যিটো সময়ত (Amit Shah) দেশৰ বিভিন্ন ৰাজ্যত মাতৃভাষাৰ আদৰ কমি আহিছে সেই সময়তে অভিভাৱকলৈ কেন্দ্ৰীয় গৃহমন্ত্ৰী অমিত শ্বাহে এক বিশেষ আহ্বান জনাইছে৷ শ্বাহে কয়- আপোনাৰ সন্তানৰ সৈতে ঘৰত কেৱল মাতৃ ভাষাতে কথা পাতক৷ কেন্দ্ৰীয় গৃহমন্ত্ৰীগৰাকীয়ে সকলো অভিভাৱককে ঘৰতে নিজৰ সন্তানৰ সৈতে একান্তভাৱে মাতৃভাষাত কথা পাতিবলৈ আৰু শিশুসকলক মাতৃভাষা শিকোৱাটো নিশ্চিত কৰিবলৈ আহ৩ান জনায়৷ তেওঁ কয় যে যদি কোনো শিশু নিজৰ মাতৃভাষাৰ পৰা বঞ্চিত হয়, তেন্তে তেওঁলোক স্থানীয় সাহিত্য, কবিতা, ফকৰা-যোজনা, নিজৰ অঞ্চলৰ ইতিহাস আৰু শেষত আমাৰ সমগ্ৰ সংস্কৃতিৰ পৰা বিচ্ছিন্ন হৈ পৰিব৷ যদি আমি আমাৰ সন্তানক ভাৰতৰ সৈতে, নিজ নিজ ৰাজ্যৰ সৈতে, আমাৰ মূল্যবোধৰ সৈতে, আমাৰ সংস্কৃতিৰ সৈতে সংযুক্ত কৰি ৰাখিব বিচাৰো, তেন্তে সকলো মাতৃ-পিতৃকে ঘৰতে নিজৰ সন্তানৰ সৈতে মাতৃভাষাত কথা-বতৰা পাতিবলৈ আন্তৰিকতাৰে অনুৰোধ জনালো৷ যেতিয়া শিশুৱে নিজৰ ভাষা শিকে আৰু কয় তেতিয়া তেওঁলোকৰ প্ৰকাশভংগীৰ শক্তি, বিশ্লেষণাত্মক ক্ষমতা, সিদ্ধান্ত গ্ৰহণৰ ক্ষমতা আৰু সিদ্ধান্ত কাৰ্যকৰী কৰাৰ ক্ষমতা বহুগুণে বৃদ্ধি পাব৷ এই সকলোবোৰ গুণ ভাষাৰ লগত গভীৰভাৱে জড়িত হৈ আছে৷ কেন্দ্ৰীয় গৃহমন্ত্ৰী মন্ত্ৰী অমিত শ্বাহে ত্ৰিপুৰাৰ আগৰতলাত পূব, উত্তৰ-পূব আৰু উত্তৰ অঞ্চলৰ যুটীয়া আঞ্চলিক চৰকাৰী ভাষা সন্মিলনত ভাষণ দিয়ে৷ অমিত শ্বাহে কয় যে বহু বছৰ ধৰি হিন্দী জাপি দিয়া হৈছে বুলি অপপ্ৰচাৰ চলিছিল৷ তেওঁ কয় যে হিন্দী আৰু আঞ্চলিক ভাষাৰ মাজত কেতিয়াও কোনো সংঘাত হ’ব নোৱাৰে, কাৰণ এই সকলোবোৰ একেগৰাকী মাতৃৰ পৰা জন্ম হোৱা ভগ্নীৰ দৰে– এইবোৰ একেলগে ডাঙৰ হৈ আগবাঢ়িছে৷ তেওঁ কয় যে বাংলা, গুজৰাটী, তামিল, তেলেগু বা মালয়ালম আদি ভাষাৰ লগত হিন্দী কেতিয়াও প্ৰতিযোগিতাত নামিব নোৱাৰে৷ তেওঁ লগতে কয় যে যেতিয়াই হিন্দীৰ প্ৰচাৰ হয় তেতিয়াই এই সকলোবোৰ ভাষাও স্বয়ংক্ৰিয়ভাৱে শক্তিশালী হয়৷ কেন্দ্ৰীয় গৃহমন্ত্ৰীগৰাকীয়ে কয় যে চৰকাৰী ভাষা কেৱল যোগাযোগৰ মাধ্যমেই হ’ব নালাগে৷ তেওঁ উল্লেখ কৰে যে নীতি নিৰ্ধাৰণ আৰু দেশ নিৰ্মাণৰ প্ৰসংগ আহিলে চৰকাৰী ভাষা আৰু আমাৰ ভাৰতীয় ভাষাইহে সৰ্বাধিক অৱদান আগবঢ়াব পাৰে৷ তেওঁ কয় যে উত্তৰ-পূৰ্বাঞ্চলৰ বহু বিশিষ্ট ব্যক্তিয়ে হিন্দীৰ জৰিয়তে সমগ্ৰ দেশ আৰু বিশ্বত অঞ্চলটোলৈ স্বীকৃতি কঢ়িয়াই আনিছে৷ শ্বাহে উল্লেখ কৰে যে ড॰ ভূপেন হাজৰিকা, ত্ৰিপুৰাৰ পুত্ৰ এছ ডি বৰ্মন আৰু আৰ ডি বৰ্মন, ছিকিমৰ ডেনি ডেনজংপা আৰু জুবিন গাৰ্গৰ লগতে আন বহুজনে হিন্দীৰ জৰিয়তে ৰাষ্ট্ৰীয় তথা আন্তঃৰাষ্ট্ৰীয় খ্যাতি অৰ্জন কৰিছিল৷ তেওঁলোকৰ বাবে হিন্দী হৈ পৰিছিল ৰাষ্ট্ৰীয় স্তৰলৈ শ্ৰোতা-দৰ্শকৰ মাজলৈ যোৱাৰ এক মঞ্চ৷ চৰকাৰী ভাষাই সমগ্ৰ দেশৰ সৈতে সংযোগ স্থাপনৰ মাধ্যম হিচাপে কাম কৰে আৰু প্ৰতিখন ৰাজ্যৰ ক্ষেত্ৰতো একে নীতি প্ৰযোজ্য৷
