পশ্চিম এছিয়াত অব্যাহত থকা সংঘাতৰ মাজতে দেশবাসীক বিশেষ আহ্বান জনালে প্ৰধানমন্ত্ৰী Narendra Modi-এ। পেট্ৰ’ল, ডিজেল আৰু LPG কম পৰিমাণে আৰু মিতব্যয়ীভাৱে ব্যৱহাৰ কৰিবলৈ দেশবাসীক আহ্বান জনাই একপ্ৰকাৰ ইন্ধনৰ মূল্যবৃদ্ধিৰ সম্ভাৱনাৰ ইংগিত দিলে প্ৰধানমন্ত্ৰীয়ে।
তেলেংগানাত অনুষ্ঠিত এক জনসভাত ভাষণ প্ৰদান কৰি প্ৰধানমন্ত্ৰী মোদীয়ে কয় যে, ইৰাণ যুদ্ধ আৰু পশ্চিম এছিয়াৰ অস্থিৰ পৰিস্থিতিৰ ফলত বিশ্বজুৰি খাৰুৱা তেলৰ যোগান আৰু মূল্যৰ ওপৰত চাপ বৃদ্ধি পাইছে। এনে পৰিস্থিতিত ভাৰতৰ দৰে আমদানিনিৰ্ভৰ দেশসমূহে সাৱধানতা অৱলম্বন কৰাটো অত্যন্ত প্ৰয়োজনীয়।
প্ৰধানমন্ত্ৰীয়ে কয়, “দেশৰ বাবে কেৱল প্ৰাণ আহুতি দিয়াটোৱেই দেশভক্তি নহয়, দেশৰ প্ৰতি নিজৰ দায়িত্ব আৰু কৰ্তব্য সঠিকভাৱে পালন কৰাটোও দেশভক্তি। এনে সংকটৰ সময়ত আমি পেট্ৰ’ল-ডিজেল সঠিকভাৱে ব্যৱহাৰ কৰাৰ সংকল্প ল’ব লাগিব।”
ইয়াৰ লগতে পেট্ৰ’ল-ডিজেলচালিত যানবাহনৰ ব্যৱহাৰ হ্ৰাস কৰাৰ বাবেও দেশবাসীক আহ্বান জনায় মোদীয়ে। যিসকল চহৰত মেট্ৰ’ বা বাছসেৱা উপলব্ধ আছে, তেওঁলোকক ৰাজহুৱা পৰিবহণ ব্যৱহাৰ কৰিবলৈ পৰামৰ্শ দিয়ে। আনহাতে ব্যক্তিগত গাড়ী ব্যৱহাৰ কৰিলে আন লোককো লগত লৈ যোৱাৰ পৰামৰ্শ আগবঢ়ায় তেওঁ।
ইফালে ইলেকট্ৰিক বাহন ব্যৱহাৰৰ ওপৰতো বিশেষ গুৰুত্ব আৰোপ কৰে প্ৰধানমন্ত্ৰীয়ে। তেওঁ কয়, “আমাৰ দেশত বৃহৎ খাৰুৱা তেলৰ ভাণ্ডাৰ নাই। সেয়ে বিদেশৰ পৰা খাৰুৱা তেল, LPG আৰু সাৰৰ আমদানি কৰিবলগীয়া হয়। এনে পৰিস্থিতিত তেলচালিত বাহনৰ ব্যৱহাৰ কমোৱাটো সময়ৰ দাবী।”
উল্লেখযোগ্যভাৱে, বিদেশী মুদ্ৰা সংৰক্ষণৰ কথাও উল্লেখ কৰি প্ৰধানমন্ত্ৰী মোদীয়ে দেশবাসীক এবছৰলৈ সোণ ক্ৰয় নকৰিবলৈ আহ্বান জনায়। দেশৰ আৰ্থিক স্বাৰ্থ সুৰক্ষিত ৰাখিবলৈ সকলোৱে দায়িত্বশীল আচৰণ কৰা উচিত বুলিও মন্তব্য কৰে তেওঁ।
