অনন্য স্বাদভৰা (Recipe) স্বাস্থ্যকৰ ৰেচিপিঃ কল পচলাৰে মাছ পাতত দিয়া। আমাৰ বহুতো থলুৱা সুস্বাদু ব্যঞ্জন আছে। আজি আপোনালোকৰ বাবে লৈ আহিছোঁ কল পচলাৰে মাছ পাতত দিয়া –
উপকৰণসমূহ হৈছে-
মিহিকৈ কাটি লোৱা পচলা একাপ
পেটি মাছ তিনি টুকুৰা
পিয়াজ এটা
ভোট জলকীয়া আধা টুকুৰা (ইচ্ছানুসৰি অন্য জলকীয়াও দিব পাৰে)
জালুক গুৰি আধা চামুচ
নেমু ৰস এক চামুচ
আদা নহৰু পেষ্ট এক চামুচ
মানধনীয়া পাত তিনি চাৰি খিলা
নিমখ (সোৱাদ মতে)
মিঠা তেল এক টেবুল চামুচ
ৰন্ধন প্ৰণালী –
প্ৰথমতে মাছ তিনি টুকুৰা সৰু সৰুকৈ কাটি ল’ব । এটা বাতিত মাছখিনি লৈ তাতে নিমখ, নেমুৰ ৰস, জালুকৰ গুৰি সানি দহ মিনিটমান ঢাকি ৰাখিব। পিয়াজ মিহিকৈ কাটি ল’ব। বিলাহী পুৰি লৈ ওপৰৰ ক’লা চাইখিনি আঁতৰাই ল’ব। এটা পাত্ৰত পচলা আৰু পিয়াজখিনি লৈ খুব ভালকৈ হাতেৰে মোহাৰি ল’ব, যাতে মিহি হৈ পৰে। তাতে বিলাহীটোও পিটিকি দিব। আদা নহৰু পেষ্ট, সামান্য নিমখ (যিহেতু মাছত ইতিমধ্যে নিমখ সনা আছেই, মিঠা তেল সানি তাত জলকীয়া আৰু মান ধনীয়া মিহিকৈ কুটি দি মাছখিনি মিলাই ভালকৈ সানি ল’ব। এতিয়া এখন আঠিয়া কলৰ কলপাত লৈ জুইত সেকি লেৰেলাই ল’ব। তাৰ পিছত পাতখনত সানি লোৱা মিশ্ৰণখিনি দি প্ৰথমতে দুয়োকাষে মেৰিয়াই পিছত বাকী দুটা কাষ মেৰিয়াই কলৰ ৰচীৰে বান্ধি ল’ব। গেছত টাৱাখন গৰম হ’বলৈ দিব। তাতে মাছৰ টোপোলাটো দি ওপৰত এখন ঢাকোন দি এটা গধুৰ বস্তুৰে বা পাকঘৰতে থকা শিলপতাৰ গুটিটোৰে হেঁচা দি ৰাখিব। কম জুইত ৰাখিব। মাজে মাজে টোপোলাটো ইলুটি-সিলুটি কৰি দিব। যেতিয়া দেখিব যে কলপাত পুৰি গৈছে- জানিব যে মাছখিনি সিজিলে। এইখিনিৰ হৈ উঠিবৰ বাবে আধা ঘণ্টাৰ অলপ বেছি সময় লাগে। খাই চাব- বৰ সোৱাদযুক্ত হয়।
প্ৰেৰক – ৰুবী দত্ত
গাঁও – হিছিঙলীয়া, ধলপুৰ
জিলা – লক্ষীমপুৰ
পিন – ৭৮৪১৬৫
