“আমি অতীজক পাহৰি যাব নালাগে। সেই অতীজক অধ্যয়ন কৰাৰ পৰিৱেশন এটি সৃষ্টি কৰিব খুজিছে অসম সাহিত্য সভাই। অতীজক যিয়ে অধ্যয়ন কৰিব পাৰে, তেনে জাতিয়ে সমন্বয় ৰক্ষা কৰিব পাৰে। অসমৰ ভাষিক আৰু সাংস্কৃতিক বুনিয়াদ গঠিত হৈছে জনগোষ্ঠীয় সম্পদসমূহেৰে। বানাই জনগোষ্ঠীৰ দৰে জনজাতিসমূহৰ ঐতিহ্যহ× আমাৰ সামগ্ৰিক সাংস্কৃতিক পৰিচয়ক সমৃদ্ধ কৰি আহিছে। এনেধৰণৰ সমাৱেশে তেওঁলোকৰ ভাষা-সংস্কৃতি সংৰক্ষণৰ ক্ষেত্ৰত এক গুৰুত্বপূৰ্ণ পদক্ষেপ ল’ব।” অসম সাহিত্য সভাৰ উদ্যোগত পোনপ্ৰথমবাৰৰ বাবে সভাৰ গুৱাহাটী কাৰ্যালয়ৰ ভগৱতীপ্ৰসাদ বৰুৱা ভৱনৰ সংগীতাচাৰ্য্য লক্ষ্মীৰাম বৰুৱা সদনত অসমৰ প্ৰাচীন বানাই জনগোষ্ঠীৰ এক বৌদ্ধিক আৰু সাংস্কৃতিক সমাৱেশত মুখ্য অতিথি হিচাপে উপস্থিত থাকি সভাৰ সভাপতি ড০ বসন্তকুমাৰ গোস্বামীয়ে এই মন্তব্য কৰে। সভাৰ প্ৰধানসম্পাদক দেৱজিৎ বৰাই উদ্দেশ্যৰ কথকতা প্ৰসংগত কয় যে— “অসমীয়া ক্ষীণকায় দুৰ্বল জাতি নহয়। পাহাৰে ভৈয়ামে বসতি স্থাপন কৰি থকা সকলো জাতি-জনগোষ্ঠীৰ সমন্বয়ত অসমীয়া জাতি আৰু অসমীয়া ভাষা আজি সমৃদ্ধ হৈছে। বিশ্বৰ বুকুত আজি অসমীয়া সবল শক্তিমান জাতি। জুবিন গাৰ্গৰ মৃত্যুৰ পাছত জাতিয়ে নিজৰ পৰিচয়েৰে শক্তিমন্ত ৰূপটো প্ৰদৰ্শন কৰিলে।” ইফালে বিশিষ্ট অতিথি হিচাপে সদৌ অসম বানাই উন্নয়ন সমিতি প্ৰাক্তন সভাপতি সুবিন্দ্ৰ বানাই, উপ-সভাপতি ধৰ্মৰাজ বানাই, সম্পাদক জগেশ্বৰ বানায়ে অংশগ্ৰহণ কৰি অসম সাহিত্য সভাৰ এই গুৰুত্বপূৰ্ণ উদ্যোগক ভূয়সী প্ৰশংসা কৰে আৰু বানাই জনগোষ্ঠীৰ উন্নয়ন আৰু স্বীকৃতিৰ ক্ষেত্ৰত এনে পদক্ষেপৰ প্ৰয়োজনীয়তাৰ কথা ভাষণ প্ৰসংগত উল্লেখ কৰে।
আজিৰ এই অনুষ্ঠানতে বিশিষ্ট সাংবাদিক, শিক্ষক মুন কুমাৰ ডেকাৰ ‘বানাই জনগোষ্ঠী ঃ ইতিহাস, সমাজ আৰু সংস্কৃতি’ নামৰ এখন গ্ৰন্থ উন্মোচন কৰে অসম সাহিত্য সভাৰ প্ৰাক্তন প্ৰধানসম্পাদক যাদৱ চন্দ্ৰ শৰ্মাই। গ্ৰন্থখন উন্মোচন কৰি তেখেতে ভাষণ প্ৰসংগত— “বানাই জনগোষ্ঠীৰ ইতিহাস, সমাজ আৰু সংস্কৃতি সম্পৰ্কীয় এহ× গ্ৰন্থখন এক গুৰুত্বপূৰ্ণ দলিল হিচাপে পৰিগণিত হ’ব। এনে প্ৰয়াসে ৰাজ্যখনৰ উপেক্ষিত জনগোষ্ঠীসমূহৰ স্বকীয় পৰিচয় সংৰক্ষণ আৰু আগন্তুক প্ৰজন্মৰ বাবে বিশেষ ভূমিকা গ্ৰহণ কৰিব। লগতে, মুন কুমাৰ ডেকাৰ এই প্ৰচেষ্টা প্ৰশংসনীয়। এনে গৱেষণামূলক গ্ৰন্থ অসমৰ সামগ্ৰিক সাংস্কৃতিক ঐতিহ্যক অধিক সমৃদ্ধ কৰি তুলিব বুলি ভাষণ প্ৰসংগত উল্লেখ কৰে।” উল্লেখ্য যে আজিৰ এই অনুষ্ঠানতে বানাই জনগোষ্ঠীটোৰ নেতৃবৃন্দৰ দ্বাৰা আমন্ত্ৰণ কৰি অনা বিশিষ্ট সাংবাদিকসকলক এটি বিশেষ সম্বৰ্ধনা জ্ঞাপন কৰা হয়।
