ওদালগুৰি জিলাৰ উত্তৰ পূৱ কোনত অৱস্থিত মাজবাট এতিয়া ভাং সৰবৰাহকাৰীৰ বাবে আন্তঃৰাষ্ট্ৰীয় কৰিদৰ হৈ উঠিছে। অৰুণাচল পাহাৰৰ পৰা দৈনিক সৰবৰাহ হৈছে লাখ লাখ টকাৰ নিষিদ্ধ ভাং, গাঞ্জা আৰু অৰুণাচলী সুৰা। আৰক্ষী প্ৰশাসনে দৈনিক এই অবৈধ ব্যৱসায়ী তথা ভাং , গাঞ্জা আৰু অৰুণাচলী সুৰা জব্দ কৰি আহিছে যদিও বৰ্তমানো সম্পূৰ্ণ ৰোধ কৰিব পৰা নাই। ৫ জানুৱাৰী নিশা ২৭২ কেজি ভাংসহ এজন ভাং সৰবৰাহকাৰীক আটক কৰাৰ পিছত যোৱা নিশা পুণৰ মাজবাট আৰক্ষীয়ে অভিযান চলাই বৃহৎ পৰিমাণৰ ভাং জব্দ কৰিবলৈ সমৰ্থ হয়। জানিব পৰামতে আজি পুৱতি নিশা মাজবাট আৰক্ষী থানাৰ এচ আই কুশল চন্দ্ৰ নাথ আৰু লালপানী আৰক্ষী চকীৰ আই চি প্ৰনৱ বৰুৱাৰ নেতৃত্বত যোৱা এটা আৰক্ষীৰ দলে অসম – অৰুণাচল সীমান্তৰ নিজৰা চেন্টাৰ এলেকাৰ বনগাঁও হাদাংগুৰীৰ নিকটৱৰ্তী ঘন হাবিৰ মাজেৰে পাহাৰৰ পৰা ভাং সৰবৰাহ কৰি থকা অৱস্থাত বৃহৎ পৰিমাণৰ ভাং জব্দ কৰিবলৈ সমৰ্থ হয়।
সৰবৰাহকাৰীৰ দলটোৱে উক্ত অঞ্চলত আৰক্ষী প্ৰৱেশ কৰাৰ উমান পায় ভাং সমূহ এৰি নিশাৰ আন্ধাৰৰ সুযোগ লৈ ঘন অৰণ্যৰ মাজলৈ পলাই যায়। পিছত আৰক্ষীয়ে জব্দ কৰা বৃহৎ পৰিমাণৰ ভাংখিনি মাজবাট আৰক্ষী থানালৈ লৈ আহে। ইতিমধ্যে মাজবাট আৰক্ষীয়ে ৩/২৪ নম্বৰত কেচ এটা ৰুজু কৰি তদন্ত অব্যাহত ৰাখিছে। জব্দ কৰা ভাংখিনিৰ আনুমানিক মূল্য প্ৰায় ৫৭ লাখ টকা হ’ব বুলি আৰক্ষীয়ে জানিবলৈ দিয়ে।
