চিলাপথাৰত সাৰথিৰ উদ্যোগত ষষ্ঠ বাৰ্ষিক বসন্ত সমাৰোহ আৰু কবি সমাৰোহ সম্পন্ন। বিগত বৰ্ষবোৰৰ দৰেই এই বছৰো চিলাপথাৰৰ স্বেচ্ছাসেৱী সংস্থা সাৰথিৰ উদ্যোগত আৰু বিভিন্ন জাতি-জনগোষ্ঠী ৰাইজৰ সহযোগত এদিনীয়া কাৰ্যসূচীৰে বসন্ত সমাৰোহ আৰু বসন্তৰ কবি সমাৰোহখনি সফলভাৱে সামৰণি পৰে। সমাজৰ দুখীয়া-নিচলা, নিসহায় আৰু দিবাংগসকলক সহায় কৰা লক্ষ্যৰে ১২-১১-২০২০ চনতে গঠন হোৱা স্বেচ্ছাসেৱী সংস্থা সাৰথিয়ে সেই দূৰ্গতসকলক সহায় কৰাৰ সামান্তুৰালভাৱে শিল্পী দিৱস, বিষ্ণু ৰাভা দিৱস, ভূপেন হাজৰিকাৰ জন্ম আৰু মৃত্যু দিৱসৰ লগতে প্ৰতিবছৰে পৰম্পৰাগত ৰঙালী বিহু উদযাপন কৰি আহিছে। চিলাপথাৰ প্ৰবীণ ক্ৰীড়া বাকৰিত আয়োজিত ষষ্ঠ বাৰ্ষিক বসন্ত সমাৰোহত আজি পুৱা ৯ বজাত বিহু পতাকা উত্তোলন কৰে উদযাপন সমিতিৰ সভাপতি ভুবন দাসে আৰু সাৰথিৰ পতাকা উত্তোলন কৰে সাৰথিৰ সভাপতি মনোজ দাসে।
স্মৃতি তৰ্পণ কৰে টুটুমণি হাজৰিকা আৰু ৰাজীন মণ্ডলে। জুবিন গাৰ্গৰ প্ৰতিচ্ছবিত মাল্যৰ্পণ কৰে সাৰথিৰ উপ-সভাপতি মঞ্জু দাসে। ইয়াৰ পিছতে ব’হাগ বিহুৰ পৰম্পৰা অনুসৰি সাৰথিৰ কোষাধ্যক্ষ জুৰি গগৈ দাসৰ নেতৃত্বত দ্বিশতাধিক জেষ্ঠ ব্যক্তিক সাৰথিৰ বিষয়ববীয়াই বস্ত্ৰদান কৰি আশীৰ্বাদ গ্ৰহণ কৰাৰ পিছত সকলোকে বিহুৰ পিঠা আৰু জলপান গ্ৰহণ কৰায়। দুপৰীয়া ১১-৩০ বজাৰপৰা উদযাপন সমিতিৰ সভাপতি ভুবন দাসৰ সভাপতিত্বত অনুষ্ঠিত হোৱা মুকলি সভাখন আঁত ধৰে সাৰথিৰ মুখ্য সচিব বিনীতা চেতিয়াই । বিশিষ্ট অতিথি হিচাপে অংশ গ্ৰহণ কৰে দাপোনৰ ভাষাৰ গৱেষক ড° উত্তম দাস , চিলাপথাৰ মহাবিদ্যালয়ৰ সহকাৰী অধ্যাপক প্ৰাঞ্জল দাস, অৱসৰপ্ৰাপ্ত কৃতী শিক্ষক গোপাল চন্দ্ৰ দেৱ আৰু সমাজ সেৱক উচমান আলিয়ে।
লগতে বসন্তৰ কবি সমাৰোহখনি আঁতধৰে সাৰথিৰ সভাপতি মনোজ দাসে আৰু উদ্বোধন কৰে চিলাপথাৰৰ বিশিষ্ট কবি ভাগ্যৱতী দত্ত ভূঞাই। আদৰণী সমিতিৰ সভাপতি ভুবন দাসে আদৰণী ভাষণ পাঠ কৰাৰ পিছত বিশিষ্ট কবি, প্ৰকৃতিকৰ্মী তোষেশ্বৰ মিৰি আগৰৱালাই কবি সমাৰোহখনি সঞ্চালনা কৰে আৰু মুখ্য অতিথি হিচাপে উপস্থিত থাকে দৈনন্দিন বাৰ্তা কাকতৰ কাৰ্যবাহী সম্পাদক ডিম্পুল কুমাৰ চুতীয়াই। বিশিষ্ট কবি বিপুল শৰ্মা, নবীন বুঢ়াগোঁহাই , অঞ্জুমণি গগৈ, কানন পেগু, পংকজ দাস,মেদিনিমোহন বৰুৱা, ঐজ্যোতি চুতীয়া, যোগ গগৈ, ৰয়েল পেগু, বিজয় বৰি, জীপেন দলে, হৰিকান্ত পেগুৱে কবিতা পাঠ আৰু মঞ্জু দাসে বিহু নাম পৰিৱেশন কৰি কবি সমাৰোহখনি জীপাল কৰি তোলে।
