Assam Cabinet । অসম চৰকাৰৰ কেবিনেট বৈঠকঃ ৪ লাখ চাহ জনজাতি পৰিয়ালক মাটি পট্টা, শিক্ষকৰ বদলিৰ নিয়মত গুৰুত্বপূৰ্ণ পৰিৱর্তন
গুৱাহাটী, ২৩ অক্টোবৰঃ
আজি মুখ্যমন্ত্ৰী ডঃ হিমন্ত বিশ্ব শৰ্মাৰ অধ্যক্ষত অনুষ্ঠিত হয় অসম চৰকাৰৰ কেবিনেট বৈঠক। বৈঠকৰ অন্তত অনুষ্ঠিত সংবাদমেলত মুখ্যমন্ত্ৰীয়ে কেবিনেটত গ্ৰহণ কৰা কেইবাটাও গুৰুত্বপূৰ্ণ সিদ্ধান্তৰ বিষয়ে বিস্তৃত বিৱৰণ দিয়ে।
🔹 কেবিনেটৰ মুখ্য সিদ্ধান্তসমূহঃ
১. বিধানসভা অধিবেশন
- অসম বিধানসভাৰ শীতকালীন অধিবেশন আৰম্ভ হ’ব ২৫ নবেম্বৰৰ পৰা।
- অধিবেশনত উত্থাপন হ’বলগীয়া বিধেয়কসমূহক লৈ কেবিনেটত আলোচনা কৰা হয়।
২. শিক্ষকৰ বদলিৰ ক্ষেত্ৰত নতুন নিয়ম
- চৰকাৰী বিদ্যালয়ৰ শিক্ষয়িত্রীসকলে এতিয়া ৫ বছৰৰ পিছত বদলিৰ বাবে আবেদন কৰিব পাৰিব (পূৰ্বে ১০ বছৰৰ নিয়ম আছিল)।
- শিক্ষকসকলে ৭ বছৰৰ পিছত বদলিৰ আবেদন কৰিব পাৰিব (পূৰ্বে ১০ বছৰৰ নিয়ম)।
- এই সিদ্ধান্তৰ জৰিয়তে শিক্ষানুষ্ঠানসমূহত বদলিৰ প্ৰক্ৰিয়া অধিক ন্যায়সঙ্গত আৰু সুকলমীয়া হ’ব বুলি আশা কৰা হৈছে।
৩. জনজাতি আৰু চাহ জনজাতি লোকৰ বাবে বিশেষ সিদ্ধান্ত
- চৰকাৰে ঘোষণা কৰিছে যে জনসংখ্যা নীতিৰ আওতাৰ পৰা চাহ জনজাতি, মৰাণ আৰু মটক জনগোষ্ঠীক বাহিৰত ৰখা হ’ব।
- চাহ জনগোষ্ঠীৰ লোকক মাটিৰ পট্টা দিয়াৰ ক্ষেত্ৰত কেবিনেটে এক ঐতিহাসিক সিদ্ধান্ত গ্ৰহণ কৰিছে।
- মুঠ ২.৯০ লাখ বিঘা ভূমি চাহ জনজাতি লোকৰ মাজত বিতৰণ কৰিব পাৰিব।
- এই উদ্যোগত ৪ লাখ পৰিয়ালক মাটিৰ অধিকাৰ দিয়া হ’ব।
- কেবিনেটে এই প্ৰস্তাৱক একমতভাৱে সমৰ্থন জনায়।
৪. আগন্তুক বৈঠক আৰু পৰ্যায়
- ২৫ অক্টোবৰত জিলা উপায়ুক্ত আৰু বিধায়কসকলৰ সৈতে মুখ্যমন্ত্ৰীৰ বৈঠক অনুষ্ঠিত হ’ব।
- উক্ত বৈঠকত পৰিয়ালপিছু কিমান ভূমি দিয়া হ’ব সেই সম্পৰ্কে চূড়ান্ত সিদ্ধান্ত লোৱা হ’ব।
- ইয়াৰ পূৰ্বে ২-৩ নবেম্বৰত চাহ জনগোষ্ঠীয় সংগঠনসমূহৰ সৈতে আলোচনা অনুষ্ঠিত হ’ব।
৫. নেলী নৰসংহাৰৰ প্ৰতিবেদন
- তিৱাৰী কমিছনৰ প্রতিবেদন অসম বিধানসভাত দাখিল কৰা হ’ব বুলি কেবিনেটে সিদ্ধান্ত গ্ৰহণ কৰিছে।
