দিল্লীৰ নিৰ্ভয়া কাণ্ডৰ কথা আপোনাৰ নিচ্ছয় মনত আছে । নিৰ্ভয়াৰ ওপৰত চলন্ত বাছত কি দৰে চলিছিল অত্যাচাৰ । এইবাৰ তেনে নাৰকীয় নিৰ্যাতনৰ বলি হ’ল উত্তৰ প্ৰদেশৰ এগৰাকী মহিলা । মৰণোত্তৰ পৰীক্ষাৰ প্ৰতিবেদনত উল্লেখ কৰা অনুসৰি মহিলাগৰাকীৰ যৌনাংগত প্ৰচূৰ ৰক্তক্ষৰণ পোৱা গৈছে। বুকুৰ কামিহাড় আৰু ভৰিৰ হাড় ভাঙিছে ।মহিলাগৰাকীৰ ওপৰত দলবদ্ধ বলাৎকাৰৰ পিছত চলোৱা হৈছিল অমানৱীয় অত্যাচাৰ।
উত্তৰ প্ৰদেশৰ উঘাইতি থানাৰ অন্তৰ্গত বাদুৱান জিলাত সংঘটিত হৈছে এই জঘন্য ঘটনা। দেওবাৰে বিয়লি স্থানীয় এটা মন্দিৰলৈ গৈছিল মহিলাগৰাকী। কিন্তু ঘৰলৈ ঘূৰি নাহিল মহিলাগৰাকী।
স্থানীয় লোকে জনোৱা মতে, নিশা ১২ মান বজাত এখন চলন্ত গাড়ীৰ পৰা পেলাই দিয়া হয় ৰক্তাক্ত মহিলাগৰাকীক। মাজনিশাই মৃত্যু হয় নিৰ্যাতিতা মহিলাগৰাকীৰ। জনা গৈছে যে চৰম অত্যাচাৰৰ পিছত মহিলাগৰাকীক চিকিৎসাৰ বাবে লৈ গৈছিল অভিযুক্তসকলে।
মৃত মহিলাগৰাকীৰ আত্মীয়ই জনায় যে স্থানীয় থানাত যোগা়যোগ কৰাৰ পিছতো কোনো গুৰুত্ব দিয়া নাছিল। ১৮ ঘণ্টাৰ পিছত মহিলাগৰাকীৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হয়।
মৰণোত্তৰ পৰীক্ষাৰ প্ৰতিবেদনত উল্লেখ আছে, মহিলাগৰাকীৰ যৌনাংগত প্ৰচূৰ ৰক্তক্ষৰণ পোৱা গৈছে। বুকুৰ কামিহাড় আৰু ভৰিৰ হাড় ভাঙিছে। আনকি হাওফাওতো গধূৰ বস্তুৰে আঘাত কৰাৰ চিন স্পষ্ট। যাৰ ফলত শৰীৰৰ পৰাও প্ৰচূৰ ৰক্তক্ষৰণ হৈছে।
আৰক্ষীয়ে অৱশেষত দলবদ্ধ ধৰ্ষণ আৰু হত্যাৰ গোচৰ ৰুজু কৰি অভিযুক্তসকলৰ সন্ধানত অভিযান আৰম্ভ কৰে।