২০২৬ চনৰ অসম বিধানসভা নিৰ্বাচনক লক্ষ্য কৰি বিজেপিয়ে কৌশলগত তৎপৰতা বৃদ্ধি কৰাৰ মাজতে দলৰ ৰাষ্ট্ৰীয় কাৰ্যকৰী সভাপতি নীতিন নবীনে দুদিনীয়া ভ্ৰমণসূচীৰে বৃহস্পতিবাৰে অসমত উপস্থিত হয়। ৰাষ্ট্ৰীয় পদ গ্ৰহণ কৰাৰ পিছত এইটোৱেই তেওঁৰ প্ৰথম অসম ভ্ৰমণ।
লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত নীতিন নবীনক দলীয় কৰ্মীসকলে উষ্ম সম্বৰ্ধনা জনায়। তাৰ পিছতেই তেওঁ গুৱাহাটীত অনুষ্ঠিত হোৱা বিজেপিৰ ৰাজ্যিক কাৰ্যনিৰ্বাহক সভাত অংশগ্ৰহণ কৰে। এই সভাত সাম্প্ৰতিক ৰাজনৈতিক পৰিস্থিতিৰ বিশ্লেষণ, সংগঠনিক গঠন শক্তিশালীকৰণ, লগতে আগন্তুক বিধানসভা নিৰ্বাচনৰ বাবে কৌশল নিৰ্ধাৰণৰ ওপৰত বিস্তৃত আলোচনা কৰা হয়।
বিজেপিৰ ৰাজ্যিক নেতাসকলৰ মতে, এই বৈঠকৰ মূল লক্ষ্য হৈছে ২০২৬ চনৰ বিধানসভা নিৰ্বাচনৰ বাবে এক সুসংহত আৰু সুদৃঢ় ৰোডমেপ প্ৰস্তুত কৰা। শ্ৰীমন্ত শংকৰদেৱ কলাক্ষেত্ৰত অনুষ্ঠিত সভাত মুখ্যমন্ত্ৰী ড° হিমন্ত বিশ্ব শৰ্মাই বিশেষ ভাষণ প্ৰদান কৰে। সভাত ৰাজ্যিক বিজেপিৰ সভাপতি দিলীপ শইকীয়াৰ সভাপতিত্বত সাংসদ, বিধায়ক, ৰাজ্যিক বিষয়ববীয়া, কাৰ্যবাহী সদস্য তথা প্ৰায় ৮০০ গৰাকী দলীয় কৰ্মীয়ে অংশগ্ৰহণ কৰে।
বিজেপি অসম প্ৰদেশৰ উপ-সভাপতি মনোজ বৰুৱাই জানিবলৈ দিয়া মতে, ৰাজ্যিক কাৰ্যনিৰ্বাহক সভাত সংগঠনৰ ভিতৰুৱা মূল্যায়নৰ লগতে নিৰ্বাচনী কৌশল, নীতি আৰু ভৱিষ্যৎ কৰণীয়ৰ ওপৰত বিস্তৃত আলোচনা কৰা হৈছে। আগন্তুক মাৰ্চ–এপ্ৰিল মাহত অনুষ্ঠিত হ’বলগীয়া বিধানসভা নিৰ্বাচনৰ বাবে এই বৈঠকসমূহ অতি গুৰুত্বপূৰ্ণ বুলি তেওঁ উল্লেখ কৰে।
উল্লেখযোগ্য যে, ২৭ ডিচেম্বৰত ৰাজ্যিক নিৰ্বাচন পৰিচালনা সমিতি আৰু ইস্তাহাৰ খচৰা প্ৰস্তুত সমিতিৰ বৈঠকো অনুষ্ঠিত হ’ব। ৪৫ বছৰীয়া নীতিন নবীনক ১৪ ডিচেম্বৰত বিজেপিৰ ৰাষ্ট্ৰীয় কাৰ্যকৰী সভাপতি হিচাপে নিযুক্তি দিয়া হৈছিল। দলীয় নেতৃত্বই এই নিযুক্তিক প্ৰধানমন্ত্ৰী নৰেন্দ্ৰ মোদীৰ ‘বিকশিত ভাৰত ২০৪৭’ দৃষ্টিভংগীৰ সৈতে সংযুক্ত এক গুৰুত্বপূৰ্ণ পদক্ষেপ হিচাপে চিহ্নিত কৰিছে।
