পৰিধান কৰি শিৱ ভক্তসকলে মুখেৰে উচ্চাৰিক বল বম শব্দই সমগ্ৰ পথছোৱাত ভক্তিময় পৰিৱেশৰ সুচনা কৰে। ভক্তপ্ৰাণ ৰাইজৰ যাতে কোনো ধৰণৰ অসুবিধা নহয় তাৰ বাবে মাৰ্ঘেৰিটাৰ আৰক্ষীয়ে কটকটীয়া ব্যৱস্থা গ্ৰহণ কৰা পৰিলক্ষিত হৈছে।
