নলবাৰী জিলাৰ বৰক্ষেত্ৰীৰ কাপলাবড়ীত জৰাজীৰ্ণ পথ মেৰামতি কৰিলে মিলিজুলি বেপাৰী সন্থা আৰু ট্ৰেক্টৰ সন্থাই।
নলবাৰী জিলাৰ বৰক্ষেত্ৰীৰ কাপলাবড়ীৰ পৰা কাপলাবড়ী পাৰঘাট হৈ চৰাঞ্চলৰ তিনিখন মূল পঞ্চায়তলৈ যোৱা মুখ্য পথটো বছৰ বছৰ ধৰি জৰাজীৰ্ণ হৈ আছিল। জৰাজীৰ্ণ পথৰ ফলত কুৰিহামাৰী,শিয়ালমাৰী আৰু কালাৰচৰ পঞ্চায়তক সামৰি বৃহত্তৰ চৰাঞ্চলৰ লোকে বেহা-বেপাৰকে ধৰি দৈনন্দিন জীৱনৰ প্ৰয়োজনীয় কামলৈ নিতৌ অহা-যোৱা কৰোঁতে যমৰ যন্ত্ৰনা ভুগিবলগীয়া হৈছিল।
সাধাৰণ পথচাৰীৰ যন্ত্ৰনা সহিব নোৱাৰা মিলিজুলি বেপাৰী সন্থা আৰু ট্ৰেক্টৰ সন্থাই বৰক্ষেত্ৰী সমষ্টিৰ উক্ত জৰাজীৰ্ণ পথটো গাঁঠিৰ ধন ভাঙি মেৰামতি কৰি ৰাইজৰ দুৰ্ভোগৰ অন্ত পেলায় আদৰ্শ দেখুৱাবলৈ সক্ষম হৈছে।উল্লেখ্য যে উক্ত অতি ব্যস্ততাপূৰ্ণ পথটো বিভাগীয়ভাৱে চৰকাৰী আঁচনিৰ অধীনত মেৰামতি কৰা হোৱা নাই যদিও একাংশ লোকে উক্ত পথটো চৰকাৰী আঁচনিৰ অধীনত মেৰামতি কৰা বুলি ৰাজনৈতিক ৰহণ সানিব বিচৰাত অঞ্চলটোত এক তীব্ৰ চাঞ্চল্যৰ সৃষ্টি হৈছে।
