ৰাজ্যত পুনৰ NDA চৰকাৰ গঠনৰ ক্ষণ গণনা আৰম্ভ হৈছে। কাইলৈ অৰ্থাৎ ১২ মে’ত গুৱাহাটীৰ খানাপাৰাস্থ পশু চিকিৎসা মহাবিদ্যালয়ৰ খেলপথাৰত অনুষ্ঠিত হ’ব নতুন চৰকাৰৰ শপতগ্ৰহণ অনুষ্ঠান। দিনৰ ১১.৪০ বজাত মুখ্যমন্ত্ৰীৰূপে দ্বিতীয়বাৰৰ বাবে শপত গ্ৰহণ কৰিব Himanta Biswa Sarma-ই।
ইতিমধ্যে শপতগ্ৰহণ অনুষ্ঠানক কেন্দ্ৰ কৰি উদুলি-মুদুলি পৰিৱেশে বিৰাজ কৰিছে সমগ্ৰ গুৱাহাটীত। বিয়াঘৰৰ দৰে সজাই-পৰাই তোলা হৈছে মহানগৰখন। নিশা-দিন একাকাৰ কৰি শতাধিক শ্ৰমিকে ৰাজধানীখনক ন-ৰূপ দিবলৈ অব্যাহত ৰাখিছে কাম। পথসমূহত চূণ-তেল সনা, উৰণসেতু পৰিষ্কাৰ কৰা আৰু চলাচলৰ সুবিধাৰ্থে বিভিন্ন স্থানত বাঁহৰ বেৰিকেড স্থাপন কৰাৰ কাম জোৰদাৰভাৱে চলি আছে।
শপতগ্ৰহণ অনুষ্ঠানত উপস্থিত থাকিব দেশৰ প্ৰধানমন্ত্ৰী Narendra Modi, কেন্দ্ৰীয় গৃহমন্ত্ৰী Amit Shah, বিজেপিৰ ৰাষ্ট্ৰীয় সভাপতি J. P. Naddaৰ লগতে NDA শাসিত বিভিন্ন ৰাজ্যৰ মুখ্যমন্ত্ৰীসকল। অনুষ্ঠানত দেশৰ আগশাৰীৰ বহু উদ্যোগপতি আৰু লক্ষাধিক লোকৰ উপস্থিতিৰ সম্ভাৱনা প্ৰকাশ কৰা হৈছে।
ইফালে, নতুন মন্ত্ৰীসভাত কোন কোন বিধায়কে স্থান লাভ কৰিব তাক লৈ জল্পনা-কল্পনা তুংগত উঠিছে। যদিও মুখ্যমন্ত্ৰীৰূপে হিমন্ত বিশ্ব শৰ্মাৰ নাম ইতিমধ্যে নিশ্চিত হৈছে, তথাপিও কোনে কোন বিভাগৰ দায়িত্ব লাভ কৰিব সেয়া এতিয়াও আনুষ্ঠানিকভাৱে ঘোষণা কৰা হোৱা নাই। বিজেপি আৰু মিত্ৰদলৰ মাজত মন্ত্ৰিত্ব বণ্টনক লৈ ব্যাপক আলোচনা চলি থকাৰ খবৰ পোৱা গৈছে।
উল্লেখযোগ্য যে, NDAৰ বিধায়িনী দলৰ বৈঠকত সৰ্বসন্মতিক্ৰমে বিধায়িনী দলৰ নেতা হিচাপে নিৰ্বাচিত হয় হিমন্ত বিশ্ব শৰ্মা। বিজেপিৰ কেন্দ্ৰীয় নেতৃত্বৰ উপস্থিতিত অনুষ্ঠিত বৈঠকৰ পিছতে ৰাজ্যপালৰ ওচৰত চৰকাৰ গঠনৰ দাবী জনায় তেওঁ। চৰকাৰ গঠনৰ পূৰ্বে মা কামাখ্যাৰ আশীৰ্বাদ বিচাৰি শক্তিপীঠ কামাখ্যাত উপস্থিত হয় হিমন্ত বিশ্ব শৰ্মাৰ লগতে J. P. Nadda আৰু Nayab Singh Saini।
নতুন চৰকাৰৰ শপতগ্ৰহণক লৈ বিজেপি কৰ্মী-সমৰ্থকৰ মাজতো দেখা গৈছে উৎসাহ-উদ্দীপনা। পুনৰ এবাৰ হিমন্ত বিশ্ব শৰ্মাৰ নেতৃত্বত অসমে নতুন উন্নয়নৰ দিশত আগবাঢ়িব বুলি আশা ব্যক্ত কৰিছে সমৰ্থকসকলে।
