মাজুলীৰ এজন কংগ্ৰেছ দলৰ সক্ৰিয় কৰ্মী অজয় নৰহে দুখৰ সময়ত দলীয় সহায় নাপোৱাৰ অভিযোগ উত্থাপন কৰাৰ পাছত ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাৰ হস্তক্ষেপত তেওঁ ঋণমুক্ত হোৱাৰ ঘটনা লৈ অঞ্চলজুৰি চর্চা আৰম্ভ হৈছে।
প্ৰাপ্ত তথ্য অনুসৰি, মাজুলীৰ বাসিন্দা যদিও কৰ্মসূত্ৰে গোৱাত বাস কৰা অজয় নৰহৰ পত্নীৰ ২০২৫ চনত আকস্মিক মৃত্যু হয়। পত্নীৰ মৃত্যুৰ সময়ত অজয় গোৱাত থকা বাবে তৎক্ষণাৎ অসমলৈ উভতি অহাত আৰ্থিক অসুবিধাৰ সন্মুখীন হয়। অভিযোগ অনুসৰি, ঘৰলৈ আহিবলৈ প্ৰয়োজনীয় ধনৰ অভাৱত তেওঁ এজন ব্যক্তিৰ পৰা সুতত ১৬,৫০০ টকা ধাৰ লৈ অসমলৈ উভতি আহে।
উল্লেখযোগ্য যে, অজয় নৰহ আৰু তেওঁৰ পত্নী দুয়ো কংগ্ৰেছ দলৰ সক্ৰিয় সমৰ্থক আছিল। যোৱা পঞ্চায়ত নিৰ্বাচনত তেওঁৰ পত্নী কংগ্ৰেছ দলৰ পৰা ৱাৰ্ড সদস্য হিচাপে নিৰ্বাচিত হৈছিল। লোকসভা নিৰ্বাচনৰ সময়ছোৱাতো অজয়ে কংগ্ৰেছ আৰু সাংসদ গৌৰৱ গগৈৰ সমৰ্থনত সক্ৰিয়ভাৱে কাম কৰিছিল বুলি জানিব পৰা গৈছে।
অজয়ৰ দাবী অনুসৰি, ঘৰলৈ উভতি অহাৰ পিছত তেওঁ ধাৰ কৰা টকা পৰিশোধৰ ক্ষেত্ৰত সহায় বিচাৰি কংগ্ৰেছ দলৰ কেইবাজনো নেতা-কৰ্মীৰ কাষ চাপিছিল যদিও কোনো ধৰণৰ সহায় নাপালে। অৱশেষত, তেওঁৰ দুখ-কষ্টৰ কথা ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাৰ দৃষ্টি গোচৰ হয়।
পিছত মুখ্যমন্ত্ৰীৰ হস্তক্ষেপত অজয় নৰহৰ সম্পূৰ্ণ ঋণ পৰিশোধৰ ব্যৱস্থা কৰা হয় বুলি জানিব পৰা গৈছে। এই সহায় লাভ কৰাৰ পিছত অজয়ে মুখ্যমন্ত্ৰী গৰাকীক অশেষ ধন্যবাদ জনায় আৰু দুখৰ সময়ত আগবাঢ়ি অহাৰ বাবে কৃতজ্ঞতা প্ৰকাশ কৰে।
এই ঘটনাই ৰাজনৈতিক মহলত বিভিন্ন প্ৰতিক্ৰিয়া সৃষ্টি কৰিছে। ঘটনাটোৰ সন্দৰ্ভত কংগ্ৰেছ দলৰ পৰা আনুষ্ঠানিক প্ৰতিক্ৰিয়া পোৱা হোৱা নাই।
