IJRAR । অসমৰ বৌদ্ধিক সমাজলৈ এক গৌৰৱোজ্জ্বল খবৰ কঢ়িয়াই আনিছে দক্ষিণ গুৱাহাটী জাতীয় বিদ্যালয়ৰ নৱম শ্ৰেণীৰ মেধাৱী ছাত্ৰী এইচ্ বি দিব্যাক্ষী চৌধুৰীয়ে।
হিমাংশু চৌধুৰী আৰু বৰ্ণালী চৌধুৰীৰ কন্যা দিব্যাক্ষীৰ এক বিশেষ গাণিতিক গৱেষণা পত্ৰ ৩০ মাৰ্চ, ২০২৬ তাৰিখে বিখ্যাত আন্তৰ্জাতিক গৱেষণা পত্ৰিকা ‘International Journal of Research and Analytical Reviews’ (IJRAR)-ত সফলতাৰে প্ৰকাশ পাইছে।“Mathematical Representation of the Integer Set Z via the Ternary Quadratic Form” শীৰ্ষক এই গৱেষণা পত্ৰখনত তেওঁ J = a^2 + b^2 – c^2 সূত্ৰৰ জৰিয়তে সংখ্যাতত্ত্বৰ এক জটিল আৰু নতুন গাণিতিক বিশ্লেষণ দাঙি ধৰিছে।
অতি কম বয়সতে গণিতৰ দৰে কঠিন বিষয়ত এনেদৰে আন্তৰ্জাতিক স্বীকৃতি লাভ কৰি দিব্যাক্ষীয়ে সমগ্ৰ অসমৰ লগতে নিজৰ বিদ্যালয়লৈও গৌৰৱ কঢ়িয়াই আনিছে। বৰ্তমান তেওঁ ‘The Universal Power Conclusion’ নামৰ এক বৃহৎ গাণিতিক প্ৰকল্পৰ কামত ব্ৰতী হৈ আছে আৰু ভৱিষ্যতে এগৰাকী সফল গৱেষক হোৱাৰ লক্ষ্যৰে নিজৰ যাত্ৰা অব্যাহত ৰাখিছে।
