অৰবিন্দ কেজৰিৱালৰ ডায়েট সন্দৰ্ভত চলি থকা বিতৰ্কক লৈ আজি (২২ এপ্ৰিল) ৰাউছ এভিনিউ ক’ৰ্টত এক গুৰুত্বপূৰ্ণ শুনানি অনুষ্ঠিত হ’ব। কাৰাবন্দী দিল্লীৰ মুখ্যমন্ত্ৰী অৰবিন্দ কেজৰিৱালৰ ডায়েট আৰু মেডিচিন সম্পৰ্কীয় আবেদন সন্দৰ্ভত আজি সিদ্ধান্ত লোৱা হ’ব। ডায়েবেটিছ ৰোগত আক্ৰান্ত অৰবিন্দ কেজৰিৱালে দৈনিক পৰামৰ্শৰ বাবে চিকিৎসকৰ পৰা অনুমতি বিচাৰিছে, যাৰ ওপৰত আজি ৰাউজ এভিনিউ আদালতে ৰায় দিব। আচলতে অৰবিন্দ কেজৰিৱালক ২১ মাৰ্চত দিল্লী সুৰা কেলেংকাৰীৰ গোচৰত বলবৎকাৰী সঞ্চালকালয়ে গ্ৰেপ্তাৰ কৰিছিল আৰু বৰ্তমান তেওঁ তিহাৰ জেলত আছে।
দিল্লীৰ সুৰা কেলেংকাৰীৰ গোচৰত ২১ মাৰ্চত বলবৎকাৰী সঞ্চালকালয়ে দিল্লীৰ মুখ্যমন্ত্ৰী অৰবিন্দ কেজৰিৱালক গ্ৰেপ্তাৰ কৰিছিল। ইয়াৰ পিছত আদালতে কেজৰিৱালক ২৮ মাৰ্চলৈ আৰু পুনৰ ১ এপ্ৰিললৈ ইডিৰ জিম্মালৈ প্ৰেৰণ কৰে। ১ এপ্ৰিলত যেতিয়া কেজৰিৱালক পুনৰ আদালতত হাজিৰ কৰা হয়, তেতিয়া তেওঁক ১৫ দিনৰ বাবে জেললৈ প্ৰেৰণ কৰা হয়।