দক্ষিণ কামৰূপৰ ছমৰীয়াৰ ‘ডেকাচাং উচ্চ মাধ্যমিক বিদ্যালয়ৰ পুখুৰীৰ মাটি বেদখলৰ চেষ্টা ৷ বলপূৰ্বক মাটি বেদখলৰ চেষ্টা চলাইছে বিদ্যালয়ৰ ওচৰৰে এটা পৰিয়ালে ৷ বিদ্যালয়ৰ পুখুৰীৰ মাটিত পৰিয়লটোৱে নিশা নিশা চলাইছে অবৈধ নিৰ্মানকাৰ্য ৷ ইয়াক লৈ ডেকাচাঙত চলিছে সৰৱ চৰ্চা ৷ এই বেদখলক লৈ আজি বিদ্যালয় পৰিচালনা সমিতি, স্থানীয় ৰাইজ, প্ৰাক্তন ছাত্ৰ সন্মিলনী আৰু বিদ্যালয়ৰ শিক্ষক- শিক্ষয়িত্ৰীকে ধৰি ছাত্ৰ- ছাত্ৰীৰ মাজত সৃষ্টি হয় তীব্ৰ প্ৰতিক্ৰিয়া ৷ ১৯৭৪ চনত স্থাপিত ডেকাচাং উচ্চ মাধ্যমিক বিদ্যালয়খনৰ পুখুৰী নিৰ্মানৰ বাবে ১৯৮৮ চনৰ ১৫ আগষ্ট তাৰিখে তেতিয়াৰ বিদ্যালয় পৰিচালনা সমিতিয়ে বিদ্যালয়ৰ ওচৰৰে মুহুৰ উদ্দিন আৰু দাৰোগ আলী নামৰ দুজন ব্যক্তিৰ পৰা ক্ৰয় কৰিছিল ১ বিঘা ২ কঠা ১৭ লেচা মাটি ৷ পৰৱৰ্তী সময়ত উক্ত মাটিত খন্দা পুখুৰীত মাছ পালন কৰি বিদ্যালয় কতৃপক্ষই বিদ্যালয়ৰ আন্তগাঁথনিৰ উন্নয়ন কৰি আহিছিল ৷ এনে অৱস্থাত উক্ত পুখুৰীৰ মাটিৰ ওপৰত শেন চকু পৰে মাটি বিক্ৰেতা পৰিয়াল এটাৰ ৷ বিদ্যালয়ৰ পুখুৰী খন্দাৰ নামত ৬৬ লেচা মাটি বিক্ৰী কৰা মুহুৰ উদ্দিনৰ পুত্ৰ ইউছোব আলীয়ে বিদ্যালয়ৰ পুখুৰীৰ মাটিত চলাইছে অবৈধভাৱে বেদখল ৷
পুখুৰীৰ নামত মাটি বিক্ৰী কৰা লোকৰ পৰা কেৱল মুহুৰ উদ্দিনৰ পুত্ৰই ৩৭ বছৰ পিচত কিদৰে বিদ্যালয়ৰ মাটি বেদখল কৰিব পাৰিলে তাক লৈ এতিয়া ৰাইজৰ মাজত সৰৱ চৰ্চা চলা পৰিলক্ষিত হৈছে ৷ ইতিমধ্যে, মাটি বিক্ৰেতা মুহুৰ উদ্দিনৰ পুত্ৰ ইউছোব আলীয়ে বিদ্যালয়ৰ উক্ত পুখুৰীৰ মাটিত বেদখল চলাই নিৰ্মান কাৰ্য আৰম্ভ কৰিছে ৷ ইয়াক লৈ নিৰ্মানস্থলীত আজি বিদ্যালয় কতৃপক্ষ তথা বিদ্যালয় পৰিচালনা সমিতি, স্থানীয় ৰাইজ, প্ৰাক্তন ছাত্ৰ সন্মিলনী আৰু বিদ্যালয়ৰ শিক্ষক- শিক্ষয়িত্ৰীকে ছাত্ৰ- ছাত্ৰী উপস্থিত এই অবৈধ কাৰ্যৰ বিৰোধিতা কৰাৰ লগতে তীব্ৰ প্ৰতিক্ৰিয়া ব্যক্ত কৰে ৷ লগতে এই নিৰ্মানকাৰ্য বন্ধ কৰাৰ বাবে প্ৰশাসনক কঠোৰ পতক্ষেপ গ্ৰহণ কৰিবলৈ আহ্বান জনায় ৷ আনহাতে, বৃহত্তৰ অঞ্চলৰ ৰাইজ , অভিভাৱক, শিক্ষক- শিক্ষয়িত্ৰী তথা বিদ্যালয়ৰ ছাত্ৰ-ছাত্ৰী সকলৰ দাবী- – বৃহৎ অঞ্চলৰ এই শৈক্ষিক ক্ষেত্ৰৰ উন্নয়নৰ স্বাৰ্থত উক্ত পুখুৰীৰ ভূমিখিনি যাতে কোনো কাৰণতে বেলেগ মানুহে দখল কৰিব নোৱাৰে লগতে বিদ্যালয়ৰ ভূমি যাতে বিদ্যালয়ৰে হৈ থাকে তাৰ বাবে চৰকাৰ তথা বিভাগীয় কতৃপক্ষক মাটিখিনি বিদ্যালয়ৰ নামত সংৰক্ষণ কৰাৰ ব্যৱস্থা কৰিবলৈ সংবাদ মাধ্যমৰ জৰিয়তে চৰকাৰ ও প্ৰশাসনক অনুৰোধ জনাইছে ।
