Breaking

শিৱসাগৰত পৈশাচিক কাণ্ড : মা কালীক সন্তুষ্টিৰ বাবে বলি দিবলৈ অনা ৫ টা দেব শিশুক উদ্ধাৰ

0 25

গেলেকী, ১৫নৱেম্বৰঃ শিৱসাগৰ জিলা অন্তৰ্গত ডিমৌমুখত এক ভয়ংকৰ ঘটনা সংঘটিত হোৱাৰ পৰা কথমপি ৰক্ষা পৰে । নিজৰ সন্তানক বলি দিবলৈ সাজু কৰিছিল দানৱ পিতৃয়ে । কালী পূজাৰ বাবে শনিবাৰে নিশা ১২ বজাত বলি দিবৰ বাবে সাজু কৰি থোৱা ৫ টা দেৱ শিশু জীৱন্তেই উদ্ধাৰ কৰা হয় । ৰাইজৰ তৎপৰতাত দেৱ শিশু কেইটাৰ প্ৰাণ ৰক্ষা পৰে ৷ এই ঘটনা সন্দৰ্ভত ৩ গৰাকী লোকক ৰাইজে আৱদ্ধ কৰি আৰক্ষীক গতাই দিয়ে । আৰক্ষীয়ে গ্ৰেপ্তাৰ কৰা লোক কেইজন হ’ল জমিউল হুছেইন, চৰিফুল হুছেইন আৰু আয়েছা বেগম । ইপিনে জমিউল হুছেইন আৰু চৰিফুল হুছেইন সম্পৰ্কত ককাই-ভাই বুলি জানিব পৰা গৈছে । শিৱসাগৰৰ বামবাৰী অঞ্চলৰ গাত কালি লম্ভা বুলি দাবী কৰা এগৰাকী মহিলা আৰু মৰাণৰ এটা বেজৰ নিৰ্দেশতেই কালী পূজাৰ নিশা ১২ বজাত বলি দিয়াৰ বাবে সাজু কৰা হৈছিল উক্ত ৫ টাকৈ দেৱ শিশুক । সম্প্ৰতি সচেতন ৰাইজৰ তৎপৰতাত দেৱ শিশু কেইটা ৰাইজে উদ্ধাৰ কৰিবলৈ সক্ষম হোৱাৰ ঘটনাই সমগ্ৰ শিৱসাগৰতেই সৃষ্টি কৰিছে তীব্ৰ চাঞ্চল্যৰ ৷ জানিব পৰা মতে মাটিৰ তলৰ ধন, সোণ লাভৰ অৰ্থে পৰিয়ালটোৰ অপায়-অমংগল দূৰ কৰাৰ বাবেই বেজ আৰু ছদ্মৱেশী কালীয়ে দিছিল নৰ বলিৰ এই নিৰ্দেশ ৷ সেই অনুসৰিয়েই দুস্কৃতিকাৰীকেইটাই বলিৰ বাবে সাজু কৰিছিল নিজ সন্তানক । সহজ ধনৰ লোভত নৰ বলিৰ বাবে দুস্কৃতিকাৰীকেইটাই নিজ সন্তান তথা দেৱ শিশু কেইটাক বলিৰ বাবে ডিমৌ মুখৰ জমিউলৰ ঘৰত সাজু কৰিছিল ৷ অৱশ্যে পূৰ্বৰে পৰা সমগ্ৰ ঘটনাৰ গতি বিধি লক্ষ্য কৰি থকা ডিমৌ মুখৰ স্থানীয় ৰাইজে দেৱ শিশু কেইটাক উদ্ধাৰ কৰি প্ৰাণ ৰক্ষা কৰিবলৈ সক্ষম হোৱাৰ পিছতেই ঘটনাৰ লগত জড়িত তিনি দুস্কৃতিকাৰীক ৰাইজে আৱদ্ধ কৰি গতাই দিয়ে শিৱসাগৰ জিলা সদৰ আৰক্ষী থানাক ৷ ধৃত তিনিওটা অভিযুক্তক আৰক্ষীয়ে শিৱসাগৰ সদৰ থানাত জেৰা অব্যাহত ৰাখিছে ।