সংসদৰ বিশেষ অধিৱেশনত আজি মহিলাসকলৰ বাবে ৩৩ শতাংশ আসন সংৰক্ষণৰ প্ৰস্তাৱ থকা নাৰী শক্তি বিধেয়ক উত্থাপন কৰা হয়। এই উপলক্ষে প্ৰধানমন্ত্ৰী নৰেন্দ্ৰ মোদী-এ কয়, “আমাৰ মাতৃ-ভগ্নীৰ প্ৰতি সন্মান মানে দেশৰ প্ৰতি সন্মান,” আৰু এই পদক্ষেপক দেশৰ বাবে এক ‘ঐতিহাসিক’ পদক্ষেপ বুলি অভিহিত কৰে।
আজিৰে পৰা আৰম্ভ হোৱা তিনিদিনীয়া বিশেষ অধিৱেশনত এই গুৰুত্বপূৰ্ণ বিধেয়ক উত্থাপন কৰা হৈছে। চৰকাৰৰ মতে, প্ৰশাসনিক ক্ষেত্ৰত মহিলাৰ অংশগ্ৰহণ অধিক শক্তিশালী কৰাৰ লক্ষ্যৰে এই পদক্ষেপ গ্ৰহণ কৰা হৈছে।
প্ৰস্তাৱ অনুসৰি, দেশজুৰি আসন পুনৰ্গঠন (Delimitation) প্ৰক্ৰিয়াৰ জৰিয়তে লোকসভাৰ মুঠ আসন বৰ্তমানৰ ৫৪৩খনৰ পৰা প্ৰায় ৮৫০খনলৈ বৃদ্ধি কৰাৰ পৰিকল্পনা কৰা হৈছে। ইয়াৰ ভিতৰত ৩৩ শতাংশ আসন মহিলাৰ বাবে সংৰক্ষিত হ’ব। অৰ্থাৎ, প্ৰায় ১৮১খন (বৰ্তমানৰ আসনৰ হিচাপত) বা পুনৰ্গঠনৰ পিছত প্ৰায় ২৭৩খন আসন মহিলাসকলৰ বাবে সংৰক্ষণ কৰাৰ সম্ভাৱনা আছে।
সংবাদ সংস্থা ANI-ৰ সূত্ৰ অনুসৰি, এই নতুন প্ৰস্তাৱত ৰাজ্যসমূহৰ বাবে ৮১৫খন আৰু কেন্দ্ৰীয় শাসিত অঞ্চলসমূহৰ বাবে ৩৫খন আসন নিৰ্ধাৰণ কৰাৰ কথা উল্লেখ কৰা হৈছে।
অৱশ্যে, এই বিধেয়কক লৈ বিৰোধী দলসমূহে তীব্ৰ আপত্তি প্ৰকাশ কৰিছে। তেওঁলোকৰ অভিযোগ অনুসৰি, ২০২৯ চনৰ পূৰ্বে ৰাজনৈতিক সুবিধা লাভ কৰাৰ লক্ষ্যৰে এই প্ৰস্তাৱ আগবঢ়োৱা হৈছে।
বিশেষকৈ পশ্চিম বংগত, মমতা বেনাৰ্জী-ৰ নেতৃত্বত তৃণমূল কংগ্ৰেছ-এ এই বিধেয়কৰ বিৰোধিতা কৰিবলৈ সাজু হৈছে। খবৰ অনুসৰি, দলটোৰ কমেও ২০গৰাকী সাংসদে সংসদত উপস্থিত থাকি এই প্ৰস্তাৱৰ বিৰোধিতা কৰিব।
বৰ্তমান, নাৰী শক্তি বিধেয়কক লৈ দেশজুৰি ৰাজনৈতিক বিতৰ্ক তীব্ৰ হৈ উঠিছে আৰু ইয়াৰ চূড়ান্ত সিদ্ধান্তলৈ সকলোৰে দৃষ্টি নিবদ্ধ হৈ আছে।
