ভাৰতত প্ৰৱেশৰ বাবে অপেক্ষাত পাকিস্তান সমৰ্থিত ২৫০-৩০০ সন্ত্ৰাসবাদী ৷

0 1,012

দৈনন্দিন বাৰ্তা ডেস্ক :

সীমান্ত পাৰ হৈ ভাৰতত প্ৰৱেশৰ বাবে ২৫০-৩০০ সন্ত্ৰাসবাদী অপেক্ষা কৰি আছে বুলি শনিবাৰে ভাৰতীয় সেনাই সতৰ্ক কৰি দিছে ৷ জম্মু আৰু কাশ্মীৰ সীমান্তৰ দুটা ছেক্টৰত ভাৰতীয় জোৱানৰ ওপৰত আক্ৰমণৰ চেষ্টা চলাইছে পাকিস্তানৰ বৰ্ডাৰ একচন টিমে ৷ সম্প্ৰতি চোৰাংচোৱাৰ সূত্ৰত এই খবৰ পোৱাৰ পাছত নিয়ন্ত্ৰণ ৰেখাত ভাৰতীয় নিৰাপত্তাৰক্ষীয়ে তীব্ৰ দৃষ্টি নিক্ষেপ কৰিছে ৷ পাকিস্তানৰ আৰ্শীবাদপুষ্ট বিভিন্ন সন্ত্ৰাসবাদী সংগঠনৰ সদস্য ভাৰতত অনুপ্ৰৱেশৰ বাবে এই পৰিকল্পনা লৈছে বুলি জানিব পৰা গৈছে ৷ চোৰাংচোৱা সূত্ৰৰ মতে জম্মু আৰু কাশ্মীৰৰ ভীমবাৰ গালি আৰু নৌসেৰা ছেক্টৰত বহু সংখ্যক সন্ত্ৰাসবাদী ভাৰতত সোমাবৰ বাবে অপেক্ষা কৰি আছে৷ সন্ত্ৰাসবাদীবোৰক এই কামত সহায় কৰিছে পাকিস্তানী সেনাই ৷ সেই কাৰণে বৰ্ডাৰ একচন টিমৰ সদস্যসকলক সেই এলেকাবোৰত মোতায়েন কৰা হৈছে ৷ ইতিমধ্যে এই বিষয়ত ভাৰতীয় সেনা আৰু বিএছএফক সতৰ্ক কৰি দিয়া হৈছে ৷ বিএছএফৰ এজন উচ্চ পদস্থ বিষয়াই জনোৱা মতে কেইটামান সপ্তাহৰ আগতে এনে সতৰ্কবাৰ্তা অহা নাছিল ৷ আগৰ দৰেই তীক্ষ্ণ দৃষ্টি দি থকা হৈছিল৷ কিন্তু চোৰাংচোৱাৰ এই খবৰ পোৱাৰ পাছত পৰিস্থিতি সলনি হৈ গৈছে ৷ সীমান্তত থকা জোৱানসকলক সতৰ্ক কৰাৰ লগতে তীক্ষ্ণ নজৰ দিবলৈ কোৱা হৈছে৷ বিশেষকৈ ভীমবাৰ গালি আৰু নৌসেৰা ছেক্টৰত কঠোৰ নিৰাপত্তা ব্যৱস্থা গঢ় তুলি জোৱানৰ সংখ্যা বৃদ্ধি কৰা হৈছে৷ পাকিস্তানে যদি কোনো দুঃসাহস দেখুৱাই তেতিয়া যোগ্য প্ৰত্যুত্তৰ দিয়া হ’ব বুলি বিষয়াজনে কয় ৷