কিয় ভাৰতলৈ নাহিলে বিশ্বৰ অন্যতম ধনী ব্যক্তি টেছলাৰ স্বত্বাধিকাৰী ইলন মাস্ক…
ভাৰতৰ ইলন মাস্কঃ বিশ্বৰ সৰ্ববৃহৎ ইলেক্ট্ৰিক গাড়ী নিৰ্মাতা তথা বিশ্বৰ অন্যতম ধনী ব্যক্তি টেছলাৰ স্বত্বাধিকাৰী ইলন মাস্কে ভাৰত ভ্ৰমণৰ সময় পিছুৱাই দিছে। ইলন মাস্কে ২১ আৰু ২২ এপ্ৰিলত প্ৰথমবাৰৰ বাবে ভাৰত ভ্ৰমণ কৰিবলগীয়া আছিল, যিটো তেওঁ এতিয়াৰ বাবে পিছুৱাই দিছে। মাস্কে নিজেই নিজৰ এক্স পোষ্টৰ জৰিয়তে এই কথা নিশ্চিত কৰিছে। ভাৰত ভ্ৰমণ বাতিল কৰাৰ আঁৰৰ কাৰণো দাঙি ধৰিছে মাস্কে।
ইলন মাস্কে এক্স পোষ্টৰ জৰিয়তে তথ্য দিলে
এই বিষয়ে তথ্য তেওঁৰ অফিচিয়েল এক্স হেণ্ডেলত শ্বেয়াৰ কৰি ইলন মাস্কে পোষ্ট কৰে যে টেছলাৰ কিছুমান ডাঙৰ দায়িত্বৰ বাবে তেওঁ বৰ্তমান ভাৰত ভ্ৰমণ পিছুৱাই দিছে। লগতে তেওঁ কয় যে চলিত বৰ্ষৰ শেষৰ ফালে ভাৰতলৈ আহিব ।
দৰাচলতে টেছলাৰ বিনিয়োগকাৰীৰ প্ৰশ্নৰ উত্তৰ দিবলৈ ২৩ এপ্ৰিলত আমেৰিকাত উপস্থিত থাকিব লাগিব ইলন মাস্ক। শেহতীয়াকৈ টেছলাই ত্ৰিমাসিক ফলাফল প্ৰকাশ কৰিছে। যোৱা কেইমাহমানত কোম্পানীটোৰ বিক্ৰী হ্ৰাসৰ সন্মুখীন হৈছে। এনে পৰিস্থিতিত কোম্পানীটোৰ বিনিয়োগকাৰী আৰু শ্বেয়াৰহোল্ডাৰসকল চিন্তিত হৈ পৰিছে। ২১-২২ এপ্ৰিলত যদি মাস্ক ভাৰতত থাকিলহেঁতেন তেন্তে ২৩ এপ্ৰিলত বিনিয়োগকাৰীৰ আহ্বানত তেওঁৰ বাবে উপস্থিত থকাটো কঠিন হ’লহেঁতেন।
উল্লেখযোগ্য যে ভাৰত ভ্ৰমণৰ সময়ত ইলন মাস্কে ভাৰতত মেনুফেকচাৰিং ইউনিট আৰু চেটেলাইট যোগাযোগৰ দৰে টেছলাৰ বাবে বহু পৰিকল্পনা ঘোষণা কৰিবলৈ ওলাইছিল। সংবাদ মাধ্যমৰ বাতৰিয়ে দাবী কৰিছিল যে তেওঁ ভাৰতত ২৫ হাজাৰ কোটি টকা বিনিয়োগৰ কথা ঘোষণা কৰিব পাৰে।