দুদিনীয়া ভ্ৰমণ সূচীৰে অসমলৈ ৰাষ্ট্ৰীয় স্বয়ংসেৱক সংঘৰ সৰসংঘচালক ডা: মোহন ভাগৱত; মাজুলীত সত্ৰাধিকাৰ -সন্ত সন্মিলনত কৰিব অংশগ্ৰহণ
ৰাষ্ট্ৰীয় স্বয়ংসেৱক সংঘৰ সৰসংঘচালক ডাঃ মোহন ভাগৱত দুদিনীয়া ভ্ৰমণ সূচীৰে অসমলৈ আহিব। অহা ২৭ ডিচেম্বৰত অসমত পদাৰ্পণ কৰি ২৮ আৰু ২৯ ডিচেম্বৰত দুদিনীয়াকৈ মাজুলীত কেবাটাও কাৰ্যসূচীত সৰসংঘচালক গৰাকীয়ে অংশগ্ৰহণ কৰিব ৷
অহা ২৭ ডিচেম্বৰত ৰাষ্ট্ৰীয় স্বয়ংসেৱক সংঘৰ সৰসংঘচালক ডা: মোহন ভাগৱতে বিমানযোগে ডিব্ৰুগড়ত অৱতৰণ কৰি পোনে পোনে মাজুলীত উপস্হিত হ’ব বুলি ৰাষ্ট্ৰীয় স্বয়ংসেৱক সংঘৰ উত্তৰ অসম প্ৰান্তৰ প্ৰচাৰ প্ৰমুখ কিশোৰ শিৱমে এক প্ৰেছ বিজ্ঞপ্তি যোগে জানিবলৈ দিছে।
উল্লেখ্য, ২৮ ডিচেম্বৰৰ পুৱা সৰসংঘচালক গৰাকীয়ে মাজুলীৰ উত্তৰ কমলাবাৰী সত্ৰত সমগ্ৰ অসমৰ সত্ৰাধিকাৰ, সন্ত আৰু ধৰ্মগুৰু সকলৰ এক সন্মিলনত অংশগ্ৰহণ কৰিব ৷ উক্ত সন্মিলনৰ বাবে ইতিমধ্যে সমগ্ৰ অসমৰ সকলোবোৰ সত্ৰাধিকাৰ, সন্ত আৰু বিভিন্ন পন্হৰ ধৰ্মগুৰু সকলক নিমন্ত্ৰণ কৰা হৈছে ৷ সিদিনাই আবেলিৰ ভাগত সৰসংঘচালক গৰাকীয়ে এক শাৰিৰীক কাৰ্যক্ৰমত অংশ লৈ মাজুলী কেবাখনো সত্ৰ দৰ্শন কৰিব ৷
২৯ ডিচেম্বৰৰ পুৱা পুনৰায় ডা:মোহন ভাগৱতে মাজুলী আন কেবাখনো সত্ৰ দৰ্শন কৰাৰ পিছত আবেলি গড়মুৰ সত্ৰৰ মিনি ষ্টেডিয়ামত এক বিশাল ৰাজহুৱা সভাত বৌদ্ধিক প্ৰদান কৰিব ৷ উল্লেখ্য, ৰাষ্ট্ৰীয় স্বয়ংসেৱক সংঘৰ সৰসংঘচালক ডা: মোহন ভাগৱতে পোন প্ৰথমবাৰৰ বাবে সত্ৰনগৰী মাজুলী দৰ্শন কৰিব ৷
ৰাষ্ট্ৰীয় স্বয়ংসেৱক সংঘৰ প্ৰান্ত প্ৰচাৰ প্ৰমুখ কিশোৰ শিৱমে জানিবলৈ দিয়া অনুসৰি সৰসংঘচালক ডাঃ মোহন ভাগৱতৰ লগতে বিভিন্ন স্হানৰ সত্ৰাধিকাৰ,সন্ত আৰু ধৰ্মগুৰু সকলৰ মাজুলী আগমনৰ বাবে সকলো প্ৰকাৰৰ কাম-কাজ প্ৰায় সম্পূৰ্ণ হৈ উঠিছে ৷