বলীউডৰ প্ৰখ্যাত অভিনেতা নানা পাটেকাৰৰ দেহাৱসান
বলীউড আৰু মাৰাঠী চলচ্চিত্ৰ জগতৰ প্ৰখ্যাত অভিনেতা নানা পাটেকাৰ আৰু নাই। ৭৫ বছৰ বয়সত বৃহস্পতিবাৰে পুৱা গোৱাত দেহাৱসান ঘটে জ্যেষ্ঠ অভিনেতাগৰাকীৰ। গোৱাৰ ড’না পাউলাস্থিত নিজ বাসগৃহত অচেতন অৱস্থাত উদ্ধাৰ কৰাৰ পাছত তেওঁক ততাতৈয়াকৈ মণিপাল হাস্পতাললৈ নিয়া হৈছিল। চিকিৎসালয়ত চিকিৎসকে প্ৰায় ৪৫ মিনিট ধৰি CPR দি তেওঁক পুনৰুজ্জীৱিত কৰাৰ চেষ্টা কৰে যদিও সফল নহ’ল। পুৱা প্ৰায় ৫.২০ বজাত তেওঁক মৃত ঘোষণা কৰা হয়।
চিকিৎসালয়ৰ সূত্ৰ অনুসৰি, নানা পাটেকাৰৰ মৃত্যুৰ কাৰণ তীব্ৰ কাৰ্ডিয়াক এৰেষ্ট। প্ৰকাশিত তথ্য অনুসৰি, পুৱতি নিশা অসুস্থ অনুভৱ কৰাৰ পাছত অভিনেতাগৰাকীৰ অৱস্থা হঠাৎ সংকটজনক হৈ পৰে। পিছত তেওঁক বাসগৃহত অচেতন অৱস্থাত পোৱা যায় আৰু চিকিৎসালয়লৈ লৈ যোৱা হয়।
চিকিৎসকে প্ৰায় ৪৫ মিনিট ধৰি CPR চলাইছিল যদিও তেওঁৰ হৃদযন্ত্ৰৰ স্বাভাৱিক কাৰ্যকলাপ ঘূৰাই আনিব পৰা নগ’ল। এই আকস্মিক মৃত্যুৰ খবৰে বলীউড, মাৰাঠী চলচ্চিত্ৰ জগত আৰু তেওঁৰ অগণন অনুৰাগীৰ মাজত গভীৰ শোকৰ সৃষ্টি কৰিছে।
পাঁচ দশকৰ অভিনয় জীৱন
নানা পাটেকাৰে হিন্দী আৰু মাৰাঠী চলচ্চিত্ৰত প্ৰায় পাঁচ দশক ধৰি অভিনয় কৰি ভাৰতীয় চলচ্চিত্ৰত এক সুকীয়া স্থান দখল কৰিছিল। ১৯৭৮ চনৰ ‘গমন’ ছবিৰ জৰিয়তে চলচ্চিত্ৰত আত্মপ্ৰকাশ কৰা অভিনেতাগৰাকীয়ে পৰৱৰ্তী সময়ত ‘পৰিন্দা’, ‘প্ৰহাৰ’, ‘ক্ৰান্তিবীৰ’, ‘অগ্নিসাক্ষী’, ‘খামোশী: দ্য মিউজিকেল’, ‘আব তক ছাপ্পান’, ‘নটসম্ৰাট’ আৰু ‘ৱেলকাম’ৰ দৰে ছবিত স্মৰণীয় অভিনয় আগবঢ়ায়।
তেওঁৰ শক্তিশালী অভিনয়, তীক্ষ্ণ সংলাপ উপস্থাপন আৰু চৰিত্ৰৰ সৈতে একাত্ম হৈ পৰাৰ বিশেষ ক্ষমতাই তেওঁক আন অভিনেতাৰ পৰা পৃথক পৰিচয় দিছিল। গুৰুতৰ আৰু তীব্ৰ চৰিত্ৰৰ লগতে হাস্যৰসাত্মক ভূমিকাতো তেওঁ সমানেই জনপ্ৰিয় হৈছিল।
অভিনয়ৰ স্বীকৃতি হিচাপে নানা পাটেকাৰে তিনিবাৰ ৰাষ্ট্ৰীয় চলচ্চিত্ৰ বঁটা লাভ কৰাৰ লগতে ২০১৩ চনত পদ্মশ্ৰী সন্মান লাভ কৰিছিল।
মৃত্যুৰ পূৰ্বলৈকে সক্ৰিয় আছিল অভিনেতাগৰাকী
জীৱনৰ শেষ পৰ্যায়তো নানা পাটেকাৰ চলচ্চিত্ৰ আৰু বিভিন্ন ৰাজহুৱা অনুষ্ঠানত সক্ৰিয় হৈ আছিল। ২০২৬ চনত তেওঁ বিশাল ভৰদ্বাজৰ ‘O Romeo’ ছবিত শ্বাহিদ কাপুৰ আৰু তৃপ্তি ডিমৰীৰ সৈতে অভিনয় কৰিছিল। ইয়াৰ উপৰি ‘Subedaar’ আৰু ‘Housefull 5’তো তেওঁক দেখা গৈছিল।
মৃত্যুৰ মাত্ৰ কেইদিনমান পূৰ্বে, ৪ অক্টোবৰত গোৱাৰ এটা ৰাজহুৱা অনুষ্ঠানতো অংশ লৈছিল নানা পাটেকাৰে। সেই অনুষ্ঠানত জীৱন আৰু সময়ৰ বিষয়ে কৰা তেওঁৰ মন্তব্য এতিয়া বিশেষভাৱে চৰ্চিত হৈছে।
নানা পাটেকাৰৰ আকস্মিক বিয়োগে ভাৰতীয় চলচ্চিত্ৰ জগতত এক গভীৰ শূন্যতাৰ সৃষ্টি কৰিলে। শক্তিশালী অভিনয় আৰু স্বকীয় ব্যক্তিত্বৰে দৰ্শকৰ মনত স্থায়ী আসন গঢ়ি যোৱা এইগৰাকী অভিনেতাক এতিয়া অনুৰাগী আৰু সহকৰ্মীসকলে শ্ৰদ্ধাৰে স্মৰণ কৰিছে।
