তেলেংগানাৰ পৰা ২০২৪ চনৰ লোকসভা নিৰ্বাচনত প্ৰতিদ্বন্দিতা কৰিব নেকি ছোনিয়া গান্ধীয়ে? চলিছে চৰ্চা…

দিল্লীৰ ৰাজনৈতিক মহলত এতিয়া তেলেংগানাৰ পৰা ছোনিয়া গান্ধীয়ে লোকসভাৰ প্ৰাৰ্থিত্ব গ্ৰহণ কৰিব বুলি গুঞ্জন উঠিছে। গুঞ্জনটো তেলেংগানা কংগ্ৰেছ নেতাসকলৰ মন্তব্যৰ আধাৰতে সৃষ্টি হৈছে। তেলেংগানাৰ বহু কংগ্ৰেছ নেতাই ছোনিয়া গান্ধীয়ে তেওঁলোকৰ ৰাজ্যখনৰ পৰা প্ৰতিদ্বন্দিতা কৰাটো বিচাৰিছে। কংগ্ৰেছ নেতাসকলৰ অভিমত যে প্ৰাক্তন প্ৰধানমন্ত্ৰী ইন্দিৰা গান্ধীয়েও মেডাক আসনৰ পৰা প্ৰতিদ্বন্দিতা কৰিছিল । একেদৰে তেলেংগানা গঠনৰ কৃতিত্ব লাভৰ বাবে যোগ্য ছোনিয়াই এইবাৰ ৰাজ্যখনৰ পৰা নিৰ্বাচনত প্ৰতিদ্বন্দিতা কৰিব লাগে বুলি তেওঁলোকে আলোচনা কৰি আহিছে। তেলেংগানাৰ মুখ্যমন্ত্ৰী ৰেৱন্ত ৰেড্ডীয়েও ছোনিয়া গান্ধীক ৰাজ্যখনৰ পৰা প্ৰতিদ্বন্দিতা কৰিবলৈ আহ্বান জনাইছে।

কংগ্ৰেছৰ প্ৰাক্তন সভাপতি ৰাহুল গান্ধীয়ে ইতিমধ্যে ২০১৯ চনৰ পৰা ৱায়ানাডলৈ স্থানান্তৰিত হৈছিল। সেই সময়ত তেওঁ দুখন আসনৰ পৰা প্ৰতিদ্বন্দিতা কৰিছিল – আমেঠি আৰু ৱায়ানাড । কংগ্ৰেছে আমেঠিত গণভিত্তি হেৰুওৱাৰ বুলি চৰ্চা চলি আহিছে। এতিয়া ৰাজনৈতিক পণ্ডিতসকলে কৈছে যে কংগ্ৰেছে ২০২৪ চনৰ নিৰ্বাচনত উত্তৰ প্ৰদেশত ইয়াৰ একমাত্ৰ লোকসভা আসন খন হেৰুৱাব পাৰিব পাৰে। ছোনিয়া গান্ধীয়ে ২০১৯ চনত উত্তৰ প্ৰদেশৰ ৰায়বৰেলী আসনত জয়লাভ কৰিছিল । কিন্তু বিশেষজ্ঞসকলৰ মতে এইবাৰ আসনখন তেওঁৰ বাবে সুৰক্ষিত নহ’বও পাৰে।আনকি জন কি বাতৰ প্ৰতিষ্ঠাপক প্ৰদীপ ভাণ্ডাৰীয়েও ৰায়বৰেলীৰ ৰাজনৈতিক পটৰ জৰীপ কৰি দাবী কৰিছে যে এইবাৰ ছোনিয়া গান্ধীয়ে তেওঁৰ আসন হেৰুওৱাৰ ৯০ শতাংশ আশংকা আছে। বিজেপিয়ে এইবাৰ আসনখনৰ পৰা ছোনিয়া গান্ধীৰ বিৰুদ্ধে শক্তিশালী প্ৰাৰ্থী থিয় কৰোৱাৰ সম্ভাৱনা আছে। গেৰুৱা দলটোৱে ৰাম মন্দিৰৰ ঢৌ আৰু মোদী চৰকাৰৰ সমাজ কল্যাণমূলক পদক্ষেপ যেনে উজ্জ্বলা আঁচনি আৰু বিনামূলীয়া ৰেচন আঁচনিৰ প্ৰচাৰেৰে উত্তৰ প্ৰদেশৰ ৮০ খন আসনতে প্ৰত্যাহ্বানৰ সৃষ্টি কৰাৰ সম্ভাৱনা আছে।