টীয়কৰ জগদুৱাৰ-বনাই পথৰ নিবাসী অৱসৰপ্ৰাপ্ত শিক্ষক যজ্ঞোৰাম কলিতা আৰু নিৰু কলিতাৰ একমাত্ৰ সন্তান মধুসূদন কলিতাই যোৰহাট চিকিৎসা মহাবিদ্যালয়ৰ পৰা সদ্য ঘোষিত এম.বি. বি. এছ.পাঠ্যক্ৰমৰ চূড়ান্ত পৰীক্ষাত অসমৰ ভিতৰত তৃতীয় স্থান লাভ কৰি উত্তীৰ্ণ হ’বলৈ সক্ষম হৈছে। খবৰটো বিয়পাৰ লগে লগে সমগ্ৰ টীয়কবাসী উৎফুল্লিত হৈ পৰিছে আৰু এয়া সকলোৰে বাবে অতি গৌৰৱৰ দিন বুলি অভিহিত কৰিছে।
উল্লেখযোগ্য যে জীৱনৰ আদিপাঠ বান বিধস্ত অঞ্চল ৰূপহীমুখৰ এখন প্ৰাথমিক বিদ্যালয়ৰ পৰা পাতনি মেলি পৰবৰ্তী সময়ত টীয়কৰ অন্যতম অগ্ৰণী শিক্ষানুষ্ঠান জ্যোতি বিদ্যাপীঠৰ পৰা সুখ্যাতিৰে মেট্ৰিক আৰু ডিব্ৰুগড়ৰ ছল্ট ব্ৰুক একাডেমীৰ পৰা হায়াৰ চেকেণ্ডেৰীত উত্তীৰ্ণ হৈ যোৰহাট চিকিৎসা মহাবিদ্যালয়ত নামভৰ্তি কৰি আজি এম বি বি এছৰ চূড়ান্ত পৰীক্ষাত এইদৰে ৰাজ্যৰ ভিতৰত তৃতীয় স্থান দখল কৰি নিজৰ মেধাশক্তিৰ পৰিচয় দাঙি ধৰিছে। ইপিনে ভৱিষ্যতে এগৰাকী মেডিচিন বিভাগৰ চিকিৎসক হিচাপে কাম কৰি বিশেষকৈ গ্ৰামাঞ্চলসমূহত চিকিৎসা সেৱা আগবঢ়াই ৰাইজক সেৱা কৰি যোৱাৰ আশা প্ৰকাশ কৰিছে ছাত্ৰ মধুসূদন কলিতাই আৰু এই ক্ষেত্ৰত সকলোৰে আশীৰ্বাদ কামনা কৰিছে।
