ৰাজ্যিক বিজেপিয়ে শনিবাৰৰ পৰা আৰম্ভ কৰা জন আশীৰ্বাদ যাত্ৰাৰ প্ৰতি জনতাই ব্যাপক সঁহাৰি জনোৱা পৰিলক্ষিত হৈছে৷ এনে সময়তে ৰাজ্যিক বিজেপিৰ সভাপতি দিলীপ শইকীয়াই কয় যে ঢেকীয়াজুলি, বৰছলা আৰু তেজপুৰত দেখা গৈছে জনসমুদ্ৰৰ অভূতপূৰ্ব সঁহাৰি৷
প্ৰধানমন্ত্ৰী নৰেন্দ্ৰ মোদীৰ নেতৃত্বত আৰু মুখ্যমন্ত্ৰী হিমন্ত বিশ্ব শৰ্মাৰ দিশ-নিৰ্দেশনাত অসমত পুনৰ বিজেপি চৰকাৰ গঠনৰ বাবে এই আশীৰ্বাদ বুলি তেওঁ মন্তব্য কৰে৷ শইকীয়াই কয়, ‘ৰাইজে স্বতঃস্ফূৰ্তভাৱে ড॰ হিমন্ত বিশ্ব শৰ্মাক ৰাইজে আশীৰ্বাদ দিবলৈ ওলাই আহিছে৷ আমি দেখিছোঁ চাৰিওফালে ৰাইজৰ সাগৰ৷ মামাক আশীৰ্বাদ দিবলৈ আহিছে ৷
আকৌ এবাৰ বিজেপি চৰকাৰ গঠন কৰাৰ বাবে সকলো ৰাইজ আজি ওলাই আহিছে৷ সকলো ৰাইজলৈ আমি ধন্যবাদ জনাইছোঁ৷’ যাত্ৰাৰ সময়ছোৱাত বিজেপিৰ দলীয় পতাকা আৰু সমৰ্থকৰ ভিৰে বিভিন্ন স্থান উৎসৱমুখৰ হৈ পৰে৷
দলীয় সূত্ৰ অনুসৰি, ঢেকীয়াজুলি, বৰছলা, তেজপুৰ, নদুৱাৰ আৰু ৰঙাপাৰা– এই পাঁচটা সমষ্টিত প্ৰায় দহটা বিশেষ স্থানত ৰাইজৰ সৈতে পোনপটীয়া সংযোগ স্থাপন কৰা হৈছে ৷ পথসভা আৰু জনসমাগমত চৰকাৰৰ উন্নয়নমূলক আঁচনি, আন্তঃগাঁথনি উন্নয়ন, শিক্ষা-স্বাস্থ্য খণ্ডৰ সংস্কাৰ আৰু আত্মনিৰ্ভৰ অসমৰ দৃষ্টিভংগী সন্দৰ্ভত বক্তব্য ৰাখে মুখ্যমন্ত্ৰীয়ে৷
