অসম চৰকাৰৰ শেহতীয়া এক সমীক্ষা অনুসৰি, বিগত পাঁচ বছৰত ৰাজ্যৰ আটাইতকৈ বেছি উন্নয়ন হোৱা দহটা বিধানসভা সমষ্টি আৰু বিধায়কসকলৰ তালিকা প্ৰকাশ কৰিছে। এই সমীক্ষা অনুসৰি মুখ্যমন্ত্ৰী ডঃ হিমন্ত বিশ্ব শৰ্মাৰ জালুকবাৰী সমষ্টি উন্নয়ণৰ ক্ষেত্ৰত শীৰ্ষস্থানত আছে। প্ৰতিবেদনত উল্লেখ কৰা হৈছে যে বিকশিত অসমৰ সপোনৰ মূল আৰম্ভণি মুখ্যমন্ত্ৰীৰ জালুকবাৰী সমষ্টিৰ পৰা হৈছে। সমষ্টিটোত এই সময়ছোৱাত এইমছ (AIIMS) ৰ দৰে দেশৰ অগ্ৰণী স্বাস্থ্যসেৱাৰ প্ৰতিষ্ঠান, বিশ্বমানৰ গুৱাহাটীৰ নতুন টাৰ্মিনেল, আৰু ফাঁচীবজাৰ উত্তৰপাৰ সংযোগী নতুন দলং, আইআইআইটি (IIIT), ৰাষ্ট্ৰীয় আইন মহাবিদ্যালয় লগতে সামগ্ৰিকভাৱে ৰাস্তা-ঘাট, শিক্ষা, পানী যোগান, চিকিৎসা ব্যৱস্থাকে ধৰি সৰ্বশ্ৰেষ্ঠ সমষ্টি হিচাপে গঢ়ি তোলা হৈছে। দ্বিতীয় স্থানত থকা মন্ত্ৰী পীয়ুষ হাজৰিকাৰ জাগীৰোড সমষ্টিতো উল্লেখনীয় উন্নয়ন হৈছে। ইয়াত টাটা ছেমি কণ্ডাক্টৰকে ধৰি নতুন ষ্টেডিয়াম, নতুন আন্তঃগাঁথনি, ৰাস্তা-ঘাট, শিক্ষা, স্বাস্থ্যৰ সকলো দিশতে যথেষ্ট উন্নয়ন সম্ভৱ হৈছে।
মন্ত্ৰী জয়ন্ত মল্ল বৰুৱাৰ দিনত নলবাৰী সমষ্টিত বিকাশৰ নতুন গতি লাভ কৰা বুলি প্ৰতিবেদনত প্ৰকাশ হৈছে। ইয়াত নতুন ষ্টেডিয়াম, মেডিকেল কলেজ, ইঞ্জিনীয়াৰিং কলেজ, ৰাস্তা-ঘাট, শিক্ষা-স্বাস্থ্যৰ সকলোতে যথেষ্ট উন্নয়ন সম্ভৱ হৈছে। মন্ত্ৰী অশোক সিংহালৰ ঢেকীয়াজুলি সমষ্টি, বিধায়ক হেমাংগ ঠাকুৰীয়াৰ পলাশবাৰী, ৰঞ্জিত কুমাৰ দাসৰ বজালী, বিমল বৰাৰ টিংখাং, কৌশিক ৰায়ৰ লক্ষীপুৰ, আৰু তৰংগ গগৈৰ নাহৰকটীয়া সমষ্টিতো বিগত পাঁচ বছৰত নতুন ষ্টেডিয়াম, নতুন মহাবিদ্যালয়, চিকিৎসা, শিক্ষা, আৰু পথ যোগাযোগৰ ক্ষেত্ৰত যথেষ্ট উন্নয়ন দেখা গৈছে। বিশেষকৈ পলাশবাৰী সমষ্টিত আইআইএম (IIM) স্থাপন, আয়ুৰ্বেদিক কলেজ, আজিম প্ৰেমজি ইউনিভাৰ্চিটি, আৰু কিডনী ৰোগীৰ বিনামূলীয়া ডায়লাইছিছ চেন্টাৰ স্থাপন হোৱাটো এক গুৰুত্বপূৰ্ণ পদক্ষেপ বুলি বিবেচিত হৈছে।