সম্বৰ্ধিত সাংবাদিকসকল হৈছে ক্ৰমে— দৈনন্দিন বাৰ্তাৰ মুখ্য সম্পাদক তথা সাহিত্যিক আৰু সাংবাদিক পেন্সনাৰ ড০ নৰেন হাজৰিকা, প্ৰতিদিন টাইমছৰ ৰাজনৈতিক সম্পাদক তথা লেখক-প্ৰবন্ধকাৰ নয়নপ্ৰতীম কুমাৰ, NEWS18 অসম Northeast-ৰ ডেপুটি নিউজ এডিটৰ তথা লেখক নৱজিৎ ভাগৱতী, প্ৰতিভাশালী লেখক, ‘তুমি ঐনিতম হৈ বাণী থকা’ কাব্যগ্ৰন্থৰ স্ৰষ্টা, গল্পকাৰ তথা দৈনিক অসমৰ বাৰ্তা সম্পাদক মনোৰঞ্জন বড়ি, গুৱাহাটী বিশ্ববিদ্যালয়ৰ শ্ৰেষ্ঠ তাৰ্কিক, ঔপন্যাসিক, কবি, গল্পকাৰ তথা নিউজ লাইভৰ কাৰ্যবাহী সম্পাদক লুইত নীল ডন, প্ৰাগ নিউজৰ সহযোগী সম্পাদক, বিশিষ্ট লেখক, সাংবাদিক খনীন্দ্ৰ কুমাৰ ডেকা, Assam Talks-ৰ Chief of Bureu খালিদ্জ জামান চৌধুৰী, উদীয়মান লেখিকা তথা অসমীয়া প্ৰতিদিনৰ উপসম্পাদক দীপশিখা ডেকা, DY365-ৰ প্ৰবীণ সাংবাদিক দীপ হাজৰিকা, এন. কে. টিভিৰ জ্যেষ্ঠ সাংবাদিক, কবি, লেখক, গল্পকাৰ বশিষ্ঠদেৱ ফুকন, Dainik Ganaadhikar-ৰ Staff Reporter বসন্ত দাস, আমাৰ অসমৰ জ্যেষ্ঠ ষ্টাফ ৰিপৰ্টাৰ, লেখক অতুল কুমাৰ বৰ্মন, Chief of Bureau at Northeast Live অৰিন্দম দাস, দৈনিক জনভূমিৰ চিফ ৰিপৰ্টাৰ অমল গোস্বামী, নিয়মীয়া বাৰ্তাৰ উপ-সম্পাদক অজিত কুমাৰ চহৰীয়া, দ্যা আসাম ট্ৰিবিউনৰ বিশিষ্ট সাংবাদিক সঞ্জয় ৰয়, দৈনিক পূৰ্বাঞ্চল প্ৰহৰীৰ প্ৰবীণ সাংবাদিক সদন মোহন মহাৰাজ, ND24-ৰ ৰাজনৈতিক সম্পাদক পংকজ প্ৰতিম বৰা আদি।
ইফালে অনুষ্ঠানৰ মাজে মাজে বানাই সমাজৰ দ্বাৰা— গোলিকাঞ্চি মানা নৃত্য, ৰোৱ লাগা নৃত্য আৰু অক্ষিতা কাশ্যপৰ কৃষ্ণনৃত্য ইত্যাদি পৰিৱেশন কৰা হয়। আনহাতে উক্ত অনুষ্ঠানতে মঃ গাজিউল হাচান, আয়েচা চিদ্দিকাক বিশেষ সম্বৰ্ধনা জ্ঞাপন কৰা হয়। অনুষ্ঠানত গুৱাহাটী কাৰ্যালয়ৰ সম্পাদক ড০ সঞ্জীৱ কুমাৰ শৰ্মা, কৰ্ণধাৰ সমিতিৰ সদস্য ধীৰেন শৰ্মা, মঙলদৈ আঞ্চলিক কাৰ্যালয়ৰ সম্পাদক বসন্ত দাস, মঙ্গলচণ্ডী ব্ৰহ্ম ভাষা গৱেষণা প্ৰতিষ্ঠানৰ আহ্বায়ক অখিল কলিতা, মাতৃভাষা আৰু ৰাজ্যভাষা প্ৰয়োগ উপসমিতিৰ আহ্বায়ক ৰাণা আলম, জালাহ আঞ্চলিক কাৰ্যালয়ৰ সম্পাদক নয়নমণি চৌধুৰী, সভাৰ প্ৰাক্তন ধনভঁৰালী মিহিৰ কুমাৰ বৰুৱা, পৰিৱেশ্য কলা সংৰক্ষণ সংবৰ্ধন উপসমিতিৰ আহ্বায়ক চৈয়দ মাৰুফ হুছেইন, উপসভাপতি তৃষ্ণা মহন্ত শইকীয়া, তথ্য প্ৰযুক্তি উপসমিতিৰ আহ্বায়ক স্বৰ্গজ্যোতি চেতিয়া, জনগোষ্ঠীয় ইতিহাস প্ৰণয়ন উপসমিতিৰ কাৰ্যকৰী সভাপতি হৰ্ষ দাস, আহ্বায়ক হেৰম্ব কলিতা, সদস্য ড০ চন্দ্ৰকমল চেতিয়া, দন্দ্বি বৰা, স্বজাতীয় মৈত্ৰীবন্ধন উপসমিতিৰ সহযোগী আহ্বায়ক সুশীল ডেকা আদি উপস্থিত থকা অনুষ্ঠানটি জাতীয় সংগীত পৰিৱেশনেৰে সভাৰ সামৰণি পৰে।
