বৰক্ষেত্ৰী ঘোগাৰ মেধাৱী যুৱক চানিয়ামূল আহমেদৰ অকাল বিয়োগ৷ নলবাৰীৰ মুকালমুৱাৰ সমীপৱৰ্তী ঘোগা অঞ্চলত আজি পুৱা এক গভীৰ শোকাকুল পৰিৱেশ বিৰাজ কৰে। অঞ্চলটোৰ এজন অত্যন্ত মেধাৱী, উদীয়মান তথা উচ্চ-শিক্ষিত যুৱক চানিয়ামূল আহমেদৰ মাত্ৰ ২৭ বছৰ বয়সত অকাল মৃত্যু ঘটে। তেওঁৰ এই বিয়োগৰ খৱৰে সমগ্ৰ জিলাখনতে শোকৰ ছাঁ পেলাইছে।
ঘোগা নিবাসী স্বৰ্গীয় আব্দুল হামিদৰ পুত্ৰ চানিয়ামূল আহমেদ শৈশৱৰে পৰাই এজন অত্যন্ত তীক্ষ্ণ বুদ্ধিৰ ছাত্ৰ আছিল। তেওঁ জি.বি.এল. হাইস্কুলৰ পৰা পাঁচখনকৈ বিষয়ত লেটাৰ মাৰ্কসহ ‘ষ্টাৰ মাৰ্ক’ লাভ কৰি উত্তীৰ্ণ হৈছিল। গুৱাহাটীৰৱেল গ্ল’বেল ইউনিভাৰ্চিটিৰ পৰা এম.এছ.চি (M.Sc) ডিগ্ৰী লাভ কৰাৰ উপৰিও ৰঙিয়া মহাবিদ্যালয়ৰ পৰা সফলতাৰে বি.এড (B.Ed) ডিগ্ৰী সম্পূৰ্ণ কৰিছিল। মৃত্যুৰ আগমুহূৰ্তলৈকে তেওঁ হাজোৰ এখন ব্যক্তিগত মহাবিদ্যালয়ত অধ্যাপক হিচাপে কৰ্মৰত হৈ আছিল। তেওঁৰ নম্ৰ ব্যৱহাৰ আৰু সমাজপ্ৰিয় চৰিত্ৰৰ বাবে তেওঁ সকলোৰে মাজত জনপ্ৰিয় আছিল। পৰিয়ালৰ সূত্ৰে জানিব পৰা মতে, প্ৰায় দুবছৰ পূৰ্বে চানিয়ামূলৰ দেহত এপেণ্ডিক্সৰ সমস্যা ধৰা পৰিছিল।
শেহতীয়াকৈ তেওঁৰ এপেণ্ডিক্স ব্লাষ্ট হোৱাৰ ফলত শাৰীৰিক অৱস্থাৰ গুৰুতৰ অৱনতি ঘটে। উন্নত চিকিৎসাৰ বাবে তেওঁক চেন্নাইলৈ লৈ যোৱা হৈছিল। চিকিৎসাধীন অৱস্থাত স্বাস্থ্যৰ কিছু উন্নতি পৰিলক্ষিত হৈছিল যদিও আজি পুৱা প্ৰায় ৬ বজাত হঠাতে তেওঁ শেষ নিশ্বাস ত্যাগ কৰে। এগৰাকী শিক্ষিত আৰু সম্ভাৱনাপূৰ্ণ যুৱকৰ এনে আকস্মিক মৃত্যুত ঘোগা অঞ্চলৰ লগতে তেওঁৰ কৰ্মস্থলীত গভীৰ শোকৰ ছাঁ পৰিছে। জানিব পৰা মতে, আজি জোহৰৰ নামাজৰ পিছতেই ধৰ্মীয় ৰীতি-নীতিৰে তেওঁৰ জানাজা সম্পন্ন কৰা হ’য়।
এগৰাকী প্ৰতিভাশালী যুৱকৰ এনে অকাল মৃত্যুত বিভিন্ন দল-সংগঠন তথা স্থানীয় ৰাইজে গভীৰ শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিছে। মৃত্যুৰ সময়ত তেখেতৰ মাতৃৰ লগতে এগৰাকী জোষ্ঠ ভগ্নী আৰু এজন ভাতৃৰ লগতে বহুতো গুনমুগ্ধ ইহ সংসাৰত এৰি থৈ যায়। জানাজা নামাজ সহস্ৰাধিক গুণমুগ্ধৰ উপস্থিতিত ঘোগা বদনী আখিয়া ৰাজহুৱা ঈদগাহ ময়দানত সম্পন্ন কৰা হয়।
