মাৰ্ঘেৰিটাত বিধ্বংসী অগ্নিকাণ্ড।
দিনদুপৰতে লগা জুইত জাহ গ’ল তিনিটাকৈ বাসগৃহ।
কেইবাবিঘা মাটিৰ তামোল পুলিৰ লগতে ভস্মীভূত হ’ল ঘৰৰ সমস্ত সা-সম্পত্তি।
বৰ্তমান মুকলি আকাশৰ তলত আশ্ৰয় লৈছে তিনিটাকৈ দুৰ্ভগীয়া পৰিয়ালে।
মাৰ্ঘেৰিটাৰ মাইচাংপানীত আজি এক ভয়ংকৰ অগ্নিকাণ্ডই হাহাকাৰ পৰিৱেশৰ সৃষ্টি কৰে।
দিনৰ ভাগতে হঠাৎ সূত্ৰপাত হোৱা এই জুইয়ে মুহূৰ্তৰ ভিতৰতে সংহাৰী ৰূপ ধাৰণ কৰে।
জানিব পৰা মতে, অঞ্চলটোৰ নিবাসী দুলেশ্বৰ গগৈ, শৰৎ বড়ো আৰু দূৰ্লভ সোনোৱালৰ বাসগৃহত এই জুই লাগে।
জুইৰ প্ৰকোপ ইমানেই বেছি আছিল যে পৰিয়ালকেইটাই নিজৰ ঘৰৰ পৰা একো সা-সম্পত্তি উলিয়াই আনিবলৈ সক্ষম নহ’ল।
এই অগ্নিকাণ্ডত দুলেশ্বৰ গগৈৰ বাসগৃহৰ লগতে প্ৰায় চাৰে তিনি বিঘা মাটিৰ তামোল পুলি সম্পূৰ্ণৰূপে জ্বলি ছাই হৈ যায়।
আনহাতে, শৰৎ বড়ো আৰু দূৰ্লভ সোনোৱালৰ বাসগৃহৰ লগতে ভঁৰালত মজুত থকা আলু, সৰিয়হ, হালধি আৰু ঘৰৰ আচবাবসমূহ জুইত ভস্মীভূত হয়।
মুহূৰ্তৰ ভিতৰতে সকলো হেৰুৱাই এতিয়া শোকত ম্ৰিয়মান হৈ পৰিছে দুৰ্ভগীয়া পৰিয়ালকেইটা।
তেওঁলোকৰ সম্বল বুলিবলৈ এতিয়া মাথো পিন্ধি থকা কাপোৰকেইজাকহে বাকী ৰৈছেগৈ।
স্থানীয় ৰাইজ আৰু ভুক্তভোগী পৰিয়ালকেইটাই বৰ্তমান চৰকাৰ তথা জিলা প্ৰশাসনৰ ওচৰত জৰুৰী সাহায্য আৰু ক্ষতিপূৰণৰ বাবে কাতৰ আহ্বান জনাইছে।
জানিব পৰা অনুসৰি এগৰাকী মহিলাই জাৱৰ জ্বলোৱা সময়তে জুই শিখাই আগুৰি ধৰে সমগ্ৰ অঞ্চলটো।
