‘ৰৈ ৰৈ বিনালে’ চিনেমাখন (Roi Roi Binale) চোৱাৰ সময়ত চিনেমা হলত দেখা গ’ল এটা বিশেষ দৃশ্য। গৰিমা আৰু পামীৰ মাজত খালী ৰখা হ’ল এখন বিশেষ আসন।
জুবিন গাৰ্গক মাজত বহুৱাই ‘ৰৈ ৰৈ বিনালে’ চালে গৰিমা শইকীয়া গাৰ্গ, পামী বৰঠাকুৰে। শুকুৰবাৰে সন্ধিয়া ফাঁচীবজাৰস্থিত ‘কেলভিন চিনেমাজ’ত চিনেমাখন চালে জুবিন গাৰ্গৰ পত্নী গৰিমা শইকীয়া গাৰ্গে। ৰৈ ৰৈ বিনালে চাই গৰিমা শইকীয়া গাৰ্গে ক’লে, ‘জুবিনৰ সপোন বাস্তৱায়িত হ’ল, চিনেমাখন বহুত সাহস গোটাই চাবলৈ যাব ওলাইছোঁ’।
‘টীম ৰৈ ৰৈ বিনালে’ৰ সৈতে চিনেমাখন চালে গৰিমাই। লগত উপস্থিত থকা দেখা গ’ল জুবিন গাৰ্গৰ ভগ্নী পামী বৰঠাকুৰকো।
ছবিখন চাই সামাজিক মাধ্যমত গৰিমা শইকীয়া গাৰ্গে সামাজিক মাধ্যমত লিখিলে জীৱনৰ যাত্ৰা তোমাতেই বিলীন….।
ৰৈ ৰৈ বিনালে চাই জুবিন গাৰ্গৰ সহশিল্পী জুবলী বৰুৱাই ক’লে গল্ডীদা বিশ্বৰ প্ৰথমগৰাকী ব্যক্তি, যি গুচি যোৱাৰ পাছতো সকলো কাম সম্ভৱ কৰি তুলিছে।
জুবিন গাৰ্গৰ সপোনৰ চিনেমা ‘ৰৈ ৰৈ বিনালে’ চোৱাৰ পাছতেই আৱেগিক হৈ পৰিছে অসমবাসী। শুকুৰবাৰৰ দিনটোত ৰাজ্যত দেখা গ’ল অভূতপূৰ্ব পৰিবেশ। প্ৰায় এসপ্তাহলৈ হাউছফুল ৰাজ্যৰ প্ৰায় প্ৰতিটো চিনেমাহল। প্ৰাণৰ শিল্পীগৰাকীৰ চিনেমাখন চাবলৈ লৱৰি আহিছে অসমৰ জনগণ।
ৰৈ ৰৈ বিনালে চাবলৈ আহি আছু সভাপতি উৎপল শৰ্মা কয় প্ৰাণৰ শিল্পী গৰাকীক শেষবাৰৰ বাবে ৰূপালী পৰ্দাত জীৱন্ত ৰূপত চাবলৈ অসমৰ মানুহ ওলাই আহিছে।
ছবিখন চাই সামাজিক মাধ্যমত আঙুৰলতা ডেকাই ক’লে মনত বহুত সাহস গোটাই আপোনাক শেষ বাৰৰ কাৰণে চালো দাদা…একেলগে কাম কৰাৰ লগতে একেলগে চিনেমাখন চোৱাৰো বহুত হেপাঁহ আছিল… নহ’লগৈ! ৰৈ ৰৈ কেৱল কান্দিছোঁ আৰু মোৰ দৰেই আজি কান্দিছে অগণন মানুহে… কান্দিছে প্ৰকৃতিয়ে…৷
