মিৰ্জাত ২ যুৱকৰ প্ৰশংসনীয় পদক্ষেপ।
নামখলা
ক’ৰোনা ভাইৰাছে বৰ্তমান সমগ্ৰ বিশ্বতে সংহাৰী ৰূপ ধাৰণ কৰিছে। এই মহামাৰীৰ পৰা অঞ্চলবাসীক ৰক্ষাৰ উদ্দেশ্যে গুৰুত্বপূৰ্ণ পদক্ষেপ গ্ৰহণ কৰিছে মিৰ্জাৰ দুজন উদ্যমী যুৱক মদন দাস আৰু মিতু দাসে৷ সম্পূৰ্ণ নিজাববীয়া প্ৰচেষ্টাৰে ল’কডাউনৰ সময়তে মিৰ্জাৰ মামনি ৰয়চম গোস্বামী চকৰ পৰা আৰম্ভ কৰি মিৰ্জা বজাৰ আদিৰ উপৰি অঞ্চলটোৰ বিভিন্ন গুৰুত্বপূৰ্ণ ঠাইত ছেনিটাইজ কৰা হয়। এই ছেনিটাইজেচনৰ সৈতে জড়িত হয় মিৰ্জাৰ অগ্নিনিৰ্বাপক বাহিনীৰ লোকসকল৷ এই ছেনিটাইজ কাৰ্যসূচীত মিৰ্জা ব্যৱসায়িক সন্থাৰ সদস্যসকল, যুৱ ব্যৱসায়ী কমল কৃষ্ণ দাসৰ উপৰি বিভিন্নজন সচেতন লোকে সহযোগিতা আগবঢ়ায়৷ উল্লেখযোগ্য যে এই ছেনিটাইজেচনৰ কাৰ্যৰ লগত সংগতি ৰাখি মিৰ্জাৰ কমল ইলেক্ট্ৰনিক্সৰ স্বতাধিকাৰী কমল ঠাকুৰীয়াই এটা সম্বৰ্দ্ধনা কাৰ্যসূচী ৰূপায়ণ কৰে, য’ত নিজৰ জীৱনকো তুচ্ছজ্ঞান কৰি জৰুৰী সেৱাৰ সৈতে জড়িত হৈ সেৱা আগবঢ়াই থকা আৰক্ষী প্ৰশাসনৰ লোকসকল লগতে সংবাদ মাধ্যমৰ সৈতে জড়িত ব্যক্তিসকলক একোখন কৈ ফুলাম গামোচা, মাস্ক আৰু ছেনিটাইজাৰে সম্বৰ্দ্ধনা জ্ঞাপন কৰে। ইয়াৰ উপৰি অগ্নিনিৰ্বাপক বাহিনীৰ বিষয়াসকলক সম্বৰ্দ্ধনা জনোৱাৰ লগতে ট্ৰেইনত গান গাই পৰিয়াল পোহপাল দিয়া বিশেষভাৱে সক্ষম যুৱক প্ৰদীপ শংকৰক এখন ফুলাম গামোচাৰে সম্বৰ্দ্ধনা জনোৱাৰ উপৰি এটা খাদ্য সামগ্ৰীৰ টোপোলা আগবঢ়াই পলাশবাৰী আৰক্ষীৰ ভাৰপ্ৰাপ্ত বিষয়া সত্যেন্দ্ৰ সিং হাজেৰীয়ে। আনহাতে আৰক্ষী বিষয়া গৰাকীয়ে যুৱকজনক আৰ্থিকভাৱে সহায় কৰাৰ বাবে প্ৰতিশ্ৰুতি প্ৰদান কৰে।