গুৱাহাটীঃ কৃত্ৰিম বানৰ ভয়াবহতাৰ মাজতে পুনৰ এক মৰ্মান্তিক ঘটনা সংঘটিত হৈছে Maligaonত। দেওবাৰে নেৰানেপেৰা বৰষুণৰ ফলত সৃষ্টি হোৱা বানপানীত উটি যোৱা পায়েল নাথ নামৰ মহিলাগৰাকীক অৱশেষত উদ্ধাৰ কৰা হয়।
ঘটনাস্থলীৰ পৰা প্ৰায় ২৫০ মিটাৰ আঁতৰত উদ্ধাৰ কৰা হয় মহিলাগৰাকীক। উদ্ধাৰৰ সময়ত তেওঁ অচেতন অৱস্থাত আছিল। তৎক্ষণাৎ তেওঁক চিকিৎসাৰ বাবে নিকটৱৰ্তী চিকিৎসালয়লৈ প্ৰেৰণ কৰা হয়।
কিন্তু চিকিৎসালয়ত উপস্থিত কৰাৰ পিছত চিকিৎসকে মহিলাগৰাকীক মৃত ঘোষণা কৰে। এই ঘটনাই পুনৰ এবাৰ প্ৰমাণ কৰিলে মহানগৰীৰ কৃত্ৰিম বানৰ ভয়াবহতা।
উল্লেখ্য যে, ধাৰাপুৰৰ বাসিন্দা পায়েল নাথ নেৰানেপেৰা বৰষুণৰ ফলত নলাত উটি যোৱাৰ সন্দেহ কৰা হৈছিল। উদ্ধাৰ অভিযানত জড়িত দলসমূহে অবিৰত প্ৰচেষ্টাৰ অন্তত মহিলাগৰাকীক বিচাৰি উলিয়াবলৈ সক্ষম হয় যদিও, শেষত তেওঁক জীৱিত অৱস্থাত উদ্ধাৰ কৰিব নোৱাৰিলে।
এই ঘটনাই Guwahati মহানগৰীৰ বৰ্তমানৰ দুৰ্যোগপূৰ্ণ পৰিস্থিতিক লৈ গভীৰ উদ্বেগৰ সৃষ্টি কৰিছে। প্ৰশাসনে জনসাধাৰণক সতৰ্ক হৈ থাকিবলৈ আৰু বানপানীৰ সময়ত বিশেষ সাৱধানতা অৱলম্বন কৰিবলৈ পুনৰ আহ্বান জনাইছে।
