ছৌদি আৰৱৰ স্বাস্থ্য মন্ত্ৰালয়ে নিশ্চিত কৰিছে যে এই বছৰ হজ তীৰ্থযাত্ৰাৰ সময়ত গৰমৰ বাবে ক্লান্তি আৰু হিটষ্ট্ৰ’কত ভোগা লোকৰ সংখ্যা ক্ৰমাগতভাৱে বৃদ্ধি পাইছে।
মন্ত্ৰালয়ে এক বিবৃতিত কয় যে বৃহস্পতিবাৰে হিটষ্ট্ৰ’কত ভোগা লোকৰ সংখ্যা ১৭২১ জন হৈছে, যিটো মক্কা আৰু পবিত্ৰ স্থানৰ সকলো চিকিৎসালয়ৰ তাপ ক্লান্তি কেন্দ্ৰই নিৰীক্ষণ কৰিছিল বুলি ছৌদি গেজেট কাকতে প্ৰকাশ কৰিছে।
মক্কা মহানগৰীৰ প্ৰচণ্ড গৰমৰ মাজতে গৰমৰ বাবে অসমৰ কৰিমগঞ্জ জিলাৰ আন এজন হজ তীৰ্থযাত্ৰীৰ মৃত্যুৰ কথাও চৰ্চালৈ আহিছে।
সূত্ৰৰ পৰা পোৱা প্ৰাৰম্ভিক তথ্য অনুসৰি কৰিমগঞ্জৰ বদৰপুৰৰ স্থানীয় এজন অৱসৰপ্ৰাপ্ত শিক্ষক আবুল হুছেইনে বৃহস্পতিবাৰে মক্কাত শেষ নিশ্বাস ত্যাগ কৰে। শনিবাৰে তেওঁৰ মৃত্যুৰ খবৰ তেওঁৰ পৰিয়ালৰ লোকে লাভ কৰে।
তদুপৰি মক্কাত আন এক শোকাৱহ ঘটনা সংঘটিত হয়, য’ত নগাঁও জিলাৰ জুৰিয়াৰ পৰা আন এজন অৱসৰপ্ৰাপ্ত শিক্ষক ইউনিছ আলীৰো হজ যাত্ৰা কৰি থকা অৱস্থাত মৃত্যু হয়।